Skip to content
BibleKenya

Roglai Bible Literal Text

Lu-ka 14

Vruãq ròq tơviãq tũq Pitrai nao tơmã sàc sa aràc mơnuĩh apãt akõq gah pơjẽh pơtiàt Pha-ri-si dơlãp sa harơi Sa-bat pioh angui bõc, sì pơnõq nhũ dòq iãq gơnĩt sì dio Pitrai. Sì dih, hũ sa aràc mơnuĩh nữn kađòc ruãq vrah nhũ dòq pãq anãq Pitrai. Tũq mãq pơnuaĩq, Yàc Je-su đơp sì dơgrữq pô pơto voh-va sì mơnuĩh Pha-ri-si làiq: “Hũ wãq làiq hũ gơnuar pakhơĩh ruãq dơlãp harơi Sa-bat jỡc lơĩh?” Nữn pơnõq nhũ dòq suà. Vloh tũq nữn gròc mơnuĩh ruãq, Pitrai pasồq pakhơĩh mơnuĩh nữn, sì vrơi nhũ nao wỡq. Pitrai đơp sì pơnõq nhũ: “Asơi dơlãp pơnõq ung hũ anàq lakơi, hẽla sa drơi lơmo, kađòc lẽq tơmã dơlãp vơngũn dơlãp harơi Sa-bat nữn vloh ôh katũc nhũ tơgùq lơĩh?” Pơnõq nhũ ôh tũq halơi đơp grơlah jỡc pãq anãq dơdrữq pơnuaĩq nĩ.

Vloh Pitrai akhàt ga dơgrữq mơnuĩh thuãi hũ jàq sa kaya pa-mơyơu, kơyua tồq bôh yơu halơi pơnõq nhũ song duỡt rơwah dơgrữq anĩh dòq guh pãq anãq, nữn đơp sì pơnõq nhũ làiq: “Tũq pơnõq ung hũ asơi nữn hũ jàq trôh pioh bõc adãt pơhuãq, juơi dòq guh anĩh dlòc rlao kuơ màc, huaĩq làiq pơlih hũ sa aràc mơnuĩh kuơ màc rlao pơnõq ung kung hũ mơnuĩh nữn jàq. Tũq nữn mơnuĩh song jàq pơnõq adơi sơai sigỡuq sì mơnuĩh thuãi dih ròq trôh, đơp sì pơnõq ung: ‘Lakơu luơi anĩh ga mơnuĩh nĩ dòq guh,’ nữn pơnõq ung ròq luơi anĩh nữn trỗt dòq guh pãq anĩh luôĩq nữn ròq malơu mơta. Pa-vlữq wỡq, dơlãp tũq pơnõq ung hũ jàq, iỡuq nao vẽq, tơmã dòq guh pãq ban bõc pãq anĩh luôĩq hadơi, pioh tũq mơnuĩh song jàq pơnõq ung trôh, pơnõq nhũ ròq đơp sì pơnõq unq: ‘Ơ gỡuq mayơu, lakơu jàq dòq guh pãq anĩh dlòc rlao.’ Tũq nữn, ròq hũ kaya ki ngãm pơweh sì ga pơnõq ung pãq anãq dơgrữq mơnuĩh dòq guh ban sigỡuq sì drơi. Kơyua mưng asơi pa-dlòc rùp drơi ròq tơgùq kađòc pa-trỗt, sì asơi pơviar rùp drơi trỗt ròq hũ pa-dlòc tơgùq.”

Hadơi nữn, Pitrai kung đơp sì mơnuĩh song jàq Pitrai: “Tũq ung pơyãq bõc pơđiãq hẽla war bõc sồp, juơi jàq gỡuq mayơu pơnõq ung, hẽla pơnõq adơi sơai ung, hẽla gỡuq gãt anàq tơcho ung, kung juơi jàq dơgrữq mơnuĩh palơi lơgar jẽq phia mơda gơnãp, huaĩq làiq, pơnõq nhũ kung pơlih hũ jàq wỡq ung, sì vruãq vơyar srẽ ròq trôh ga ung. Vlữq wỡq làiq, tũq ung ngãq adãt, iỡuq jàq dơgrữq mơnuĩh rơbah rơbờp, jõh kao, we wãc, sồp vùp, nữn ung ròq hũ lơngai, kơyua pơnõq nhũ ôh tũq halơi vơyar wỡq ga ung. Kơyua mưng vơnãh vơyar ròq hũ pioh ga ung dơlãp kaya hadiuq wỡq mơnuĩh tơpãq rĩng hũ.”

Tũq sa aràc dơlãp dơgrữq mơnuĩh dòq guh ban bõc hmỡq dơgrữq pơnuaĩq nĩ, ung nữn đơp sì Pitrai: “Lơngai la mơnuĩh hũ ròq bõc bẽn dơlãp lơgar Yàc Pô Lơngĩq!” Nữn Pitrai đơp sì ung: “Hũ sa aràc mơnuĩh dih pồq kaya bõc mơnhũm prõc sì jàq lũ mơnuĩh thuãi mai bõc. Trôh tũq jơ bõc dãt, ung pơđar mơnuĩh halỗt mơnãq nhũ nao đơp sì dơgrữq mơnuĩh hũ jàq: ‘Lakơu iỡuq nao trôh kơyua war bõc adãt nĩ rơchãc lơĩh vloh.’ Nữn sì avih dơgrữq pơnõq nhũ vloh nữn dơgrữq aràc kơmlah. Mơnuĩh chơmrờp đơp sì ung: ‘Hlãq song nao vlơi savĩq hamã, sì hlãq iỡuq ưng nao iãq nhũ. Lakơu ung vrơi ga hlãq lakơu drơi.’ Mơnuĩh tơmo đơp: ‘Hlãq song vlơi lơmã yơu lơmo, nữn iỡuq chàc nao lơ-oa nhũ. Lakơu ung vrơi ga hlãq lakơu drơi.’ Mơnuĩh tơmo wỡq hũ đơp: ‘Hlãq ròq khiãng kamơi, sì kơyua nữn pơlih ôh nao jỡc.’ Mơnuĩh halỗt mơnãq wỡq, akhàt dơgrữq vruãq nữn ga pô nhũ. Tũq nữn, hadơi sì tũq tơgùq kaya nong, mơnuĩh pô sàc ròq đơp sì mơnuĩh halỗt mơnãq nhũ: ‘Iỡuq sơmar tơviãq nao dơgrữq jơlàt prõc sì jơlàt tìt sì va pãq đĩ dơgrữq mơnuĩh rơbah rơbờp, jõh kao, vùp sì we wãng tơmã.’ Halỗt mơnãq đơp: ‘Ơ ung pô sàc, pơnõq hlãq song ngãq yơu ung hakơi, nữn gãm dòq wỡq lơwah anĩh.’ Pô sàc đơp sì halỗt mơnãq: ‘Iỡuq tơviãq nao tui dơgrữq jơlàt prõc sì dơgrữq gah lơniãu blàc palơi tìt, vloh pơgùq pơ-èp nhũ tơmã, ngãq hayơu ga nhũ vãq sàc kơu. Kơyua kơu đơp sì sơai thơu làiq ôh hũ asơi dơlãp adãt mơnuĩh hũ jàq dih ròq hũ tơmã dơlãp adãt bõc mơnhũm kơu hũ.’”

Tũq nữn, dơgrữq tơpuôl vual vơla lũ viãq pơnõq nhũ ãn nao tui Pitrai, nữn nhũ weh wỡq, Pitrai đơp sì pơnõq nhũ: “Mơyah làiq mơnuĩh halơi nao trôh sigỡuq sì kơu nữn ôh mơvai ama ami, sơdiuq anàq, adơi sơai, sơai kamơi drơi, gãm sì kaya hadiuq drơi tơra, mơnuĩh nữn ôh tũq halơi la mơnuĩh mơgrũ kơu hũ. Mơnuĩh hlơi ôh gơlãp kayơu pỡc drơi nữn tui hadơi kơu, sì mơnuĩh nữn ôh tũq halơi ngãq mơnuĩh mơgrũ kơu. Kơyua mơnuĩh halơi dơlãp pơnõq adơi sơai ưng vữq padỡc sa voh sàc vơ-mũng, nữn halơu avih ôh dòq guh gơrhia pioh iãq — drơi pơlih hũ tãl jĩn ngãq wil tãl hẽla avih vruãq nữn yơh? Huaĩq làiq, hadơi nữn, tũq sơai nữn song vữq padỡc gơnãq vloh nữn ôh ngãq jỡc, nữn avih dơgrữq mơnuĩh iãq bôh yơu nữn ròq hũ pơnuaĩq tlao siẽq siẽl sơai nữn, đơp làiq: ‘Mơnuĩh nĩ pơdòq vữq padỡc nữn ôh tũq halơi rgơi ngãq jỡc wil tãl.’ Hẽla hũ pitao halơi, tũq jẽq tơviãq nao mơsôh sì pitao tơmo pãq anĩh mơsôh, ôh tũq halơi dòq guh pãq ala, hlơu vih la karhia làiq mơyah drơi hũ sa plôh rơvơu tơpuôl ling, nữn pơlih poh jỡc sì mơnuĩh ãn jơdrãq sigỡuq sì drơi nữn dua plôh rơvơu ling lơĩh? Mơyah làiq huaĩq ôh jỡc, nữn dơlãp tũq pitao dih dòq mưng ơtah, pitao nĩ pơđar mơnuĩh ãt pơđar nao lakơu kaya salơnuãq. Nữn, iỡuq yơu nữn, asơi dơlãp pơnõq adơi sơai sì ôh prah luơi avih dơgrữq kaya drơi hũ nữn ôh tũq halơi ngãq mơnuĩh mơgrũ kơu hũ. Sơrã la kaya kua mang siàp, nữn mơyah làiq sơrã kung lơhiãq kaya bãq, nữn nhũ ròq hũ tawơr ngãq ga nhũ bãq sì kaya hagĩq wỡq? Nhũ ôh dòq hũ kua hagĩq pơweh sì hlùq kung ôh pioh ngãq khãq. Mơnuĩh nữn aràc mĩn prah luơi nhũ pãq blàc. Asơi hũ tơnĩa pioh hmỡq, iỡuq hmỡq vẽq.”

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.