Lu-ka 15

1Tũq nữn, avih dơgrữq mơnuĩh mãq jia sì mơnuĩh hũ dlàiq song trôh jẽq sì Pitrai pioh hmỡq Pitrai. 2Sì vloh, nữn avih dơgrữq mơnuĩh Pha-ri-si sigỡuq sì dơgrữq mơnuĩh gơnuar pơto voh-va song buah đơp mơ-mõn làiq: “Mơnuĩh nĩ tồq ròq mơnuĩh hũ dlàiq dơnũh, nữn bõc sigỡuq sì pơnõq nhũ.”

3Yơu nữn la Pitrai akhàt pơnuaĩq pa-mơyơu nĩ ga pơnõq nhũ, làiq: 4“Mơnuĩh halơi dơlãp pơnõq ung hũ sa rơtôh drơi anàq avo, nữn tũq kađòc lơhiãq sa drơi dơlãp katih nữn, vloh ôh luơi wỡq salơpãn plôh salơpãn drơi dih pãq anĩh blàc suà sì nao duah anàq avo lơhiãq tãl trôh tũq duah bôh nhũ? 5Tũq song duah bôh vloh, mơnuĩh nữn sơh sơr gơlãp nhũ pãq dlòc vrã nhũ. 6Wỡq mai trôh sàc, mơnuĩh nữn iơu gỡuq mayơu sì mơnuĩh jẽq phia drơi trôh pơtõm wỡq, đơp sì pơnõq nhũ: ‘Iỡuq uỗt sơh sigỡuq sì kơu, kơyua kơu song duah bôh anàq avo kađòc lơhiãq nhũ hũ.’ 7Kơu đơp sì pơnõq ung thơu làiq kung yơu nữn, ròq hũ kaya uỗt sơh pãq dlòc lơngĩq mưng sa aràc mơnuĩh hũ dlàiq thơu mơvai tlàq dlàiq, rlao la mưng salơpãn plôh salơpãn mơnuĩh tơpãq dãng sì ôh hũ mơvai tlàq dlàiq.

8Hẽla hũ mơnuĩh kamơi halơi hũ sa plôh tleh jĩn, ngãq lơhiãq sa tleh jĩn, nữn ôh tôĩq đeng, vah sàc sì rãn prãn duah gơnĩt tãl trôh tũq duah bôh? 9Tũq song duah bôh vloh, sơai kamơi nữn iơu jàq gỡuq mayơu, sì lơgar palơi mơnuĩh jẽq phia trôh, sì đơp làiq: ‘Iỡuq sơh sơr sigỡuq sì hlãq, kơyua hlãq song duah bôh tleh jĩn sì hlãq ngãq lơhiãq.’ 10Kung yơu nữn, kơu đơp sì pơnõq ung, ròq hũ kaya sơh sơr pãq anãq dơgrữq mơnuĩh gơnrơh Yàc Pô Lơngĩq hũ mưng sa aràc mơnuĩh hũ dlàiq thơu mơvai tlàq dlàiq.”

11Hadơi nữn, Pitrai đơp: “Sa aràc mơnuĩh dih hũ dua aràc anàq lakơi, 12mơnuĩh adơi đơp sì ama: ‘Ơ ama, lakơu vrơi ga anàq vơnah kaya mơnã pơweh sì anàq.’ Sì ung pa-mơpha kaya mơnã drơi ga pơnõq nhũ. 13Hadơi nữn, iãq ôh hadùp harơi, tũq song duah pơtõm dơgrữq kaya, mơnuĩh anàq talôĩq tơviãq nao lơgar ơtah, nữn dòq nhũ angui bõc mơ-ĩn pròc preh avih kaya mơnã jĩn priãq nhũ hũ sì hadiuq ngãq nao kaya lĩng lang. 14Dơlãp tũq nhũ song angui avih kaya mơnã vloh, nữn hũ sa kaya ờq lơpa prõc viãq trôh vãq lơgar nữn, vloh nhũ kađòc pãp kaya siẽuq sier. 15Vloh nhũ nao ngãq ơpah ga sa aràc mơnuĩh vual dơlãp lơgar nữn, sì mơnuĩh pô pơđar nhũ tơviãq blàc hama mơnuĩh nữn pioh dlãc vơvui. 16Nhũ mơhao bõc mãq kađoh rơtàq la kaya vơvui ãn dòq bõc, nữn ôh asơi vrơi ga nhũ bõc. 17Nữn tũq nhũ ãn sơdor wỡq mưng rùp nhũ, nữn nhũ đơp: ‘Thơu hadùp aràc mơnuĩh ngãq ơpah ga ama drơi hũ kaya bõc dơlah dơlài, dòq kơu jẽq sì mơtai lơpa ờq pãq đĩ! 18Hadơi sì tũq tơgùq dữc, kơu ròq mai wỡq pãq ama kơu hũ, sì kơu ròq đơp sì ama làiq: “Ơ ama, anàq song sỗq dlàiq jơdrãq sì lơngĩq sì pãq anãq ama. 19Anàq ôh đang mang ngãq anàq ama wỡq tơra. Lakơu ama ngãq ga anàq yơu sa aràc mơnuĩh ngãq ơpah ga ama.”’ 20Sì tũq ròq tơgùq dữc, nhũ mai wỡq pãq ama nhũ. Nữn tũq nhũ dòq mưng ơtah, ama nhũ iãq bôh nhũ sì ung hũ hatai anĩt anar, vloh đuaĩq trôh jẽq, ung gùq kuar tơkuai nhũ sì chũm nhũ. 21Tũq nữn, mơnuĩh anàq đơp sì ama: ‘Ơ ama, anàq song sỗq dlàiq sì lơngĩq sì pãq anãq ama. Anàq ôh đang mang hũ angãn la anàq ama wỡq tơra.’ 22Nữn mơnuĩh ama đơp sì dơgrữq mơnuĩh halỗt mơnãq nhũ: ‘Iỡuq sơmar va ao ơtah siàp rlao avih pa-chồq ga nhũ, pa-vuh krãh tơmã tơngãn nhũ, sì juãq chơkhõq tơmã tơkai nhũ. 23Iỡuq mãq anàq lơmo lơmãq, ngãq rơlo nhũ, sì pơnõq drơi ngãq adãt ròq pồq bõc uỗt sơh. 24Kơyua anàq lakơi nĩ kơu hũ song mơtai nữn song hadiuq wỡq, nữn song lơhiãq sì ròq duah bôh.’ Vloh pơnõq nhũ ngãq adãt bõc uỗt sơh. 25Nữn anàq lakơi prõc ung hũ ãn dòq pãq blàc hama sì tũq mai wỡq, sơai mai jẽq trôh sàc, nhũ hmỡq sãp kanhĩ adoh, sì tãm-ya. 26Iơu nhũ sa aràc mơnuĩh halỗt mơnãq wỡq, sơai tơnĩa vruãq nĩ la hayơu. 27Mơnuĩh halỗt mơnãq drơ sì sơai làiq: ‘Adơi lakơi sơai mai wỡq sì ama sơai pơđar ngãq rơlo lơmo anàq lơmãq, kơyua mưng ung tồq ròq nhũ nữn mai wỡq sàc dadu lơngai.’ 28Bôh làiq, mơnuĩh anàq kơchoa tơgùq nong, sơai nữn ôh ưng tơmã dơlãp sàc, sì ama nhũ tơviãq paluơ padờp sơai. 29Nữn tũq drơ wỡq, sơai nữn đơp sì ama nhũ: ‘Ama iãq, anàq duh vruãq dơlãp hadùp thũt, sì anàq, ka-ôh tũq halơi iãq lơđãp vruãq ngãq gơnĩt halơi ama hũ, sì ama ôh tũq halơi vrơi ga anàq sa drơi vơve dãm pioh anàq pơlih ngãq adãt bõc uỗt sơh sigỡuq sì ban mayơu anàq, 30nữn tũq anàq ama nữn ama hũ ròq mai wỡq, la anàq song ngãq lơhiãq avih kaya mơnã ama hũ sigỡuq sì mơnuĩh kamơi ngãq drì drõc, nữn ama ròq vrơi ngãq rơlo lơmo anàq lơmãq pơyãq nhũ.’ 31Vloh nữn mơnuĩh ama đơp sì nhũ: ‘Ơ anàq, anàq miẽt dòq sì ama gãm, sì avih dơgrữq kaya hagĩq la kaya ama hũ la kaya anàq hũ. 32Nữn viãq la đang mang pioh ngãq adãt pồq kaya bõc sì mơnhũm uỗt sơh, kơyua adơi lakơi anàq hũ nĩ song mơtai nữn nĩ hadiuq wỡq, song lơhiãq thĩt nữn nĩ vloh duah bôh wỡq.’”