Lu-ka 16

1Pitrai kung đơp sì dơgrữq mơnuĩh mơgrũ: “Hũ sa aràc mơnuĩh mơda dih la mơnuĩh pô apãt akõq sàc sì nhũ nữn kađòc yãq sì pô kơyua angui prõc preh kaya mơnã pô hũ. 2Hadơi sì tũq iơu nhũ trôh, pô đơp sì nhũ: ‘Vruãq hlãq hmỡq mững sơai la hayơu? Iỡuq va tơviãq pơnuaĩq akhàt mưng vruãq iãq mững sơai hũ, kơyua sơai ôh tũq halơi ngãq mơnuĩh apãt akõq iãq vruãq wỡq tơra.’ 3Vloh nữn mơnuĩh apãt akõq sàc sơnơng đơp krơi sì nhũ: ‘Kơu iỡuq ngãq hagĩq nĩ, kơyua pô kơu ãn pa-lơhiãq gơnuar vruãq apãt akõq kơu hũ? Chõh hlùq nữn kơu ôh tãl prãn, nao yòc lakơu nữn malơu. 4Kơu thơu kơu iỡuq ngãq hagĩq tũq kađòc pơtiãuq tơtlah mưng vruãq apãt akõq nĩ, aràc ròq va kơu wỡq pãq sàc pơnõq nhũ.’ 5Vloh hadơi sì tũq vrơi iơu avih dơgrữq aràc mơnuĩh kađòc srẽ mơnuĩh pô nhũ trôh, nhũ nữn đơp sì mơnuĩh chơmrờp làiq: ‘Sơai kađòc srẽ sì pô hlãq hadùp?’ 6Mơnuĩh nữn drơ: ‘Sa rơtôh thũng mơnhàq ô-liu.’ Yơu nữn la nhũ đơp sì mơnuĩh nữn: ‘Iỡuq mãq vơ-ar srẽ sơai hũ, dòq guh, sơmar wãq lơmã plôh!’ 7Patui wỡq, nhũ nữn tơnĩa sa aràc mơnuĩh tơmo: ‘Dòq sơai tơwãq srẽ hadùp?’ Mơnuĩh nữn drơ: ‘Sa rơtôh kadũc vơdai mi.’ Nhũ pơđar mơnuĩh nữn: ‘Apãt vẽq vơ-ar srẽ sơai hũ, sì wãq talơpãn plôh.’ 8Mơnuĩh pô mơyòp mơnuĩh apãt akõq sàc ôh tơpãq rĩng nữn kơyua mưng nhũ nữn song ngãq viãq jãc rgơi. Kơyua anàq mơnuĩh rài nĩ jãc rgơi rlao pơweh sì anàq tơcho kaya sơdah dơlãp rài pơnõq nhũ yơu nữn. 9Dòq pôgrũ đơp sì pơnõq adơi sơai, iỡuq ngãq ban mayơu ga drơi mưng jĩn kaya ôh tơpãq rĩng, pioh tũq halơi kaya mơnã nữn avih, pơnõq nhũ pơlih tồq ròq pơnõq adơi sơai tơmã anĩh dòq gãm gãm. 10Mơnuĩh halơi tui tơpãq dơlãp vruãq tìt tiu nữn kung tui tơpãq dơlãp vruãq prõc sì asơi ôh tui tơpãq dơlãp vruãq tìt tiu nữn kung ôh tui tơpãq dơlãp vruãq prõc mĩn. 11Kơyua yơu nữn, mơyah làiq pơnõq adơi sơai ôh đang sì tơviãq jỡc chãc gơnang tui tơpãq dơlãp vruãq kaya mơnã ngãq ôh tơpãq rĩng, nữn ôh asơi ròq pơjao ga pơnõq adơi sơai kaya mơnã viãq? 12Sì mơyah làiq pơnõq adơi sơai ôh tơviãq jỡc sì chãc gơnang tui tơpãq dơlãp dơgrữq vruãq pơweh sì mơnuĩh tơmo, asơi ròq pơjao ga pơnõq adơi sơai dơgrữq kaya hagĩq pơweh sì pơnõq adơi sơai? 13Ôh hũ sa aràc mơnuĩh halỗt mơnãq halơi pơlih duh vruãq dua pô, kơyua halỗt mơnãq nữn ròq mơvai mơnuĩh nĩ sì anĩt duman mơnuĩh dih, hẽla nhũ ròq salơnuãq sì mơnuĩh nĩ nữn iãq ôh srãp mơnuĩh dih. Pơnõq adơi sơai pơlih ôh tũq halơi duh vruãq Yàc Pô Lơngĩq sigỡuq sì jĩn priãq sì kaya mơnã jỡc.”

14Tũq nữn, dơgrữq mơnuĩh Pha-ri-si, la dơgrữq mơnuĩh ham khiãng jĩn priãq, hmỡq avih dơgrữq pơnuaĩq nữn, nữn pơnõq nhũ tlao siẽq siẽl Pitrai. 15Pitrai đơp sì pơnõq nhũ: “Pơnõq ung la mơnuĩh mãq angãn rùp drơi la tơpãq dãng pãq anãq anàq mơnuĩh, nữn Yàc Pô Lơngĩq thơu hatai pơnõq ung. Kơyua nữn la kaya dlòc mơ-àc mơyàc pãq khrãh anàq mơnuĩh nữn la kaya kir amir pãq anãq Yàc Pô Lơngĩq. 16Voh-va sì dơgrữq pơnuaĩq gơnuar hwơr la tãl trôh rài Jãng hũ. Mưng nữn wỡq sa hadơi, lơgar Yàc Pô Lơngĩq hũ akhàt pa-tơviãq, sì avih dơgrữq aràc mơnuĩh pơgùq prãn pioh tơmã pãq đỡn. 17Nữn viãq la buôt rlao ga lơngĩq sì tơnãh tơviãq jỡc lơhiãq thĩt, dòq siàp rlao la sa voh akhar dơlãp kaya voh-va tơviãq jỡc ôh kuơ.

18Avih dơgrữq aràc halơi tlàq luơi sơdiuq drơi sì khiãng mơnuĩh tơmo nữn sỗq dlàiq drì drõc, aràc asơi khiãng kamơi song kađòc tlàq luơi sì vơsàc nữn kung sỗq dlàiq drì drõc.

19Hũ sa aràc mơnuĩh mơda dih, ung nữn chồq ao ia lơngãt sì pơcha lơmuỡn siàp, dơgrữq harơi, adãt bõc mơnhũm sơh sơr bõc mơ-ĩn. 20Dòq sa aràc mơnuĩh rơbah rơbờp dih angãn La-sa-rơ, rùp phàp vãq lơkà-lơkiãq, hũ aràc va chẽq pãq lơniãu sơvòq bãc sàc mơnuĩh mơda, 21sì chơkhãq khiãng hũ bõc dơgrữq kaya hõq pãq dlòc ban mơnuĩh mơda. Bôh làiq, mĩn hũ tơpuôl asơu trôh liah lơka sơai nữn. 22Vloh vruãq hadơi nữn la mơnuĩh rơbah rơbờp mơtai, sì nhũ hũ mơnuĩh gơnrơh va nao chẽq pãq dơda A-bra-ham. Hadơi mơnuĩh mơda kung mơtai sì hũ aràc va nao dor. 23Dơlãp anĩh tơnãh ala, ãn dòq dơlãp kaya pơđìq pơđua, tũq nhũ angơìq mơta nhũ iãq pãq dlòc, ung nữn bôh A-bra-ham dòq mưng ơtah, sigỡuq sì La-sa-rơ dòq dơlãp dơda nhũ. 24Hũ sãp priãu tơgùq làiq, ung nữn đơp: ‘Ơ ung kõq A-bra-ham kơu hũ, lakơu anĩt anar anàq sì lakơu iỡuq pơđar La-sa-rơ pioh sơai nữn irũq tơđiãc tơngãn nhũ tơmã ia sì ngãq ga dơlah anàq, kơyua anàq pơđìq pơđua viãq dơlãp apôi nĩ.’ 25Nữn A-bra-ham drơ: ‘Ơ anàq, iỡuq sơdor làiq dơlãp tũq pơnõq anàq dòq hadiuq, anàq song tồq hũ vơnãh siàp drơi hũ, sì yơu La-sa-rơ nữn tồq lũ kaya dleh dlàr. Nữn tũq nĩ nhũ nữn hũ paluơ padờp pãq đĩ, dòq anàq iỡuq ãt pơđìq pơđua. 26Sigỡuq sì avih dơgrữq vruãq nữn, dòq pãq khrãh pơnõq drơi sì anàq hũ sa anĩh thòc dơlãp prõc viãq, hayơu vrơi ga mơnuĩh halơi ưng gãt tơpa mưng nĩ trôh anĩh anàq la ôh tũq halơi jỡc, kung ôh tũq halơi gãt tơpa mưng gah dih trôh anĩh gah pơnõq drơi jỡc.’ 27Yơu nữn mơnuĩh mơda đơp: ‘Ơ ung kõq, nữn yơh anàq rãn lakơu ung làiq ung pơlih pơđar sơai nữn trôh sàc ama anàq hũ — 28kơyua anàq hũ lơmã aràc adơi sơai — pioh sơai nữn ngãq chưng pa-thơu ga pơnõq nhũ, ngãq hayơu ga pơnõq nhũ kung pơlih ôh nao trôh tơmã anĩh pơđìq pơđua nĩ.’ 29Nữn A-bra-ham drơ: ‘Pơnõq nhũ hũ Môi-se sì dơgrữq mơnuĩh gơnuar hwơr; pơnõq nhũ iỡuq hmỡq tui dơgrữq mơnuĩh nữn!’ 30Yơu nữn, mơnuĩh mơda drơ: ‘Ôh iỡuq yơu nữn, Ơ ung kõq A-bra-ham, gơlàiq wỡq, mơyah làiq asơi nữn mưng kaya mơtai trôh sì pơnõq nhũ, nữn pơnõq nhũ ròq mơvai tlàq dlàiq.’ 31Nữn A-bra-ham đơp sì ung nữn: ‘Mơyah làiq pơnõq nhũ ôh hmỡq Môi-se sì dơgrữq pitao gơnuar hwơr, nữn bôh làiq mơnuĩh halơi nữn mưng kaya mơtai hadiuq wỡq, pơnõq nhũ kung ôh pãc.’”