Vruãq 4

1Dơlãp tũq Pier sì Jãng ãn đơp sì vual vơla, dơgrữq mơnuĩh gơnuar duh talơvãt, gãm mơnuĩh iãq jàc sàc duh talơvãt sì mơnuĩh Sa-đu-se dơvruh dơvrah trôh, 2pơnõq nhũ viãq nõng hatai kơyua Pier sì Jãng ãn dòq pơto pơđar vual vơla sì akhàt vrơi pa-thơu kaya hadiuq wỡq mưng kaya mơtai dơlãp Yàc Je-su. 3Yơu nữn la pơnõq nhũ mãq dua aràc mơnuĩh nữn krỡq tơmã sàc jam chàc tãl trôh mư-ờp harơi hadơi, kơyua tũq nữn song mơlãp vloh. 4Nữn hũ lũ mơnuĩh hmỡq pơnuaĩq pơto nữn song pãc-tui; sì katih dơgrữq mơnuĩh lakơi la pơgãp lơmã rơvơu aràc.

5Vruãq tơviãq trôh dơlãp harơi hadơi, mơnuĩh gơnuar apãt akõq pơnõq nhũ sigỡuq sì dơgrữq mơnuĩh pô tơha gãm sì dơgrữq mơnuĩh gơnuar pơto voh-va pơtõm gỡuq wỡq pãq Je-ru-sa-lem, 6gãm sì mơnuĩh gơnuar pioh kaya duh talơvãt prõng An-ne sigỡuq sì Kai-phe, Jãng, A-lec-san-đơ sì avih dơgrữq mơnuĩh pơweh sì apõc pơtiàt mơnuĩh gơnuar pioh kaya duh talơvãt prõng. 7Hadơi sì tũq song va Pier sì Jãng tơviãq pabôh mơta di anãq drơi, pơnõq nhũ tơnĩa dua aràc mơnuĩh nữn: “Kơyua mưng gơnuar chơnuãq halơi, hẽla mãq angãn asơi nữn pơnõq ung song ngãq vruãq nữn?” 8Dơlãp tũq nữn, kơyua Pier hũ vãq srẽ Yàc Vơngãq Sơđah, drơ wỡq sì pơnõq nhũ: “Pa-thơu dơgrữq mơnuĩh gơnuar apãt akõq sì dơgrữq mơnuĩh pô tơha, 9mơyah làiq harơi nĩ pơnõq hlãq kađòc tơnĩa mưng vruãq siàp song ngãq ga sa aràc mơnuĩh ruãq, làiq gơnang mưng halơi mơnuĩh nữn song hũ pasồq pakhơĩh, 10nữn nĩ la kaya avih dơgrữq pơnõq ung sì avih vual vơla Is-ra-el iỡuq thơu, làiq mãq angãn Yàc Dõc Pơ-tlah Je-su mơnuĩh Na-sa-ret, Pitao nữn pơnõq ung song pỡc đĩn pãq dlòc kayơu pỡc, Pitao nữn Yàc Pô Lơngĩq ngãq ga hadiuq wỡq mưng kaya mơtai, nữn la gơnang mưng Pitrai nữn mơnuĩh nĩ dòq dỡc prãn khãc di anãq pơnõq ung. 11Yàc Dõc Pơ-tlah Je-su la voh patơu kađòc tlàq luơi kơyua dơgrữq mơnuĩh vỡq padỡc pơnõq ung, nữn vloh hũ tơviãq jỡc voh patơu akiãc sàc. 12Ôh hũ kaya dõc pơ-tlah halơi dơlãp anĩh mơnuĩh tơmo, kơyua dòq pãq ala lơngĩq, ôh hũ angãn halơi tơmo hũ vrơi ga anàq mơnuĩh pioh pơnõq drơi iỡuq gơnang mưng nữn hũ dõc pơ-tlah.”

13Tũq pơnõq nhũ bôh kaya chãc khĩn Pier sì Jãng hũ, kung yơu iãq thơu dua aràc ung mĩn la dơgrữq mơnuĩh ôh hũ nao mơgrũ sì mơnuĩh vual, nữn pơnõq nhũ mãq ngãq krơi, pơnõq nhũ kung thơu kơnãl dua aràc song gãm dòq sigỡuq sì Yàc Je-su. 14Patui nữn, kơyua bôh mơnuĩh song hũ pasồq pakhơĩh dòq dỡc sigỡuq sì dua aràc ung, yơu nữn pơnõq nhũ ôh hũ pơnuaĩq hagĩq pioh jơdrãq pơjoh pơkhẽp jỡc. 15Tũq nữn, hadơi sì tũq vrơi gơnuar ga dơgrữq mơnuĩh gơnuar pơđar tơviãq tlah mưng anĩh pô chahrơna, pơnõq nhũ dòq vơyai sigỡuq, 16Pơnõq nhũ đơp: “Pơnõq drơi ròq ngãq hagĩq sì dơgrữq mơnuĩh nĩ? Kơyua, viãq, dơgrữq mơnuĩh hadiuq pãq Je-ru-sa-lem kung thơu nĩq nũn pơnõq nhũ song ngãq sa kaya krơi tơmo, sì drơi ôh tũq halơi kơmlah luơi kaya nữn jỡc. 17Bôh làiq yơu nữn, pioh vruãq nĩ ôh tiẽng dơnãi tơviãq pơtãl di khrãh vual vơla tơra, pơnõq drơi iỡuq mãq pakỡuq pơnõq nhũ juơi ngãq patui mãq angãn nĩ pơto akhàt ga dơgrữq aràc asơi wỡq.” 18Yơu nữn, pơnõq nhũ iơu Pier sì Jãng tơmã, pơđar pakỡuq dua aràc ôh mãq angãn Yàc Je-su đơp tơviãq hẽla pơto akhàt hagĩq tơra. 19Nữn Pier sì Jãng drơ wỡq sì pơnõq nhũ, làiq: “Pơnõq ung iãq pơweh gơnĩt hayơu iỡuq mĩn di anãq Yàc Pô Lơngĩq vloh pãc sãp pơnõq ung hẽla pãc sãp Yàc Pô lơngĩq? 20Kơyua pơnõq hlãq ôh tũq halơi vloh ôh đơp mưng dơgrữq kaya pơnõq hlãq song bôh sì hmỡq.” 21Nữn vloh, hadơi sì tũq pơhĩ pakỡuq Pier sì Jãng, pơnõq nhũ pơrlao ga dua aràc nhũ nao. Pơnõq nhũ ôh duah hũ pơnẽq hagĩq pioh ngãq dlàiq dua aràc kơyua mưng vual vơla, kơyua aràc asơi kung sơ-uỗt mơyòp Yàc Pô Lơngĩq mưng vruãq song tơviãq jỡc. 22Kơyua mơnuĩh lakơi dih, mơnuĩh nữn kaya krơi tơmo pasồq pakhơĩh nĩ tơviãq jỡc, nữn song rlao pàq plôh thũt.

23Hadơi sì tũq hũ pơrlao tơviãq, Pier sì Jãng nao trôh pãp adơi sơai drơi sì akhàt wỡq dơgrữq kaya nữn dơgrữq mơnuĩh gơnuar pioh kaya duh talơvãt prõng sì dơgrữq mơnuĩh gơnuar pô tơha song đơp sì pơnõq nhũ. 24Dơlãp tũq song hmỡq pơnuaĩq nữn, pơnõq nhũ sa hatai sigỡuq pơh sãp iơu lakơu sì Yàc Pô Lơngĩq, làiq: “Talơvãt Yàc, Pitrai la Pitao song chrơng pajỡc dơgrữq tãl lơngĩq, tơnãh sì ia tơsìq, sigỡuq sì avih dơgrữq kaya dòq dơlãp nữn, 25la Pitao, mưng ung kõq pơnõq hlãq kơyua mưng Yàc Vơngãq Sơđah, mưng mơvah chơbuai Đa-vit halỗt mơnãq Pitrai, song đơp làiq:

‘Kơyua hayơu dơgrữq vual vơla lơniãu ơnõc mơvai,

sì dơgrữq vual vơla vơyai pơnẽq savĩq ôh kuơ?

26Dơgrữq pitao pãq dlòc voh tơnãh tơgùq dỡc,

sì dơgrữq pô apãt akõq pơtõm gỡuq

jơdrãq sì Yàc, jơdrãq sì Pitao ãt pavuh mơnhàq Pitrai hũ.’

27Viãq, gãm He-rôt sì Bôn-sơ Phi-lat, sigỡuq sì dơgrữq vual vơla lơniãu sì vual vơla Is-ra-el, song pơtõm wỡq gỡuq dơlãp palơi nĩ jơdrãq wỡq sì halỗt mơnãq sơchih Pitrai hũ la Je-su, Pitao nữn Pitrai pavuh mơnhàq, 28pioh ngãq tơviãq dơgrữq vruãq nữn tơngãn Pitrai sì dãq lơnãq Pitrai hũ song ngãq gơnĩt hlơu ròq tơviãq jỡc. 29Tũq nĩ, ơ Yàc, lakơu iỡuq iãq pơweh dơgrữq pơnuaĩq pơhĩ pa-huaĩq pơnõq nhũ hũ sì lakơu vrơi ga dơgrữq halỗt mơnãq Pitrai hũ pơto akhàt pơnuaĩq Pitrai sì avih dơgrữq kaya chãc khĩn, 30dơlãp tũq Pitrai yơr tơngãn Pitrai tơviãq pioh pasồq pakhơĩh, dơgrữq nỡm krơi sì dơgrữq vruãq krơi tơmo hũ tơviãq trôh gơnang di angãn Halỗt Mơnãq sơchih Pitrai hũ, la Yàc Je-su.” 31Tũq pơnõq nhũ song iơu lakơu vloh, anĩh nữn pơnõq nhũ ãn pơtõm gỡuq kađòc sơđô mơgơi, vloh avih dơgrữq tãl aràc pơnõq nhũ nữn hũ vãq sơrè Yàc Vơngãq Sơđah sì đơp tơviãq pơnuaĩq Yàc Pô Lơngĩq hũ savĩq chãc khĩn.

32Tũq nữn, lũ mơnuĩh pãc-tui nữn pơnõq nhũ kung hũ sa hatai salơnuãq sigỡuq. Ôh asơi iãq sa kaya halơi drơi hũ la kaya krơi di gỡuq, nữn pơweh sì pơnõq nhũ, avih dơgrữq kaya la vrơi pa-mơpha sigỡuq. 33Mưng gơnuar chơnuãq prãn khãc, dơgrữq mơnuĩh gơnuar pơđar akhàt vrơi pa-thơu pơnuaĩq ngãq chưng drơi mưng kaya hadiuq wỡq Yàc Je-su hũ, sì asơi dơlãp pơnõq nhũ kung hũ dơlah dơlai kaya anĩt Yàc. 34Dơlãp tơpuôl nhũ ôh hũ mơnuĩh rơbah siẽuq halơi, kơyua avih dơgrữq mơnuĩh hũ tơnãh rơya hẽla sàc anĩh kung pa-vlơi avih sì va trôh jĩn song pa-vlơi hũ, 35vloh chẽq pãq ala tơkai dơgrữq mơnuĩh gơnuar pơđar, sì jĩn nữn hũ pa-mơpha vrơi ga dơgrữq tãl aràc tui yơu mơnuĩh hũ kaya angui halơi nữn.

36Tũq nữn, Jô-sep, mơnuĩh song hũ dơgrữq mơnuĩh gơnuar pơđar iơu angãn la Ba-na-ba, (gơtha la Anàq Kaya Paluơ Padờp), la sa aràc mơnuĩh Le-vi, vual vơla Chip-rơ, 37hadơi sì tũq pa-vlơi avih blàc hamã drơi hũ, nữn ung song va jĩn trôh chẽq pãq ala tơkai dơgrữq mơnuĩh gơnuar pơđar.