Vruãq 5

1Tũq nữn, hũ sa aràc mơnuĩh dih angãn la A-na-nia, sigỡuq sì sơdiuq drơi la Sa-phi-ra, pa-vlơi savĩq tơnãh, 2vloh nhũ apãt pioh ga drơi sa vơnah mưng jĩn pa-vlơi nữn (mơnuĩh sơdiuq kung thơu vruãq nữn), hadơi sì tũq va sa vơnah dih trôh chẽq pãq ala tơkai dơgrữq mơnuĩh gơnuar pơđar. 3Nữn Pier tơnĩa: “Nĩ, A-na-nia, hayơu kamlai Sa-tan tơmã dòq dơlãp hatai sơai ngãq ga sơai đơp vlữq sì Yàc Vơngãq Sơđah nữn apãt pioh wỡq ga drơi mưng sa vơnah jĩn pa-vlơi savĩq tơnãh nữn? 4Tũq hlùq tơnãh dòq nữn, ôh iỡuq mĩn la kaya sơai hũ, sì hadơi sì tũq pa-vlơi vloh, nhũ ôh iỡuq la pơweh di ala gơnuar sơai yơh? Ngãq hayơu nữn sơai vloh vơyai pơnẽq vruãq nĩ dơlãp hatai drơi? Viãq, ôh iỡuq sơai đơp pa-gơla anàq mơnuĩh ôh yơh, nữn la sì Yàc Pô Lơngĩq.” 5Nữn vloh, hadơi sì tũq A-na-nia hmỡq dơgrữq pơnuaĩq nữn, nhũ tloh yuà nữn lơvuh trỗt, sì kaya kơtuãq huaĩq viãq pa-trỗt ga avih dơgrữq aràc hmỡq thơu vruãq nĩ. 6Tũq nữn, dơlãp tũq song tơgùq dỡc, dơgrữq mơnuĩh dãm pơpòq pơcha gãp rùp atơu mơtai sì chơkồc va nao dor.

7Nữn vruãq tơviãq trôh pơgãp tlơu tũq hadơi nữn, sơdiuq nhũ yàp tơmã, ôh ka thơu gĩq mưng vruãq song tơviãq trôh. 8Pier tơnĩa sơdiuq nhũ: “Iỡuq đơp ga hlãq thơu iỡuq mĩn pơnõq sơai song pa-vlơi savĩq tơnãh hũ kor nữn jĩn hẽla ôh iỡuq?” Sơdiuq nhũ drơ: “Viãq, hũ mĩn du nữn.” 9Yơu nữn vloh Pier đơp sì sơdiuq nhũ: “Ngãq hayơu vruãq nữn vloh dua aràc sơai nữn sa hatai sigỡuq pioh lòc Vơngãq Sơđah Yàc hũ? Dih, plàq tơkai dơgrữq mơnuĩh song dor vơsàc sơai ãn dòq gah lơniãu bãc, sì pơnõq nhũ kung ròq va sơai nao dor wỡq.” 10Mư tũq nữn, nhũ lơvuh trỗt pãq ala tơkai ung Pier sì tloh yuà. Dơlãp tũq dơgrữq mơnuĩh dãm yàp tơmã, bôh nhũ song mơtai, nữn chơkồc va nhũ nao, dor jẽq gah vơsàc drơi. 11Kaya huaĩq tơtơh prõng viãq pa-trỗt pãq dlòc vãq avih Sàc Pơjũm Sơđah sì pãq dlòc avih dơgrữq mơnuĩh halơi hmỡq trôh vruãq nĩ.

12Tũq nữn, hũ lũ kaya krơi tơmo sì vruãq krơi tơmo tơviãq trôh di khrãh dơlãp vual vơla mưng plàq tơngãn dơgrữq mơnuĩh gơnuar pơđar hũ, avih dơgrữq tãl aràc pơnõq nhũ hũ sa hatai pơtõm gỡuq pãq Sơvòq Bãc Rơjàp Sa-lô-môn. 13Nữn ôh hũ mơnuĩh halơi tơmo dơlãp katih dòq wỡq khĩn pa-tơmã sì tơpuôl nhũ, bôh làiq vual vơla iãq kuơ màc viãq pơnõq nhũ. 14Tũq nữn, brõq lũ mơnuĩh pãc-tui Yàc hũ pơtãl tơmã, hũ gãm mơnuĩh lakơi sì mơnuĩh kamơi lũ viãq ôh thơu karhia, 15vloh làiq tơviãq jỡc avih dơgrữq aràc va mơnuĩh ruãq chẽq pãq jơlàt, chẽq pađĩh pãq dlòc chơnang sì chiau, pioh tũq Pier nao gãt, nữn vơngãq ung kung hũ vơvãc kơ-rơwàc aràc asơi nữn dơlãp pơnõq nhũ. 16Hũ sa tơpuôl mơnuĩh lũ viãq trôh mưng dơgrữq palơi tòp dar Je-ru-sa-lem, va tui mơnuĩh ruãq sơkìq sì mơnuĩh kađòc kamlai ngãq pahanh, nữn avih dơgrữq pơnõq nhũ kung hũ pasồq pakhơĩh.

17Nữn mơnuĩh gơnuar pioh kaya duh talơvãt prõng tơgùq dỡc, sigỡuq sì avih dơgrữq mơnuĩh tui nhũ (la dơgrữq mơnuĩh pơweh sì gah Sa-đu-se) pơnõq nhũ tơgùq dỡc, vãq hatai lơmùq mơvai gỡuq, 18vloh dơgrữq mơnuĩh nữn yor tơngãn apãt mãq dơgrữq mơnuĩh gơnuar pơđar sì krỡq pơnõq nhũ tơmã dơlãp sàc jam krỡq sigỡuq. 19Nữn yơh dơlãp mơlãp, sa aràc mơnuĩh gơnrơh Yàc hũ song pơh bãc sàc jam va pơnõq nhũ tơviãq, sì hakơi: 20“Nao vẽq, hadơi sì tũq dòq dỡc dơlãp sàc duh talơvãt, iỡuq pơto akhàt ga vual vơla dơgrữq pơnuaĩq kaya hadiuq nĩ hũ.” 21Tũq hmỡq yơu nữn, pơnõq nhũ nao tơmã sàc duh talơvãt dơlãp tũq rìc sơdah sì pơto akhàt. Tũq nữn, mơnuĩh gơnuar pioh kaya duh talơvãt prõng sigỡuq sì dơgrữq mơnuĩh nao tui ung nữn mai trôh, pơnõq nhũ iơu pơtõm Tơpuôl Pơjũm sì avih dơgrữq mơnuĩh pô tơha dơlãp vual vơla Is-ra-el, vloh pơđar mơnuĩh nao trôh sàc jam pioh va dơgrữq mơnuĩh gơnuar pơđar mai. 22Nữn dơlãp tũq trôh anĩh, dơgrữq mơnuĩh lĩng iãq jàc ôh bôh pơnõq nhũ dơlãp sàc jam, yơu nữn gơlàiq mai wỡq, sì akhàt pa-thơu, 23làiq: “Pơnõq hlãq bôh sàc jam song krỡq kơjãp sì hũ lĩng iãq jàc dòq dỡc lơniãu bãc, nữn hadơi sì tũq pơh tơviãq, pơnõq hlãq iãq ôh bôh asơi dòq pãq gah dơlãp nữn ôh.” 24Tũq nữn, tũq mơnuĩh apãt akõq sàc duh talơvãt sì dơgrữq mơnuĩh pioh kaya duh talơvãt prõng hmỡq dơgrữq pơnuaĩq nữn, pơnõq nhũ sawĩ sawỡn viãq mưng kaya song tơviãq trôh nữn, ngãq hayơu vruãq yơu nữn vloh pơlih tơviãq jỡc. 25Nữn vloh, hũ sa aràc mơnuĩh halơi nữn, mai trôh akhàt sì pơnõq nhũ làiq: “Iỡuq trôh iãq, dơgrữq mơnuĩh nữn pơnõq ung krỡq tơma sàc jam tũq nĩ ãn dòq dỡc dơlãp sàc duh talơvãt pơto akhàt vual vơla!” 26Hadơi nữn mư, pô apãt akõq lĩng nao sigỡuq sì dơgrữq mơnuĩh lĩng iãq jàc, sì va pơnõq nhũ mai, nữn ôh angui kaya poh atòc, kơyua huaĩq vual vơla prah patơu. 27Tũq song va dơgrữq mơnuĩh gơnuar pơđar mai, dơgrữq mơnuĩh va pơnõq nhũ dòq dỡc di khrãh Anĩh Chahrơna, vloh mơnuĩh gơnuar pioh kaya duh talơvãt prõng tơnĩa khao pơnõq nhũ, 28làiq: “Pơnõq hlãq song vrơi gơnuar pakỡuq pơnõq ung mãq angãn nữn sì pơto akhàt, iãq dih, pơnõq ung vloh ngãq ga Je-ru-sa-lem vãq sơrè kaya pơto pơđar drơi, sì pơnõq ung ưng va dơrãh mơnuĩh nĩ hũ tôh pãq dlòc pơnõq hlãq.” 29Nữn Pier sì dơgrữq mơnuĩh gơnuar pơđar drơ wỡq: “Iỡuq pãc sãp Yàc Pô Lơngĩq rlao la pãc sãp anàq mơnuĩh. 30Yàc Pô Lơngĩq ung kõq pơnõq drơi hũ song ngãq ga Yàc Je-su hadiuq wỡq, Pitrai la Pitao nữn tơpuôl ung song pa-mơtai, song ơteh pãq dlòc kayơu pỡc. 31Yàc Pô Lơngĩq song va Pitrai tơgùq dòq pãq gah hơnuãq drơi Pioh ngãq Pitao sì Pitao Dõc Pơ-tlah pioh vrơi kaya mơvai tlàq dlàiq ga Is-ra-el sigỡuq sì kaya tơleh dlàiq. 32Pơnõq hlãq la mơnuĩh ngãq chưng dơgrữq vruãq nĩ hũ, sigỡuq sì Yàc Vơngãq Sơđah, Pitao nữn Yàc Pô Lơngĩq song vrơi ga mơnuĩh pãc sãp Pitrai.”

33Tũq dơgrữq mơnuĩh dơlãp tơpuôl chahrơna hmỡq pơnuaĩq nữn, pơnõq nhũ ơnõc mơvai viãq sì ưng pa-mơtai dơgrữq mơnuĩh gơnuar pơđar. 34Tũq nữn, hũ sa aràc dơlãp tơpuôl chahrơna, la sa aràc mơnuĩh Pha-ri-si, angãn la Ga-ma-li-en, la mơnuĩh pô pơto kaya voh-va, la mơnuĩh nữn vual vơla iãq ki ngãm, ung tơgùq dỡc pơđar-va dơgrữq mơnuĩh gơnuar pơđar tơviãq pãq lơniãu sa asĩt. 35Vloh ung đơp sì pơnõq nhũ:

“Ơ mơnuĩh Is-ra-el, iỡuq iãq gơrhia rùp phuỗt pơnõq ung mưng kaya nữn pơnõq ung ngãq ga mơnuĩh nĩ. 36Kơyua hlơu thrơi, Theu-đa tơgùq dỡc, angãn ga drơi la mơnuĩh mơ-àc mơyàc, katih mơnuĩh lakơi song tui nhũ pơgãp pàq rơtôh aràc, nữn nhũ song kađòc pa-mơtai vloh avih dơgrữq mơnuĩh hmỡq tui nhũ nữn kung gơprah gơprĩc, tơviãq jỡc ôh dòq hagĩq tơra. 37Hadơi nhũ, hũ Ju-đa mơnuĩh Ga-li-le tơgùq dỡc dơlãp tũq lơwah karhia katih vual vơla sì iơu jàq mơnuĩh tui drơi. Mơnuĩh nĩ kung mơtai, vloh avih dơgrữq mơnuĩh halơi ngãq tui nhũ nữn kung kađòc chơlah chơluỡn. 38Tũq nĩ nữn hlãq lakơu đơp sì pơnõq ung: Iỡuq pleh atah dơgrữq mơnuĩh nĩ sì tlàq luơi pơnõq nhũ, kơyua mơyah làiq vơyai pơnẽq nĩ hẽla vruãq ngãq nĩ la mưng pơjẽh anàq mơnuĩh hũ, nữn nhũ ròq kađòc pa-lơhiãq, 39nữn mơyah làiq vruãq nữn la mưng Yàc Pô Lơngĩq, nữn pơnõq ung ròq ôh tũq halơi pa-lơhiãq pơnõq nhũ, sì thơu yơh pơnõq ung vloh pơlih kađòc iãq la mơnuĩh ãn jơdrãq wỡq sì Yàc Pô Lơngĩq.” Yơu nữn la, tơpuôl nhũ hmỡq tui ung. 40Hadơi sì tũq pơnõq nhũ iơu dơgrữq mơnuĩh gơnuar pơđar tơmã, poh atòc vloh, pơnõq nhũ vrơi gơnuar pakỡuq ôh mãq angãn Yàc Je-su pơto akhàt tơra, vloh pơnõq nhũ pơrlao luơi nao.

41Yơu nữn, dơgrữq mơnuĩh gơnuar pơđar tơviãq nao tlah mưng tơpuôl chahrơna, uỗt sơh kơyua hũ angãn la đang mang ãt siẽq siẽl mưng Angãn Yàc. 42Dơgrữq harơi, dơlãp sàc duh talơvãt kung yơu mưng sàc nĩ trôh sàc dih, pơnõq nhũ ôh padơh sì pơto akhàt Pơnuaĩq Siàp — Je-su la Yàc Dõc Pơ-tlah.