Vruãq 6

1Dơlãp dơgrữq harơi nữn, tũq katih mơnuĩh mơgrũ bluãq pơtãl wỡq, nữn mơnuĩh Ju-đa đơp pơnuaĩq mơnuĩh Gơ-rec pơdòq kaya đơp rơbòp mưng mơnuĩh He-bơ-rơ, kơyua dơgrữq mơnuĩh kamơi vlơu pơnõq nhũ hũ kađòc tlàq luơi dơlãp vruãq pa-mơpha kaya bõc dơgrữq harơi. 2Yơu nữn, sa plôh dua aràc mơnuĩh gơnuar pơđar iơu pơtõm wỡq dơgrữq mơnuĩh mơgrũ lũ viãq sì đơp: “Pơnõq hlãq vloh tlàq luơi pơnuaĩq Yàc Pô Lơngĩq hũ pioh duh vruãq ban bõc nữn ôh iỡuq. 3Kơyua yơu nữn, ơ adơi sơai, lakơu iỡuq ruãh tơviãq di khrãh adơi sơai tơjuh aràc mơnuĩh lakơi hũ tiẽng dơnai siàp, vãq sơrè Yàc Vơngãq Sơđah sì jãc rgơi, pioh pơnõq hlãq pơlih pơjao gơnĩt rơchãc vruãq ngãq nĩ. 4Dòq pơnõq hlãq nữn ròq patui wỡq gãm dơlãp kaya iơu lakơu sì dơlãp gơnuar vruãq pơto akhàt pơnuaĩq Yàc.” 5Pơnuaĩq đơp nữn ngãq siàp hatai di anãq avih tơpuôl mơnuĩh. Yơu nữn, pơnõq nhũ ruãh E-tien, sa aràc mơnuĩh vãq sơrè voh tui sì Yàc Vơngãq Sơđah, Phi-lip, Bô-kô-rơ, Ni-ka-nô, Ti-môn, Ba-me-na sì Ni-kô-la, sa aràc mơnuĩh An-ti-ôt tui jơlàt duh talơvãt mơnuĩh Ju-đa. 6Pơnõq nhũ padỡc dơgrữq mơnuĩh nữn pãq anãq dơgrữq mơnuĩh gơnuar pơđar, vloh dơgrữq mơnuĩh gơnuar pơđar iơu lakơu sì chẽq tơngãn pãq dlòc pơnõq nhũ.

7Yơu nữn, pơnuaĩq Yàc Pô Lơngĩq hũ miẽt akhàt pa-tơviãq sì katih mơnuĩh mơgrũ pãq Je-ru-sa-lem bluãq pơtãl rlao tơra, lũ viãq dơgrữq mơnuĩh gơnuar pioh kaya duh talơvãt pãc sãp dơlãp voh tui. 8Tũq nữn, E-tien hũ vãq kaya anĩt sì gơnuar chơnuãq, ngãq vruãq krơi tơmo sì kaya krơi tơmo prõng dơlãp vual vơla. 9Nữn hũ sa katih mơnuĩh pơweh sì sàc pơtõm angãn la: “Dơgrữq Anàq Mơnuĩh Lơnang Lơnai” nữn gãm la mơnuĩh Si-ren, mơnuĩh A-lec-san-tri sigỡuq sì tơpuôl mơnuĩh mưng Si-li-si sì A-si tơgùq dỡc pơrjai sì E-tien. 10Nữn pơnõq nhũ ôh tũq halơi jơdrãq wỡq sì kaya jãc rgơi sì Vơngãq Sơđah, Pitao sì gơnang tơmã nữn ung dơlãp tũq đơp. 11Vloh pơnõq nhũ vuh pơluãq hũ hadùp aràc, đơp làiq: “Pơnõq hlãq song hmỡq E-tien đơp dơgrữq pơnuaĩq đơp savĩl jơdrãq wỡq sì Môi-se sì Yàc Pô Lơngĩq.” 12Pơnõq nhũ pachôh vual vơla sigỡuq sì dơgrữq mơnuĩh pô tơha sì dơgrữq mơnuĩh gơnuar pơto voh-va, vloh pơnõq nhũ gơluh nao mãq E-tien sì va tơviãq ung nao pãq anãq tơpuôl chahrơna. 13Pơnõq nhũ rơchãc lơĩh dơgrữq mơnuĩh ngãq chưng lor, akhàt làiq: “Mơnuĩh nĩ miẽt ôh padơh đơp dơgrữq pơnuaĩq đơp sơvĩl trôh anĩh sơđah sì voh-va. 14Kơyua pơnõq hlãq song hmỡq nhũ đơp làiq Je-su mơnuĩh Na-sa-ret dih ròq pa-lơhiãq anĩh nĩ sì pa-sơdua dơgrữq adãt ơdia nữn Môi-se song akhàt payơr ga pơnõq drơi.” 15Dơgrữq mơnuĩh dòq guh pãq anĩh pô chahrơna iãq gơnĩt pãq ung E-tien, bôh bòq mơta ung drưh yơu bòq mơta mơnuĩh gơnrơh hũ.