Vruãq 3

1Tũq nữn, dơlãp tũq jơ bãc salơpãn, la tũq jơ iơu lakơu, Pier sì Jãng tơgùq nao pãq sàc duh talơvãt. 2Hũ sa aràc mơnuĩh dih, kađòc kuẽ kuẽt mưng dơlãp tũc ami, dơgrữq harơi hũ aràc chơkồc chẽq pãq anĩh angãn la Bãc Siàp sàc duh talơvãt hũ pioh yòc jĩn vrơi soh mưng dơgrữq mơnuĩh nao tơmã dơlãp sàc duh talơvãt, 3nữn dơlãp tũq bôh Pier sì Jãng jẽq tơmã dơlãp sàc duh talơvãt, nhũ lakơu dua aràc vrơi ga drơi jĩn vrơi soh. 4Nữn hadơi sì tũq Pier sigỡuq sì Jãng iãq mững gơnĩt nhũ, Pier đơp: “Iỡuq iãq tơmã pơnõq hlãq nĩ!” 5Nữn vloh mơnuĩh kuẽ kuẽt iãq gơnĩt pơnõq nhũ, chơkhãq khiãng ròq hũ tồq mãq sa kaya hagĩq nữn mưng pơnõq nhũ. 6Yơu nữn, Pier đơp: “Hlãq ôh hũ priãq sì mữh, nữn kaya hlãq hũ, hlãq ròq vrơi ga sơai. Mãq Angãn Yàc Dõc Pơ-tlah Je-su mơnuĩh Na-sa-ret, iỡuq yàp nao.” 7Tũq song apãt mãq tơngãn hơnuãq nhũ hũ, Pier wơh nhũ tơgùq dỡc, mư tũq nữn, plàq tơkai sì mơta vơve nhũ hũ jỡc khãc prãn. 8Hadơi sì tũq mơnuĩh kuẽ kuẽt plõc tơgùq, nhũ dòq dỡc sì pơdòq yàp nao, vloh mơnuĩh kuẽ kuẽt song tơmã dơlãp sàc duh talơvãt sigỡuq sì pơnõq nhũ, nao tiãng plõc tiãng sì sơ-uỗt mơyòp Yàc Pô Lơngĩq. 9Avih dơgrữq vual vơla iãq bôh nhũ yàp nao sì sơ-uỗt mơyòp Yàc Pô Lơngĩq. 10Vloh dơgrữq mơnuĩh thơu kơnãl nhũ nữn, la mơnuĩh miẽt dòq guh lakơu yòc jĩn vrơi soh pãq Bãc Siàp sàc duh talơvãt hũ, yơu nữn pơnõq nhũ kơtuãq kơblà viãq sì mãq ngãq krơi mưng vruãq song tơviãq jỡc ga mơnuĩh kuẽ kuẽt nĩ.

11Tũq nĩ, dơlãp tũq nhũ ãn nao tui Pier sì Jãng, avih dơgrữq vual vơla gãm sì kaya mãq ngãq krơi, va gỡuq mai trôh anĩh pơnõq nhũ pãq sơvòq bãc rơjàp, anĩh hũ angãn la Sơvòq Bãc Rơjàp Sa-lô-môn. 12Tũq Pier bôh yơu nữn, ung tơnĩa vual vơla:

“Ơ mơnuĩh Is-ra-el, hayơu adơi sơai mãq ngãq krơi mưng vruãq nĩ? Hayơu adơi sơai vloh iãq pơnõq hlãq mững gơnĩt yơu lơĩh pơnõq hlãq ngãq ga nhũ yàp nao mưng gơnuar chơnuãq hẽla vruãq ngãq siàp krơi drơi hũ? 13Yàc Pô Lơngĩq A-bra-ham hũ, Yàc Pô Lơngĩq Y-sac hũ sì Yàc Pô Lơngĩq Ja-kôp hũ, la Yàc Pô Lơngĩq ung kõq pơnõq drơi hũ, song sơuỗt mơyòp Je-su, halỗt mơnãq Pitrai hũ, Pitao nữn adơi sơai song pơjao nhũ sì kơmlah tlàq pãq anãq Phi-lat, tũq ung nữn song ngãq gơnĩt pơrlao Pitrai tơviãq. 14Nữn adơi sơai song kơmlah tlàq Pitao Sơđah sì Tơpãq Dãng, sì lakơu pơrlao ga drơi sa aràc mơnuĩh pa-mơtai mơnuĩh, 15nữn adơi sơai song pa-mơtai Pitao Pơdòq Kaya Hadiuq, la Pitao nữn Yàc Pô Lơngĩq song ngãq ga hadiuq wỡq mưng kaya mơtai, nữn pơnõq hlãq la mơnuĩh ngãq chưng ga kaya nĩ. 16Sì kơyua mưng voh tui dơlãp angãn Pitrai, nhũ nữn, la mơnuĩh nữn pơnõq adơi sơai kung bôh sì thơu, nữn angãn Pitrai song ngãq ga prãn khãc. Voh tui nữn gơnang di Pitrai song ngãq ga nhũ hũ prãn khãc wil tãl di anãq pơnõq adơi sơai. 17Tũq nĩ, pa-thơu adơi sơai, hlãq thơu làiq adơi sơai song ngãq kơyua siẽuq kaya thơu pãc, sì mơnuĩh apãt akõq pơnõq adơi sơai hũ kung yơu nữn. 18Nữn dơgrữq kaya sì Yàc Pô Lơngĩq song pa-thơu hlơu kơyua mưng mơvah chơbuai avih dơgrữq mơnuĩh gơnuar hwơr hũ, làiq Pitao Dõc Pơ-tlah Pitrai hũ iỡuq ãt pơđìq pơđua, nữn Pitrai song ngãq tơviãq jỡc iỡuq viãq yơu nữn. 19Kơyua yơu nữn, iỡuq mơvai tlàq dlàiq, sì gơlàiq mai wỡq, pioh dlàiq dơnũh drơi hũ wàq tơleh, 20tồq ga dơgrữq tũq lơwah harơi vơhrơu ròq trôh mưng kaya pabôh tơviãq Yàc hũ, sì Pitrai pơđar Pitao song hũ rơchãc lơĩh ga adơi sơai, la Yàc Dõc Pơ-tlah Je-su, 21Lơngĩq iỡuq tồq ròq Pitao nữn tãl trôh tũq lơwah ngãq pa-sơdua vơhrơu dơgrữq kaya sì mưng rài sơđãq Yàc Pô Lơngĩq song đơp trôh kơyua mưng mơvah chơbuai dơgrữq gơnuar hwơr sơđah sơchih Pitrai hũ. 22Viãq yơu nữn, Môi-se song đơp làiq: ‘Yàc la Yàc Pô Lơngĩq pơnõq drơi hũ ròq padỡc tơgùq di khrãh adơi sơai sa aràc mơnuĩh gơnuar hwơr drưh yơu hlãq ga pơnõq adơi sơai. Adơi sơai ròq hmỡq tui nhũ dơlãp avih dơgrữq kaya dơgrữq kaya gĩq nhũ ròq đơp sì adơi sơai. 23Nữn vruãq ròq tơviãq trôh ga mơnuĩh halơi ôh hmỡq tui mơnuĩh gơnuar hwơr nữn, ròq kađòc ãt pa-lơhiãq tlah di khrãh vual vơla.’ 24Viãq yơu nữn, avih dơgrữq mơnuĩh gơnuar hwơr mưng Sa-mu-en sì dơgrữq mơnuĩh trôh hadơi ung, tũq halơi pơnõq nhũ pơh sãp đơp gơnuar hwơr, nữn pơnõq nhũ kung song akhàt pa-tơviãq mưng dơgrữq harơi nĩ. 25Adơi Sơai la anàq tơcho dơgrữq mơnuĩh gơnuar hwơr hũ sì kaya hẽ grưh nữn Yàc Pô Lơngĩq song padỡc tơgùq sigỡuq sì ung kõq drơi, tũq Pitrai đơp sì A-bra-ham, làiq: ‘Gơnang mưng pơjẽh pơtiàt anàq, avih dơgrữq pơjẽh pơtiàt dơlãp voh hlùq ròq hũ lơngai.’ 26Hlơu avih ga pơnõq adơi sơai, hadơi sì tũq padỡc Halỗt Mơnãq Pitrai tơgùq, Yàc Pô Lơngĩq song pơđar Pitao nữn nao trôh vrơi lơngai ga adơi sơai mưng vruãq dui-va dơgrữq mơnuĩh tơviãq tlah mưng kaya iãh mơsãc drơi hũ.”