Pengo Bible
ହିତପଦେସ 19
ଇମ୍ଣି ହିଲ୍ୱାକାନ୍ ଜାର୍ ହୁଦାର୍ତ ଚାଲାନାନ୍, ହେୱାନ୍ କୁଟ୍କାତା ଆରି ମୁର୍କିୟା ମାନାୟ୍ ବାଦୁଲ୍ ହାର୍ । ଆତିସ୍ପା ପାରାଣ୍ ବିଦ୍ୟାହିଲ୍ୱି ଆନାକା ହାର୍ ଆକାୟ୍; ଆରେ, ଇନେନ୍ ଚାଣ୍ଡ୍ କିଜ଼଼ି ପାନା ତଗ୍ନାନ୍, ହେୱାନ୍ ପାପ୍ କିନାନ୍ । ମାନାୟ୍ତି ଅଗିୟାନି ହେୱାର୍ତି ତାଙ୍ଗ୍ନାକା ଉଲ୍ଟାୟ୍ କିନାନ୍, ଆରେ, ତା ମାନ୍ ନିତ୍ରେମାପ୍ରୁତି ବିରୁଦ୍ତ ରିସା ଆନାନ୍ । ଦାନ୍ ବେସି ବନ୍ଦୁ ଲାବ୍ କିନାତ୍; ମତର୍ ହିଲ୍ୱାକାନ୍ ମାନାୟ୍ ଜାର୍ ବନ୍ଦୁର୍ତାଂ ବିନେ ଆନାନ୍ । ମିଚ୍ ସାକି ଦଣ୍ଡ୍ ପାୟାଆନାନ୍; ଆରେ, ମିଚ୍ଇନାକାନ୍ ରାକ୍ୟା ପାୟା ଆଉନ୍ । ବେସି ସାଇଜମାନି ମାନାୟ୍ତି ଦୟାନି ପାର୍ତାନା କିନାର୍, ଆରେ, ୱିଜ଼଼ାକାର୍ ଦୟା ଲଗାଂ ବନ୍ଦୁ ଆନାର୍ । ହିଲ୍ୱାକାରିଂ ୱିଜ଼଼ୁ ଟଣ୍ଡେନ୍ ତାଙ୍ଗେଙ୍ଗ୍ ଗିଣ୍ କିନାର୍; ତା ବନ୍ଦୁର୍ତାଂ ବେସି ଦେହା ହାନାର୍ ! ହେୱାନ୍ ବେଣ୍କିଦେଂ ସେସ୍ଟା କିନାନ୍, ମତର୍ ହେୱାର୍ ହିଲୁର୍ । ଇମ୍ଣି ମାନାୟ୍ ବୁଦି ଲାବ୍ କିନାନ୍, ହେୱାନ୍ ଜାର୍ ପାରାଣ୍ତିଂ ଜିଉନନାନ୍; ଇନେନ୍ ବାବିକିନାକା ରାକ୍ୟା କିନାନ୍, ହେୱାନ୍ ମଙ୍ଗଲ୍ ଲାବ୍ କିନାନ୍ । ମିଚ୍ ସାକି ଦଣ୍ଡ୍ ପାୟାଆନାନ୍; ଆରେ, ମିଚ୍ଇନାକାନ୍ ନାସ୍ ଆନାନ୍ । ମୁର୍କିୟା ସୁକ୍ ବଗି କିଦେଂ ଆଡୁନ୍; ଆଦିକାରିତି ଜପି ଆଡ଼ିୟାତି ରାଜ୍ ଆଦିକାରି ଆଡୁର୍ । ମାନାୟ୍ତି ହାର୍ ବୁଦି ତାଙ୍ଗ୍ ରିସା କିଦେଂ କାଲେ କିନାତ୍; ଆରେ, ଦସ୍ ପିସ୍ତିହିନାକା ତାଦି ଜାଜ୍ମାଲ୍ । ରାଜାତି ମୁମ୍ଦ ରିସା ସିୟଁ ଗାର୍ଜାନି ଲାକେ; ମତର୍ ତାଦି ଦୟା କାଚ୍ରା ଜପି ମାନି ଅସ୍ ଲାକେ । ମୁର୍କିୟା ମାଜ଼଼ି ତା ଲାତ୍ରାହି ଦୁକ୍ନିକାନ୍; ଆରେ, କଗ୍ଲେ ଜଗ୍ଡ଼ା ଏସ୍ନି ଟପା ଲାକେ । ଇଲ୍ ଆରି ଦନ୍ ବୁଡ଼୍ହିର୍ତାଂ ପାୟାନି ଆଦିକାର୍; ମତର୍ ବୁଦିନି କଗ୍ଲେ ନିତ୍ରେମାପ୍ରୁତାଂ ପାୟାନାତ୍ । ଟକ୍ୱାତିଂ ବେସି ହୁଚ୍କାଣ୍କୁ ୱାନିକ୍; ଆରେ, ନିସ୍ତାୟ୍ ପାରାଣ୍ ନାସ୍କି ବଗି କିନାନ୍ । ଇସ୍ୱର୍ତି ଜାର୍ ପାରାଣ୍ ରାକ୍ୟା କିନାନ୍; ମତର୍ ଜାର୍ ହାଜ଼଼ି ବିସ୍ରେ ଇନେନ୍ ଜାଗ୍ରତ୍ ମାନ୍ଗୁନ୍, ହେୱାନ୍ ହାନାନ୍ । ଇନେନ୍ ହିଲ୍ୱାକାନିଂ ଦୟା କିନାନ୍, ହେୱାନ୍ ନିତ୍ରେମାପ୍ରୁଙ୍ଗ୍ ରୁଣ୍ ହିନାନ୍; ଆରେ, ହେୱାନ୍ ତା ହାର୍ଦି କାମାୟ୍ନି ହୁଜାଆନାନ୍ । ଜାର୍ ମାଜ଼଼ିଙ୍ଗ୍ ହିକାଇ କିୟାଟ୍, ଇନେକିଦେଂକି ବାର୍ସି ମାନାତ୍; ଆରେ, ମି ମାନ୍ ତାଦି ନାସ୍ ଇଚା କିମେତ୍ । ବେସି ରିସା ମାନାୟ୍ ଦଣ୍ଡ୍ ବଗି କିନାନ୍, ଇନେକିଦେଂକି ଏପେଙ୍ଗ୍ ହେଦେଲିଂ ରଗ ଉଦାର୍ କିତିସ୍, ହେଦାଂ ମିଙ୍ଗେଙ୍ଗ୍ ଆରେରଗ କିଦେଂ ଆନାତ୍ । ସେସ୍ଅବସ୍ତାତ ଏପେଙ୍ଗ୍ ଇନେସ୍ ଗିଆନି ଆଡ, ଇଦାଂ କାଜିଂ କାତା ୱେନାଟ୍ ଆରି ହାର୍ଦି ହିକ୍ୟା ମାନି କିୟାଟ୍ । ମାନାୟ୍ତି ମାନ୍ତ ବିନ୍ବିନ୍ ହାନ୍ଦାୟ୍କିନାକା ମାନ୍ଗାନାତ୍, ମତର୍ ନିତ୍ରେମାପ୍ରୁତି ଚିନ୍ତା ତିର୍ ଆନାତ୍ । ମାନାୟ୍ତି ବାସ୍ନା ହେୱାନ୍ତି ଦୟାନି ଇସାପ୍ରେ ଆରି ମିଚ୍ଇନାକାନ୍ ବାଦୁଲ୍ ହିଲ୍ୱାକାନ୍ ମାନାୟ୍ ମୁଡ଼୍ ଆନାନ୍ । ନିତ୍ରେମାପ୍ରୁତି ବିସ୍ରେନି ପାଣ୍ଡ୍ରୁ ଜିବୁନ୍ନିକା, ହେଦାଂ ଇମ୍ଣି ମାନାୟ୍ତାକେ ମାନାତ୍, ହେୱାନ୍ ପାନ୍ଞ୍ଜି ବାହା କିନାନ୍; ବିପତ୍ ତା ଲାଗାଂ ହିଜ଼଼ି ହାଲୁନ୍ । ନିସ୍ତାୟ୍ ଜାର୍ ତାଡ଼ିଆତ କେଇ ଜତିସ୍, ଆରେ ରଗ ହେଦାଂ ଜାର୍ ୱେଇଦ ଅଦେଂ ପା ଇଚା କିଉନ୍ । ନିନ୍ଦାକିନାକାନିଂ ଟ୍ରାକ୍ତିସ୍, ବୁଦିହିଲ୍ୱି ମାନାୟ୍ ଜାଗ୍ରତ୍ତାଂ ହିକ୍ୟା କିନାନ୍; ଆରେ, ବୁଦିକାରିୟାଙ୍ଗ୍ କେତ୍ତିସ୍ ହେୱାନ୍ ଗିୟାନ୍ ବୁଜାଆନାନ୍ । ଇମ୍ଣି ମାଜ଼଼ି ଜାର୍ ଆବାତି ଦନ୍ ନସ୍ଟ କିନାନ୍, ଆରେ, ଜାର୍ ଆୟାଙ୍ଗ୍ ହପ୍ନାନ୍, ହେୱାନ୍ ଲାଜୁନିକାନ୍ ଆରି ଅପ୍ମାନ୍ ନିକାନ୍ । ଏ ମା ମାଜ଼଼ି, ଇମ୍ଣି ହାର୍ଦି ହିକ୍ୟା ଗିଆନ୍ନି କାତାତାଂ ମିଙ୍ଗ୍ ବାଣା ଆଦ୍ନାପ୍, ହେଦାଂ ୱେଞ୍ଜେଙ୍ଗ୍ ଜାଗ୍ରତ୍ ଆମା । ମିଚ୍ ସାକି ନ୍ୟାୟ୍ ବିଚାର୍ତିଂ ନିନ୍ଦା କିନାନ୍ ଆରି ଦୁସ୍ଟର୍ତି ୱେଇ ବାନ୍ୟା କାତା ଇଞ୍ଜେଙ୍ଗ୍ ମାନ୍ କିନାତ୍ । ନିନ୍ଦାକିନାକାର୍ କାଜିଂ ଦଣ୍ଡ୍ ଆରି ମୁର୍କିୟା ଜେନ୍ପାଡ଼୍କା କାଜିଂ ଟ୍ରାକ୍ନାକା ଜାଲ୍ଦି ମାନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.