Pengo Bible
ହିତପଦେସ 20
ଅଙ୍ଗୁର୍ରାସ୍ ନିନ୍ଦାକିନାକାନ୍, କାଲିଂ କଣ୍ଡ୍ଗଲ୍କିନାକା; ଇନେର୍କି ହେବେତାଂ ପାଗ୍ଲା ଆନାନ୍, ହେୱାନ୍ ଗିଆନି ଆକାୟ୍ । ରାଜାତି ବଇଁଙ୍କାର୍ ସିୟଁ ଗାର୍ଜାନାକା ଲାକେ; ଇନେନ୍ ତାଙ୍ଗ୍ ରିସା ଉବ୍ଜାୟ୍ କିନାତ୍, ହେୱାନ୍ ଜାର୍ ପାରାଣ୍ ବିରୁଦ୍ତ ପାପ୍ କିନାନ୍ । ଗଣ୍ଡ୍ଗଲ୍ତାଂ ଚୁପ୍ ଆନି ମାନାୟ୍ତି ଗାଜା ଜାଜ୍ମାଲ୍; ମତର୍ ୱିଜ଼଼ାର୍ ମୁର୍କ ମାନାୟ୍ତି ଜଗ୍ଡ଼ା କିନାର୍ । ନିସ୍ତାୟ୍ କାକାର୍ କାଜିଂ ଆଡ଼୍ ଚାଲାୟ୍ କିଉନ୍; ଲାଗିଂ ତାସ୍ ସମୁତ ହେୱାନ୍ ଦାସ୍ତିସ୍ପା ଇନାକା ପାୟା ଆଉନ୍ । ମାନାୟ୍ତି ମାନ୍ନି ଜଜ୍ନା ଡେଙ୍ଗା ଏଜ଼଼ୁଙ୍ଗ୍ ଲାକେ, ମତର୍ ବୁଦିକାରିୟା ମାନାୟ୍ ହେଦାଂ ଉନ୍ଦ୍ନାନ୍ । ଆଦେକ୍ ମାନାୟ୍ ଜାର୍ ଜାର୍ ଦୟାତାଂ ପର୍ଚାର୍ କିନାର୍; ମତର୍ ପାର୍ତିନି ଲଗାଂ ଇନେର୍ ପାୟାନାର୍? ଇମ୍ଣି ଦାର୍ମି ଲଗୁ ଜାର୍ ହୁଦାର୍ତ ବେବାର୍ କିନାନ୍, ତା ପାଚେ ହେୱାନ୍ତି ମାଜ଼଼ିର୍ ଦନ୍ୟ ଆନାର୍ । ଇମ୍ଣି ରାଜା ବିଚାର୍ ବାହାତ କୁଚ୍ନାନ୍, ହେୱାନ୍ ଜାର୍ କାଣ୍ଗା ହୁଦାଂ ବାନ୍ୟା ବିସ୍ରେ ସବୁ ଉପ୍ନାନ୍ । ଆପ୍ ଜାର୍ ମାନ୍ ନିର୍ମଲ୍ କିତାପ୍ନା, ଆପ୍ ଜାର୍ ପାପ୍ତାଂ ନୁଜ୍ୟାତାପ୍ନା, ଇଦାଂ ଇନେର୍ ଇଞ୍ଜେଙ୍ଗ୍ ଆଡ୍ନାର୍? ବାର୍ବିନି କେଜି ଗୁଣ୍ଡ୍ ଆରି ବାର୍ବିନି ଲାଚ୍ନାକା ହମାନ୍ ରିଣ୍ଡି ସମାନ୍ ଲାକେ ନିତ୍ରେମାପ୍ରୁତି ଗିଣ୍ ନିକା। ଜାର୍ତି କାମାୟ୍ ନିର୍ମଲ୍ ଆରି ହୁଦାର୍ କି ଆକାୟ୍, ଇଦାଂ ର ହିମ୍ଣା ପା ଜାର୍ କାମାୟ୍ ହୁଦାଂ ଜାର୍ତି ଜାଣାୟ୍ ହିନାନ୍ । ୱେନି କାଜିଂ କିତୁଲ୍ ଆରି ହୁଡ଼୍ନି କାଜିଂ କାଣ୍ଗା, ଇ ରିଣ୍ଡିଂ ନିତ୍ରେମାପ୍ରୁ ରଚ୍ଚାନ୍ନା । ହୁଚ୍କାଣ୍ଣ୍କୁକାଂ ହାର୍ ଇନ୍ମାଟ୍, ଆୱିତିସ୍ ଏପେଙ୍ଗ୍ ଅର୍କିତ୍ ଆନାଦେର୍; ମି କାଣ୍ଗା ରିକାଟ୍, ହେବେ ଏପେଙ୍ଗ୍ କାଦିତ ସାରି ଆନାଦେର୍ । କଡ଼୍ନି ଲଗୁ ଇନାର୍, ହାର୍ ଆକାୟ୍, ହାର୍ ଆକାୟ୍, ମତର୍ ଜାର୍ ହାଜ଼଼ିତ ହାନି ୱେଡ଼଼ାଲିଂ ଗରବ୍ କିନାନ୍ । ହନା ମାନାତ୍ ଆରି ବେସି ଦାମ୍ନି କାଲ୍ ପା ମାନାତ୍, ମତର୍ ଗିୟାନିଲାଗ୍ଦି ୱେଇ ବେସିମଲ୍ ଜିନିସ୍ । ଜାଣାହିଲ୍ୱି ଲଗୁ କାଜିଂ ଜେ ଲାଗାଣି ଆନାର୍, ହେୱାନ୍ତି ହେନ୍ଦ୍ରା ଅୱାଟ୍; ଆରେ, ଇମ୍ଣାକାର୍ ବିଦେସ୍ୟା ଲଗୁ କାଜିଂ ଜାମ୍ଲି ଆନାର୍, ହେୱାନିଂ ବାନ୍ଦା ଇଟାଟ୍ । ମିଚ୍ଆର୍ଜାତି ଆରାଣ୍ ମାନାୟ୍ତିଂ ହୱାଦ୍ ହନାତ୍; ମତର୍ ପାଚେ ତା ୱେଇଦ ଗଡି ବାର୍ତି ଆନାତ୍ । ଆଦେସ୍ ହୁଦାଂ ସବୁ କାତା ତିର୍ ଆନାତ୍; ଆରେ, ଦୁସ୍ଟର୍ ହାର୍ ଜଜ୍ନା ଅଜ଼଼ି ଜୁଜ୍ କିୟାଟ୍ । ଇନେନ୍ ପାଲ୍ତୁ ଆଜ଼଼ି ବୁଲାନାନ୍, ହେୱାନ୍ ଡ଼ୁକ୍ତି କାତା ହପ୍ନାନ୍; ଇଦାଂକାଜିଂ ଇନେନ୍ ଜାର୍ ୱେଇ ମେଲା ଇଟ୍ନାନ୍, ହେୱାନ୍ ଲାହାଂ ମେହା ଆମାଟ୍ । ଇନେନ୍ ଜାର୍ ଆବା କି ଜାର୍ ଆୟାଙ୍ଗ୍ ସାଇପ୍ ହିନାନ୍, ବିସ୍ ମାଜ୍ଗାତ ହେୱାନ୍ତି ଅଜଡ଼୍ ପାଗ୍ୟାନାତ୍ । ପ୍ରତୁମ୍ ଇମ୍ଣାକାପା ଆଦିକାର୍ ତ୍ରିପ୍କୁ ଗାଟାଦ୍ନାତ୍; ମତର୍ ହେବେନି ହାରିହାରା ଆର୍ସିବାଦ୍ ଆଉତ୍ । ଆପ୍ ବାନ୍ୟାନି ପାତିପାଡ୍ ହିନାପ୍, ଏପ୍ ଏଲେଙ୍ଗ୍ କାତା ଇନ୍ମାଟ୍, ନିତ୍ରେମାପ୍ରୁତି ହାଜ଼଼ିତ ହାଲାଟ୍, ହେୱାନ୍ ମିଂ ଉଦାର୍ କିଦ୍ନାନ୍ । ବାର୍ବିନ୍ କେଜି ଗୁଣ୍ଡ୍ ନିତ୍ରେମାପ୍ରୁତି ଗିଣ୍ ବିସ୍ରେ, ଆରେ, ସମାନ୍ ହିଲ୍ୱି କେଜି ହାର୍ ଆକାୟ୍ । ନିତ୍ରେମାପ୍ରୁତାଂ ମାନାୟ୍ତି ପାନାହାନାକା ଆନାତ୍; ଲାଗି ମାନାୟ୍ ଜାର୍ ହାଜ଼଼ି ଇନେସ୍ ବୁଜାନାନ୍ ? ଇଦାଂ ପୁଇପୁୟା ଇଞ୍ଜି ତ୍ରିପ୍କୁ ଇନାକା ଆରି ମାନ୍ସି କିତି ପାଚେ ବିଚାର୍ କିନାକା, ମାନାୟ୍ କାଜିଂ ଡ଼ୁକା ଲାକେ । ଗିୟାନି ରାଜା ଦୁସ୍ଟରିଂ ପମ୍ଜି ହେୱାରିଂ ହେୱାର୍ତି ଜପି ଚକା ତଗିକିନାନ୍ । ମାନାୟ୍ତି ଜିବୁନ୍ ନିତ୍ରେମାପ୍ରୁତି ଅଜଡ଼୍, ହେଦାଂ ୱାସ୍କିନି ସବୁ ବିସ୍ରେ ଡେକ୍ନାତ୍ । ଦୟା ଆରି ହାତ୍ପା ରାଜାତିଂ ରାକ୍ୟା କିନାତ୍; ଆରେ, ଦୟା ହୁଦାଂ ହେୱାନ୍ତି ଗାଦି ତିର୍ ଆନାତ୍ । ଦାଂଣାର୍ତି ବାଡ଼୍କାସ୍ ହେୱାର୍ତି ହାଜ, ବୁଡ଼଼ାଲୁର୍ତି ହେନ୍ତିତେମୁଲ୍ ହେୱାର୍ତି ହଲ୍ନାକା । ଗାୱାତି ମାଡ୍ ବାନ୍ୟା ନିର୍ମଲ୍ କିନାତ୍, ଆରେ, ଟ୍ରାକ୍ତାକା ମାନ୍ତ ହଣାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.