Pengo Bible
ହିତପଦେସ 21
ରାଜାତି ୱାସ୍କି ନିତ୍ରେମାପ୍ରୁତି କେଇଦ ଜାରାଣ୍ ଲାକେ ମାନାତ୍; ହେୱାନ୍ ଇମ୍ଣି ନିପ ଇଚା, ହେ ନିପ ମାସ୍ନାନ୍ । ମାନାୟ୍ତି ସବୁ ହାଜ଼଼ି ଜାର୍ ହୁଡ଼୍ନାକା ହାର୍ଦାକା, ମତର୍ ନିତ୍ରେମାପ୍ରୁ ମାନ୍ତିଂ ତୁଡ଼ାୟ୍କିନାନ୍ । ପୁଜା ବାଟା ନିୟାୟ୍ ଆରି ହାର୍ବିଚାର୍ ନିତ୍ରେମାପ୍ରୁତି ଆଦିକ୍ ଇଟ୍ନାନ୍ । ଦୁସ୍ଟ ଲଗାର୍ତି ବୈଟାଲାକେ ଜେ ଆକାର୍ ହୁଡ଼୍ନାକା ଆରି ଗାର୍ବି ମାନ୍, ହେଦାଂ ପାପ୍ନିକା । କାମାୟ୍ କିନି ଜଜ୍ନା କେବଲ୍ ବେସି ବାଡାନାତ୍, ମତର୍ ୱିଜ଼ାର୍ ତାନ୍ଦ୍ରାତ କାମାୟ୍କିନାକାନ୍ କେବଲ୍ ଅବାବ୍ ନିପ ହାନାନ୍ । ମିଚ୍ୱା ୱେଇ ହୁଦାଂ ପାୟାତି ଦନ୍ ଅଲପ୍ କାଜିଂ ତିର୍ ଗୁକ୍ଟା ଲାକେ, ଇମ୍ଣାକାର୍ ହେଦାଂ ଡେକ୍ନାର୍, ହେୱାର୍ ହାକି ଡେକ୍ନାର୍ । ଦୁସ୍ଟର୍ତି ବାନ୍ୟା ହେୱାରିଂ ଉପ୍ଚି ଅନାତ୍; ଇନେକିଦେଂକି ହେୱାର୍ ନିୟାୟ୍ କିଦେଂ ମୁନା କିନାର୍ । ଦସି କାମାୟ୍ତ ମାନି ମାନାୟ୍ ହାଜ଼଼ି ବେସି ବାଂଟା; ମତର୍ ପୁଇପୁୟା ଲଗୁନି କାମାୟ୍ ସଲକ୍ । ଗଣ୍ଡ୍ଗଲିଆ କଗ୍ଲେ ଲାହାଂ ଗାଜା ଇଞ୍ଜ ବାହା କିନି ବାଟା ଚାଉଣିତ ର କନାତ ବାହା କିନାକା ହାର୍ । ଦୁସ୍ଟ ଲଗୁନି ମାନ୍ ବାନ୍ୟା ବାବିକିନାତ୍, ଆରେ, ହେୱାନ୍ତି ହୁଡ଼୍ନିତ ହେୱାନ୍ତି ପାଡ୍ହାଇଞ୍ଜି ଲଗୁ ମୁଡ଼଼େ ଉପ୍କାର୍ ପାୟାଉନ୍ । ନିନ୍ଦାକିନାକାନିଂ ଡଣ୍ଡ୍ ହିତିସ୍, ବୁଦିହିଲ୍ୱି ଲଗୁ ବୁଦିମାନ୍ ଆତିସ୍; ଆରେ, ବୁଦ୍ୟାରିଂ ବୁଜାୟ୍କିତିସ୍, ହେୱାନ୍ ଗିଆନି ଆନାନ୍ । ଦାର୍ମି ଲଗୁ ବୁଦି ଦୁସ୍ଟତି ଇଲ୍ ବିସ୍ରେ ବାବି କିନାନ୍; ହେ ଦୁସ୍ଟ ଲକୁ ଇନେସ୍ ଆଜ଼଼ି ନାସ୍ ଆନାର୍, ଇଦାଂ ହାର୍ବାବି କିନାନ୍ । ଇମ୍ଣି ଲଗୁ ଅର୍କିତ୍ କୁକ୍ନିତ କିତୁଲ୍ ୱେନୁନ୍, ହେୱାନ୍ ପା ଆପେ କୁକ୍ନାନ୍, ମାତର୍ ଉତର୍ ଗାଟାଉନ୍ । ଡ଼଼ୁକ୍ଚି ଦାନ୍ ହିତିସ୍ ରିସା ସାନ୍ତି ଆନାତ୍, ଆରେ, ଡ଼ୁକ୍ଚି ହିତି ଲାଞ୍ଚ୍ ବେସି ରିସା ସାନ୍ତି କିନାତ୍ । ନିୟାୟ୍ ବେବାର୍କିନି ଦାର୍ମି କାଜିଂ ୱାରିନି ବିସ୍ରେ; ମତର୍ ହେଦାଂ ବାନ୍ୟାକାମାୟ୍ କିନାକାର୍ କାଜିଂ ନାସ୍ନିକା । ଇନେର୍ ବୁଦିନି ହାଜ଼଼ି ପିସ୍ତି ବୁଲାନାର୍, ହେୱାନ୍ ହାତାକାର୍ ମାନାୟ୍ ଦଲ୍ଦ ବାହା କିନାନ୍ । ଇମ୍ଣି ଲଗୁ ୱାରି ପାୟାନାନ୍, ହେୱାନ୍ ଅର୍କିତ୍ ଆନାନ୍; ଆରେ, ଇନେନ୍ ଅଙ୍ଗୁର୍ରାସ୍ ୱାରିୟା ଆନାନ୍, ହେୱାନ୍ ଅର୍କିତ୍ ଆନାନ୍, ଆରେ, ଇନେନ୍ ଅଙ୍ଗୁର୍ରାସ୍ ଆରି ଚିକାଣ୍ ୱାର୍ୟା ଆନାନ୍, ହେୱାନ୍ ମାଜାନ୍ ଆଉନ୍ । ବାନ୍ୟା ମାନାୟ୍, ଦାର୍ମିତି ମାନାୟ୍ କାଜିଂ ଇମ୍ଣି ଦୁକ୍ ତାହି ୱାଦେଂ ଚେସ୍ଟା କିନାନ୍, ହେଦାଂ ତା ଜପି ନେ ଆର୍ନାତ୍ । ଗଣ୍ଡ୍ଗଲିଆ ଆରି ରିସାନି କଗ୍ଲେ ଲାହାଂ ବାହା କିନାକା ବାଟା ସିଣ୍ଦା ବାହାତ ବାହା କିନାକା ହାର୍ । ଗିଆନିର୍ ଇଞ୍ଜ ବେସିମଲ୍ ସମ୍ପତି ଆରି ଚିକାଣ୍ ମାନାତ୍; ମତର୍ ମୁର୍କିୟା ମାନାୟ୍ ହେଦାଂ ବୁଡାୟ୍ କିନାତ୍ । “ଇମ୍ଣି ମାନାୟ୍, ଦାର୍ମିନିକା ଆରି ଦୟାନି ପାଚେ ହାନାନ୍, ହେ ଜିବୁନ୍ ଆରି ଦାର୍ମିନିକା ଆରି ଗାଜା ପାଣ୍ ଗାଟାନାନ୍ । ଗିଆନି ଲଗୁ ଡାଟ୍ ଗାଡ଼୍ଦ ହଣ୍ଜି, ଆରେ, ହେବେ ସାସ୍ନି ବାଡ଼୍କାସ୍ ତାରେନ୍ ତାହିୱାନାନ୍ । ଇନେନ୍ ଜାର୍ ୱେଇ ଆରି ୱେନ୍ଦୁଲ୍ ରାକ୍ୟା କିନାନ୍, ହେୱାନ୍ ଦୁକ୍ତାଂ ଜାର୍ ପାରାଣ୍ ରାକ୍ୟା କିନାନ୍ । ଆକ୍ରିୟା ଆରି କୁର୍ଲିୟା ଲଗୁ ନିନ୍ଦାକିନାକାନ୍ ତର୍ଦ ଡାକ୍ପୁଟା, ହେୱାନ୍ ଆକ୍ରିୟାନି ଗରବ୍ତ କାମାୟ୍ କିନାନ୍ । ଆଡ୍ସାୟ୍ ଜାର୍ ଆହା ବିସ୍ରେ ତା ହାକି ଗିଟାୟ୍କିନାନ୍; ଇନାକିଦେଂକି ହେୱାନ୍ତି କେଇ କାମାୟ୍ କିଦେଂ ମୁନା କିନାନ୍ । ଇନେର୍ ଇନେର୍ ୱେଡ଼ାବୁଡି ବେସି ଲାବ୍ଡ଼ି କିନାର୍; ମତର୍ ଦାର୍ମି ଲଗୁ ଦାନ୍ କିନାନ୍, ଲବ୍ରା ଆଉନ୍ । ଦୁସ୍ଟର୍ତି ପୁଜା ଗିଣ୍ ବିସ୍ରେ, ମତର୍ ହେୱାନ୍ ବାନ୍ୟା ଲାଲ୍ସାତ ତାହିୱାତିସ୍ ହେଦାଂ ଏଚେକ୍ ବେସି ଗିଣ୍ନିକା । ମିଚ୍ ସାକି ବୁଡାନାନ୍: ମତର୍ ଇମ୍ଣି ଲଗୁ ୱେନାନ୍, ହେୱାନ୍ ଟିକ୍ କାତା ଇନାନ୍ । ଦୁସ୍ଟ ଲଗୁ ଜାର୍ ମୁମ୍ ଆଟ୍ୱା କିନାନ୍, ମତର୍ ହୁଦାର୍ ଲଗୁ ଜାର୍ ହାଜ଼଼ି ହାର୍ ତିର୍ କିନାନ୍ । ନିତ୍ରେମାପ୍ରୁ ବିରୁଦ୍ତ ଇମ୍ଣାକାପା ଗିୟାନ୍ କି ବୁଦି କି ଜଜନା କାମ୍ ହିଉତ୍ ଜୁଜ୍ ଦିନା କାଜିଂ ଗଡ଼ା ଜାଲ୍ଦି ଆନିକ୍; ମତର୍ ମୁକ୍ଡ଼ାନାକା ନିତ୍ରେମାପ୍ରୁତାଂ ଆନାତ୍ ।”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.