Pengo Bible
ହିତପଦେସ 18
ଇନେନ୍ ଜାର୍ତିଂ ବିନେ କିନାନ୍, ହେୱାନ୍ ଜାର୍ ଇଚା ସେସ୍ଟା କିନାନ୍ ଆରି ସବୁବାନି ହାର୍ଦି ଗିୟାନ୍ ବିରୁଦ୍ତ ଗଣ୍ଡ୍ଗଲ୍ କିନାନ୍ । ମୁର୍କିୟା ମାନାୟ୍ ବୁଦିତ ସାରି ପାୟା ଆଉନ୍, କେବଲ୍ ଜାର୍ ମାନ୍ତି କାତା ହପ୍ନି କାଜିଂ ସାରି ଆନାନ୍ । ଦୁସ୍ଟ ୱାତିସ୍ ଅପ୍ମାନ୍ ୱାନାତ୍, ଆରେ, ଅପ୍ମାନ୍ ଲାହାଂ ବଦ୍ଲାମ୍ ୱାନାତ୍ । ମାନାୟ୍ତି ୱେଇନି ବଚନ୍ ଡେଙ୍ଗା ଏଜ଼଼ୁଙ୍ଗ୍ ଲାକେ, ଆରେ, ଗିୟାନ୍ନି ଉବ୍ଜାତି ବାହା ଜାରାଣ୍ ଲାକେ । ଦୁସ୍ଟର୍ ମୁମ୍ ପାକ୍ୟା କିନାକା କି ବିଚାର୍ତ ଦାର୍ମି କାଜିଂ ଅନ୍ୟାୟ୍ କିନାକା ହାର୍ ଆକାୟ୍ । ମୁର୍କିୟା ୱେଇ ଗଣ୍ଡ୍ଗଲ୍ ତେନାତ୍, ଆରେ, ତା ୱେଇ ମାଡ୍ ତିଞ୍ଜେଙ୍ଗ୍ ଦାହ୍ନାତ୍ । ମୁର୍କିୟା ୱେଇ ହେୱାନ୍ତି ନାସ୍ନି କାରଣ୍, ଆରେ, ହେୱାନ୍ତି ୱେଇ ଜାର୍ ପାରାଣ୍ନି ଡ଼ୁକା ଲାକେ । କିତୁଲ୍ କିତୁଲ୍ତ ଇନି ମାନାୟ୍ତି ବଚନ୍ ହୱାଦ୍ ଲାକେ, ହେଦାଂ ମାନ୍ ବିତ୍ରେ ହାନାତ୍ । ଜାର୍ କାମାୟ୍ତ ଇନେନ୍ ନିସ୍ତାୟ୍, ହେୱାନ୍ ନାସ୍ କିନି ଟଣ୍ଡେନ୍ । ନିତ୍ରେମାପ୍ରୁତି ତର୍ ଡାଟ୍ ମାଚା ଦାର୍ମି ମାନାୟ୍ ହେବେତାଂ ହନ୍ଚି ହାଲ୍ଜି ରାକ୍ୟା ପାୟାନାନ୍ । ଦନିତି ଦନ୍ ହେୱାନ୍ତି ଡାଟ୍ ଗାଡ଼୍, ଆରେ, ହେୱାନ୍ତି ରଚ୍ଚି ଉଚା କୁୱାଡ଼୍ ଲାକେ । ନାସ୍ ମୁମ୍ଦ ମାନାୟ୍ତି ମାନ୍ ଗରବ୍ ଆନାତ୍, ଆରେ, ହୁଦାର୍ ଗାଜା ପାଣ୍ ମୁମ୍ଦ ଆନାତ୍ । ଇନେନ୍ ୱେନି ଆଗେ ଉତର୍ କିନାନ୍, ହେଦାଂ କାଜିଂ ଅଗିୟାନି ଆରି ଲାଜୁନିକା ଆନାନ୍ । ମାନାୟ୍ତି ଜିବୁନ୍ ହେୱାନ୍ତି ନନାକା ସମାଲି କିନାନ୍; ମତର୍ ଦୁକ୍ନି ଜିବୁନ୍ ଇନେର୍ ହୁଞ୍ଜ୍ଜେଙ୍ଗ୍ ଆଡ୍ନାର୍ ? ବୁଦିକାରିୟାତି ମାନ୍ ଗିଆନ୍ ଆର୍ଜାନାନ୍; ଆରେ, ଗିଆନିତି କିତୁଲ୍ ଗିଆନ୍ ଦାହ୍ନାତ୍ । ମାନାୟ୍ତି ବେଟ୍ଆନାକା ହେଦାଂ କାଜିଂ ହାଜ଼଼ି ନିର୍ମଲ୍ କିନାତ୍, ଆରେ, ଗାଜା ମାନାୟାର୍ ମୁମ୍ଦ ହେୱାନିଂ ତେନାତ୍ । ଇମ୍ଣି ମାନାୟ୍ ପର୍ତୁମ୍ ଜାର୍ ଗଣ୍ଡ୍ଗଲ୍ ଜାଣାୟ୍କିନାନ୍, ହେୱାନ୍ ଦାର୍ମି ଚଞ୍ଜ୍ୟାନାନ୍, ମତର୍ ହେୱାନ୍ତି ଟଣ୍ଡାର୍ ୱାଜ଼଼ି ହେୱାନିଙ୍ଗ୍ ପରିକ୍ୟା କିନାନ୍ । କେଡ଼୍ପୁଟାନି ବିରୁଦ୍ତ ବନ୍ଦ୍ କିନାତ୍ ଆରି ବାପୁକାଟାକାରିଂ ବିନେ କିନାତ୍ । ନି ପାଡ଼୍ହାନି ବେରୁ ଲକାଂ ସାଇଜ କିୟା ହେୱାର୍ ମିଙ୍ଗ୍ ର ଗାଡ଼୍ନି ଡାଣ୍ଡ୍କାତି ଲାକେ ରାକ୍ୟା କିନାର୍, ମାତର୍ ଜଦି ଏପେଙ୍ଗ୍ ହେୱାର୍ ଲାହାଙ୍ଗ୍ ଗଣ୍ଡ୍ଗଲ୍ କିନାଦେର୍, ହେୱାର୍ ମି କାଜିଂ କାପାଟ୍ନି ଆର୍ଗାଡ଼ା ବନ୍ଦ୍ କିଦ୍ନାର୍ । ମାନାୟାର୍ତି ବିତ୍ରେ ହେୱାନ୍ତି ୱେଇନି କାତାତ ବାର୍ତି ଆନାତ୍, ଆରେ, ହେୱାନ୍ ଜାର୍ ୱେଇନି ଆର୍ଜାନିତ ପାଞ୍ଜ୍ନାନ୍ । ହାକି ଆରି ଜିବୁନ୍ ୱେନ୍ଦୁଲ୍ ତାରେନ୍; ଇମ୍ଣାକାର୍ ହେଦିଲିଂ ହାର୍ ପୁନାର୍, ହେୱାର୍ ତା ପାଡ଼୍ ବଗିକିନାର୍ । ଇମ୍ଣି ମାନାୟ୍ ଡକ୍ରି ପାୟାନାନ୍, ହେୱାନ୍ ସାରିନି ହାର୍ଦି ଜିନିସ୍ ପାୟାନାନ୍ ଆରି ନିତ୍ରେମାପ୍ରୁତାଂ ଦୟା ପାୟାନାନ୍ । କାକୁଲ୍ତି ମାନାୟ୍ ଗୱାରି କିନାନ୍; ମତର୍ ମାଜାନ୍ ମାନାୟ୍ ବାଦିକିନି ଉତର୍ ହିନାନ୍ । ଇନେନ୍ ବେସି ବନ୍ଦୁ କିନାନ୍, ହେୱାନ୍ ଜାର୍ ନାସ୍ କାଜିଂ ହେଦାଂ କିନାନ୍; ମତର୍ ରୱାନ୍ ଜିଉକାରିୟା ମାନାନ୍, ଇନେନ୍ ଟଣ୍ଡେନ୍ ବାଦୁଲ୍ ବେସି ଲାଗେ ମାନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.