Pengo Bible
ହିତପଦେସ 17
ଗଣ୍ଡ୍ଗଲ୍ମେହା ବଜିତ ବାର୍ତି ଇଲ୍ ବାଦୁଲ୍ ସୁସ୍ତା ଲାହାଂ ୱାଚ୍ଚି ରୁଟି ଇଚୁକ୍ ଚିଚିସ୍ ହାର୍ । ଇମ୍ଣି ଆଡ଼଼ିୟା ବୁଦିଲାହାଂ ଚାଲାନାନ୍, ହେୱାନ୍ ଲାଜାନି ମାଜ଼଼ି ଜପି ରାଜ୍ କିନାନ୍, ଆରେ, ଟଣ୍ଡାର୍ ଲାହାଂ ଆଦିକାର୍ନି ବାଗ୍ ପକାୟ୍କିନାନ୍ । ରୁପା ଆରି ହନାତିଂ ନାଣିତ ପରିକ୍ୟା କିୟା ଆନାତ୍; ମତର୍ ନିତ୍ରେମାପ୍ରୁ ମାନାୟ୍ ୱାସ୍କିତିଂ ପରିକ୍ୟା କିନାନ୍ । ବାନ୍ୟାକାମାୟ୍ କିନାକାନ୍ ମାନାୟ୍ ଦୁସ୍ଟ ୱେଇନି କାତା ୱେନାନ୍, ଆରେ, ମିଚ୍ ଇନାକାନ୍ ନାସ୍ କିନି ୱେନ୍ଦୁଲ୍ତ କିତୁଲ୍ ୱେନାନ୍ । ଇମ୍ଣି ମାନାୟ୍ ହିଲ୍ୱାକାନିଂ ଗ୍ଡାଇନାନ୍, ହେୱାନ୍ ତା ଉବ୍ଜାୟ୍ କିତ୍ତାକାନିଂ ନିନ୍ଦା କିନାନ୍; ଆରେ, କସ୍ଟ ସମୁତ ଇନେନ୍ ୱାରି କିନାନ୍, ହେୱାନ୍ ଦଣ୍ଡ୍ ପାୟାନାନ୍। ମାଜ଼଼ିର୍ନି ମାଜ଼଼ିର୍ ବୁଡ଼଼ାର୍ ମାନାୟାର୍ତି ମୁକୁଟ୍; ଆରେ, ମାଜ଼଼ିର୍ତି ଜାଜ୍ମାଲ୍ ହେୱାର୍ତି ଆୟାଆବା । ମୁର୍କ କାଜିଂ ହାର୍ କାତା ଇନାକା ଟିକ୍ ଆକାୟ୍, ସାସନ୍ କିନାକାନ୍ କାଜିଂ ମିଚ୍ ଇନିତାଂ ପା କମ୍ । ଇମ୍ଣାକାର୍ ଲାଞ୍ଚ୍ ହିନାର୍ ହେୱାର୍ତି କାଣ୍କୁ ର ମଣି ଲାକେ, ହେୱାର୍ ଇମେନିପ ବୁଲାନାର୍ ହେବେ ହେୱାର୍ ସମାନ୍ ଆନାର୍ । ଇନେନ୍ ଅଦାର୍ମି କେମା କିନାନ୍, ହେୱାନ୍ ଜିଉ ଦାହ୍ନାନ୍; ମତର୍ ଇନେନ୍ ର କାତାତିଂ ବାର୍ ବାର୍ ଇଞ୍ଜି ମାନାନ୍, ହେୱାନ୍ ବେସି ବନ୍ଦୁରିଂ ଅଲ୍ଗା କିନାନ୍ । ମୁର୍କିୟାତି ସହେତର୍ ଇଡ଼୍ନି ବାଟା ବୁଦିମାନ୍ତିଂ ପାଦେକ୍ ହାର୍ଦି ହିକ୍ୟା କେତ୍ନାକା ଆଦିକ୍ କାଟିକିନାତ୍ । ବାନ୍ୟାର୍ କେବଲ୍ ଗଣ୍ଡ୍ଗଲ୍ ଦାହ୍ନାର୍, ଲାଗିଂ ହେଦାଂ ବିରୁଦ୍ତ ବାନ୍ୟା କାବୁର୍ ପକ୍ୟାନାତ୍ । ଅଗିୟାନି ତାକେ ହାନି ବାଟା ର ହିମ୍ଣା ଜାକ୍ତି ବାଲୁ ତାକେ ହାନାକା ହାର୍ । ଇମ୍ଣି ମାନାୟ୍ ହାର୍ ବାଦୁଲ୍ ବାନ୍ୟା କିନାନ୍, ତା ଇଲ୍ତିଂ ବାନ୍ୟା ଇନାୱେଡ଼଼ାଙ୍ଗ୍ ପିହୁତ୍ । ଗଣ୍ଡ୍ଗଲ୍ ଆରମ୍ ଇନେର୍ ବନ୍ଦ୍ ଡ୍ରିକ୍ଚି ଏଜ଼଼ୁଙ୍ଗ୍ ପିସ୍ତି ହିଦ୍ନି ଲାକେ; ଲାଗିଂ ଗଣ୍ଡ୍ଗଲ୍ ଆନି ଆଗେ ଗଣ୍ଡ୍ଗଲ୍ ପିହାଟ୍ । ଇନେନ୍ ଦୁସ୍ଟରିଂ ଦସି ଇନାନ୍ ଆରି ଇନେନ୍ ଦାର୍ମିରିଂ ଦସ୍ କିନାନ୍, ହେୱାନ୍ ରିୟାର୍ ନିତ୍ରେମାପ୍ରୁତାକେ ହମାନ୍ ଲାକେ ଗିଣ୍ନିକାର୍। ଗିଆନ୍ କଡ଼୍ନି କାଜିଂ ମୁର୍କିୟା କେଇଦ ଇନେକିଦେଂ ଦନ୍ ମାନ୍ଗାନାତ୍? ହେୱାନ୍ତି ତ ବୁଦି ହିଲୁତ୍ । ବନ୍ଦୁ ସବୁୱାଡ଼଼ାଙ୍ଗ୍ ଜିଉନନାନ୍, ଆରେ ଟଣ୍ଡେନ୍ ବିପ୍ତି କାଡ଼୍ କାଜିଂ ଟିୟା ଆନାନ୍ । ବୁଦିହିଲ୍ୱି ମାନାୟ୍ କେଇ ଜଲାୟ୍ କିଜ଼ି ଜାର୍ ପାଡ଼୍ହାଇଞ୍ଜାକାର୍ ମେହାଣ୍ତ ଲାଗା ଆନାନ୍ । ଇନେନ୍ ଗଣ୍ଡ୍ଗଲ୍ ୱାରିୟା ଆନାନ୍, ହେୱାନ୍ ପାପ୍ ପା ୱାରିୟା ଆନାନ୍; ଆରେ, ଇମ୍ଣାକାନ୍କି ଜାର୍ ଦୁୱେର୍ ଉଚା କିନାନ୍, ହେୱାନ୍ ନାସ୍ ଦାହ୍ନାନ୍ । ଇନେର୍ତି କୁଟ୍ ୱାସ୍କି, ହେୱାନ୍ ମଙ୍ଗଲ୍ ପାୟା ଆଉନ୍; ଆରେ, ଇନେର୍ତି ଉଲ୍ଟା ପାଲ୍ଟା ୱେନ୍ଦୁଲ୍, ହେୱାନ୍ ବିପଦ୍ତ ପଡ଼ାନାନ୍ । ମୁର୍କିୟାତି ଜଲମ୍କିତାକାନ୍ ଜାର୍ତି ଦୁକ୍ ରୁଣ୍ଡାୟ୍ କିନାର୍; ଆରେ, ମୁଡ଼୍ ଆବା ୱାରି ପାୟା ଆଉନ୍ । ୱାରିନି ମାନ୍ ହାର୍ଦି ଅହ; ମତର୍ ଡ୍ରିଙ୍ଗ୍ତି ଜିବୁନ୍ ପ୍ଡେକୁସବୁକାଂ ୱାଚି କିନାତ୍ । ବାନ୍ୟା ମାନାୟ୍ ବିଚାର୍ନି ହାଜ଼଼ି ବାଙ୍ଗ୍ଟା କିଦେଂ ମେଙ୍ଗାଙ୍ଗ୍ତାଂ ଲାଞ୍ଚ୍ ଅନାନ୍ । ବୁଦିମାନ୍ ମୁମ୍ଦ ଗିଆନ୍ ମାନ୍ଗାନାତ୍, ମତର୍ ମୁର୍କିୟାତି କାଣ୍କୁ ପୁର୍ତିନି ହାରିହାରା ପାତେକ୍ ମାନ୍ଗାନାତ୍ । ମୁର୍କିୟା ମାଜ଼଼ି ଜାର୍ ଆବାତି ଦୁକ୍ ଆରି ଜାର୍ ଆୟାତି ଦୁକ୍ନି କାରଣ୍ ଆନାନ୍ । ଦାର୍ମିରିଂ କସ୍ଟ ହିନାକା କି ଗାଜା ପାଦ୍ତ ମାନି ମାନାୟାରିଂ ହେୱାର୍ତି ହୁଦାର୍ କାଜିଂ ଟ୍ରାକ୍ନାକା ହାର୍ ଆକାୟ୍ । ଇନେନ୍ ଅଲପ୍ କାତା ନିୟାୟ୍ କିନାନ୍, ହେୱାନ୍ତି ଗିଆନ୍ ମାନ୍ଗାନାତ୍; ଆରେ, ଇନେର୍ତି ହୁଦାର୍ ଜିବୁନ୍, ହେୱାନ୍ ବୁଦିକାରିୟା । ଅଗିଆନି ନେ ଚୁପ୍ ଆତିସ୍, ଗିଆନି ଗାଣାକିୟାନାନ୍; ଆରେ, ହେୱାନ୍ ଜାର୍ ୱେଇ ବନ୍ଦ୍ କିତିସ୍, ବୁଦିକାରିୟା ଗାଣାକିୟାନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.