Pengo Bible
ହିତପଦେସ 16
ୱାସ୍କିନି ହାନ୍ଦାୟ୍ କିନାକା ମାନାୟ୍ତାଂ ଆନାତ୍; ମତର୍ ୱେନ୍ଦୁଲ୍ନି ଉତର୍ ନିତ୍ରେମାପ୍ରୁତାଂ ଆନାତ୍ । ମାନାୟ୍ତି ୱିଜ଼଼ୁ ହାନାକା ଜାର୍ କାଣ୍କୁକାଂ ନିର୍ମଲ୍; ମତର୍ ନିତ୍ରେମାପ୍ରୁ ଜିବୁନିକାଂ ତୁଲାୟ୍ କିନାନ୍ । ନିତ୍ରେମାପ୍ରୁତିଂ ମି କାମାୟ୍ ହେଲାୟ୍ କିୟାଟ୍, ହେବେନି ମି ହାନ୍ଦାୟ୍କିନାକା ତିର୍ ଆନାତ୍ । ନିତ୍ରେମାପ୍ରୁ ସବୁ ବିସ୍ରେତିଂ ହେବେନି ନିଜ୍ ଉଦେସ୍ ସାଦନ୍ କାଜିଂ କିତାନ୍ନା; ଦୁସ୍ଟର୍ତି ପା ନାସ୍ କାଜିଂ । ମାନ୍ତ ଗରବ୍ ୱିଜ଼଼ାର୍ ମାନାୟାର୍ ନିତ୍ରେମାପ୍ରୁତାକେ ଗିଣ୍ନିକାର୍, କେଇ ଆସ୍ପା ଆତିସ୍ପା ହେୱାର୍ ଦଣ୍ଡ୍ ଆନାର୍ । ଦୟା ଆରି ହାତ୍ପାତ ପାପ୍ନି କେମା ଆନାତ୍, ଆରେ, ନିତ୍ରେମାପ୍ରୁ ବିସ୍ରେନିକା ପାଣ୍ଡ୍ରୁ ହୁକେ ମାନାୟାର୍ ବାନ୍ୟା କାମାୟ୍ ପିହ୍ନାର୍ । ମାନାୟ୍ତି ତାଙ୍ଗ୍ନାକା ନିତ୍ରେମାପ୍ରୁ କାଣ୍କୁତ ସାରି ଆତାନ୍, ହେୱାନ୍ ତା ସାତ୍ରୁରିଂ ପା ହେଦାଂ ଲାହାଂ ସୁସ୍ତାତାଂ ବାହା କିନାନ୍ । ଅନ୍ୟାୟ୍ ଲାହାଂ ବେସି କମାନିତାଂ ଦାର୍ମି ଲାହାଂ ଅଲପ୍ ହାର୍ । ମାନାୟ୍ତି ମାନ୍ ଜାର୍ ହାଜ଼଼ି ବିସ୍ରେ ହାନ୍ଦାୟ୍ କିନାତ୍; ମତର୍ ନିତ୍ରେମାପ୍ରୁ ତା ତାଙ୍ଗ୍ନାକା ସଲକ୍ କିନାନ୍ । ରାଜାତି ୱେଇଦ ହାର୍ଦି ବଚନ୍ ମାନ୍ଗାନାତ୍, ତା ୱେଇ ବିଚାର୍ତ ହାତ୍ପା ପିହୁତ୍ । ଇଚିସ୍ ଲାଚ୍ନାକା ସମାନ୍ ନିତ୍ରେମାପ୍ରୁତି ଆନାତ୍ ଆରି ମଣାତ ମାନି କେଜି ଗୁଣ୍ଡ୍ ସବୁ ହେୱାନ୍ତି ରଚ୍ଚାକା । ବାନ୍ୟାକାମାୟ୍ କିନାକାର୍ ରାଜାର୍ତି ଗିଣ୍ ବିସ୍ରେ; ଇନେସ୍କି ଦାର୍ମିକାତ ଗାଦି ରଚ୍ୟା ଆନାତ୍ । ଦାର୍ମିକାତା ୱେଇ ରାଜାର୍ତି ୱାରିନିକା, ଆରେ, ସମାନ୍ନିକାରିଂ ହେୱାର୍ ଜିଉନନାର୍ । ରାଜାତି ରିସା ହାକିନି କାବୁର୍ ୱେଚ୍ନାକାନ୍ ଲାକେ; ମତର୍ ଗିଆନି ମାନାୟ୍ ହେଦାଂ ସୁସ୍ତା କିନାନ୍ । ଏଚେକାଡ଼୍ଦ ରାଜାତି ୱାରିନି ଅଜଡ଼୍ ମାନାତ୍ ତା ଅରତ୍ ଜିବୁନ୍ ମାନ୍ଗାନାତ୍, ଆରେ ହେୱାନ୍ତି ଦୟା ହାରିହାରାନି ବାର୍ହା ବାଦାଡ଼୍ ଲାକେ । ହନା ପିସ୍ତି ଗିୟାନ୍ ଲାବ୍ କିନାକା, ଆରେ, ରୁପା ପିସ୍ତି ହାର୍ ବାବ୍ନା ଲାବ୍ ବାଚିକିନାକା ଇନେସ୍ ହାର୍ ! ବାନ୍ୟା ପିହ୍ନାକା ହୁଦାର୍ ମାନାୟାର୍ତି ଅହାର୍ ହାଜ଼ି, ଇମ୍ଣି ମାନାୟ୍ ଜାର୍ ହାଜ଼଼ି କାସି ତାଙ୍ଗ୍ନାନ୍, ହେୱାନ୍ ଜାର୍ ପାରାଣ୍ ରାକ୍ୟା କିନାନ୍ । ଆକ୍ରିୟା ସବୁନାସ୍ ମୁମ୍ଦ ମାନ୍ଗାନାତ୍, ଆରେ, ଗରବ୍ ମାନ୍ ୱିଜ଼୍ନି ମୁମ୍ଦ ମାନ୍ଗାନାତ୍ । ଆକ୍ରିୟାର୍ ଲାହାଂ ଚରି ଜିନିସ୍ ବାଗ୍ କିନାକା ବାଦୁଲ୍ କାକୁଲ୍ତି ଜିବୁନ୍ ଲାହାଂ ହୁଦାର୍ ଆନାକା ହାର୍ । ଇମ୍ଣି ମାନାୟ୍ ପର୍ମେସ୍ୱର୍ ବଚନ୍ତ ହାର୍ଦି ମାନ୍ଦିଆନ୍ କିନାନ୍, ହେୱାନ୍ ମଙ୍ଗଲ୍ ପାୟାନାନ୍, ଆରେ, ନିତ୍ରେମାପ୍ରୁ ତାକେ ଇନେନ୍ ଚାଲାନାନ୍, ହେୱାନ୍ ଦନ୍ୟ । ମାନ୍ତ ଗିଆନି ମାନାୟ୍ ବୁଦିତ ଡାକ୍ପୁଟା ଆନାନ୍, ଆରେ, ୱେଇଦ ହୱାଦ୍ ଗିଆନି ଆଦେଂ ବାଡାୟ୍ କିନାତ୍ । ସତ୍ ବୁଦି, ହେଦାଂ ପାୟାଜ଼଼ିମାନି ମାନାୟ୍ କାଜିଂ ଜିବୁନ୍ନି ଜାରାଣ୍ ଲାକେ ଆନାତ୍; ମତର୍ ଅଗିୟାନିର୍ ହେୱାର୍ତି ମୁରୁକ୍ କାଜିଂ ଡାଣ୍ଡ୍ ପାୟାନାର୍ । ଗିଆନ୍ନିକାନ୍ ମାନ୍ ଜାର୍ ୱେଇଦିଂ ହାର୍ଦି ହିକ୍ୟା ହିନାନ୍, ଆରେ, ହେୱାନ୍ତି ବଚନ୍ ଗିଆନ୍ ଆଦେଂ ବାଡାୟ୍ କିନାତ୍ । ଦୟାନି ବେରଣ୍ ପୁକି ୱେଣ୍ତି ଲାକେ, ହେଦାଂ ମାନ୍ତିଙ୍ଗ୍ ହୱାଦ୍ନିକା, ପ୍ଡେକୁକାଂ ବାପୁ କିନାତ୍ । ମାନାୟାର୍ କାଣ୍କୁକାଂ ଇମ୍ଣି ଇମ୍ଣି ହାଜ଼଼ି ସଲକ୍ ଚଞ୍ଜାନାତ୍, ମତର୍ ହେବେନି ହାରିହାରା ହାକିନି ହାଜ଼଼ି ମାନ୍ଗାନାତ୍ । କାମାୟ୍କିନାକାନ୍ତି ନାସ୍କି ହେଦାଂ କାଜିଂ କସ୍ଟ କିନାତ୍, ଇନେସ୍କି ହେୱାନ୍ତି ୱେଇ ହେଦାଂ କାଜିଂ ହେୱାନିଂ ଜବର୍ଦସ୍ତି କିନାତ୍ । ପାପ୍ନି ମାନାୟ୍ ନସ୍ଟ କିନାକା ହାନ୍ଦାୟ୍ କିନାନ୍, ଆରେ ତା ୱେଇଦ ଆହ୍ନି ନାଣି ଲାକେ ମାନ୍ଗାନାତ୍ । ଟାଡ୍ରି ମାନାୟ୍ କିର ୱିତ୍ନାନ୍, ଆରେ ନିନ୍ଦାକିନାକାନ୍ ରୱାନ୍ ଇଚିସ୍ ବନ୍ଦୁରିଂ ବିନେ କିନାନ୍ । ଟୁଣାକାର୍ ଜାର୍ ପାଡ଼୍ହାନିକାରିଂ ବାମ୍ଣ୍ଡାୟ୍ କିନାର୍, ଆରେ, ହେଦେଲିଂ ବାନ୍ୟା ହାଜ଼଼ିତ କାଡାୟ୍ କିଜ଼଼ି ଅନାର୍ । ଇମ୍ଣି ମାନାୟ୍ ଜାର୍ କାଣ୍କୁ ଟେହ୍ରା ହୁଡ଼୍ନାନ୍, ହେୱାନ୍ ଚାଲାକି ବିସ୍ରେ ହାନ୍ଦାୟ୍ କିଦେଂ ହେଦାଂ କିନାନ୍; ଇନେନ୍ ଜାର୍ ଅଟିତିଂ ମିଞ୍ଜ୍ନାନ୍, ହେୱାନ୍ ବାନ୍ୟାକାମାୟ୍ ସିଦ୍ କିନାନ୍ । ହେନ୍ତି ତେମୁଲ୍ ହଲ୍ନି ମୁକୁଟ୍, ହେଦାଂ ଦାର୍ମି ହାଜ଼଼ିତ ପାୟାନାତ୍ । ଇନେନ୍ ରିସାତ କାଲେ, ହେୱାନ୍ ବିର ବାଦୁଲ୍ ଗାଜାକାନ୍; ଆରେ, ଇନେନ୍ ନିଜ୍ ଜିବୁନ୍ ଜପି ରାଜ୍ କିନାନ୍, ହେୱାନ୍ ଗାଡ଼୍ ଜିତାନାକା ପିସ୍ତି ହାର୍ । କେଡ଼୍ପୁଟାୟ୍ କିନି କିରତ କିୟାନାତ୍, ମତର୍ ହେବେନି ରାଜି ନିତ୍ରେମାପ୍ରୁତାଂ ଆନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.