Pengo Bible
ହିତପଦେସ 15
କୱାଣ୍ କାତା ରିସାତିଂ ମଦାୟ୍ କିନାନ୍; ମତର୍ କସ୍ଟ କାତା ରିସା ଉପ୍ଜାୟ୍ କିନାତ୍ । ଗିୟାନିର୍ ୱେନ୍ଦୁଲ୍ ହାତ୍ପା ରଚେ ଗିୟାନ୍ କାତା ଇନାତ୍; ମତର୍ ମୁର୍କିଆର୍ ମୁମ୍ ଅଗିୟାନି କାତା ହପ୍ନାତ୍ । ନିତ୍ରେମାପ୍ରୁତି କାଣ୍ଗା ୱିଜ଼଼ାର୍ ତାକେ ମାନ୍ଞ୍ଜି ବାନ୍ୟା ଆରି ନେକ୍ରି ଲଗାଂ ଇଟ୍କାଡ଼୍ କିନାତ୍ । ହୁଦାର୍ ୱେନ୍ଦୁଲ୍ ଜିବୁନ୍ ମାର୍ ଲାକେ; ଆରେ, ବାନ୍ୟା ୱେନ୍ଦୁଲ୍ ୱାସ୍କି ଡ୍ରିକ୍ନାତ୍ । ଅଗିୟାନି ଜାର୍ ଆବାତି ସାସନ୍ ଏଲା କିନାନ୍; ଆରେ, କେତ୍ନି ହିକ୍ୟା ଇନେନ୍ ଆହ୍ନାନ୍, ହେୱାନ୍ ବାଡାନାନ୍ । ଦାର୍ମିତି ଇଞ୍ଜ ବେସି ସମ୍ପତି ମାନ୍ଗାନାତ୍; ଆରେ, ଦୁସ୍ଟତି କମାନି କସ୍ଟ ମାନ୍ଗାନାତ୍ । ଗିଆନିର୍ତି ୱେଇ ବିଦ୍ୟା ପାସ୍ପାନାତ୍; ମତର୍ ମୁର୍କିୟା ମାନ୍ ହେ ଲାକେ କିଉତ୍ । ଦୁସ୍ଟର୍ତି ପୁଜା ନିତ୍ରେମାପ୍ରୁତାକେ ଗିଣ୍ନି ବିସ୍ରେନିକା; ମତର୍ ହୁଦାର୍ ଲକୁନି ପାର୍ତନା ୱାରିୟା ଆନାନ୍। ଦୁସ୍ଟର୍ତି ହାନାକା ନିତ୍ରେମାପ୍ରୁତି ଗିଣ୍ନି ବିସ୍ରେ; ମତର୍ ଦାର୍ମିର୍ତି ପାଚେ ହାନାକାରିଂ ହେୱାନ୍ ଜିଉନନାନ୍ । ବିନେହାନାକାର୍ କାଜିଂ ଦୁକ୍ନି ସାସ୍ତି ଗିଟାନାତ୍; ଆରେ, ଇମ୍ଣି ମାନାୟ୍ କେତ୍ନି ହିକ୍ୟା ଗିଣ୍ କିନାନ୍, ହେୱାନ୍ ହାନାନ୍ । ପାତାଲ୍ ଆରି ନାସ୍ ବାହା ନିତ୍ରେମାପ୍ରୁତି ମୁମ୍ଦ ଡ଼ୁଗ୍ଦେଂ ଆଡୁତ୍; ଲାଗିଂ ମାନାୟ୍ ମାଜ଼଼ିର୍ତି ୱାସ୍କିତ ଡ଼ୁଗ୍ଦେଂ ଆଡ଼୍ନାତ୍ କି? ନିନ୍ଦାକିନାକାନ୍ କେତ୍ନି ହିକ୍ୟା ୱାରିୟା ଆଉନ୍, ହେୱାନ୍ ଗିଆନି ଲାଗାଂ ହାଲୁନ୍ । ୱାରିନିକା ମାନ୍ ୱେଇଦିଂ ୱାରି କିନାତ୍; ଆରେ, ମାନ୍ନି ଦୁକ୍ତ ୱାସ୍କି ବାଙ୍ଗା ଆନାତ୍ । ବୁଦିକାର୍ୟାତି ମାନ୍ ଗିୟାନ୍ ଡେକ୍ନାତ୍; ମତର୍ ମୁର୍କର୍ତି ୱେଇ ଅଗିୟାନି ଆହ୍ର କିନାର୍ । ଦୁକି ମାନାୟାର୍ ସବୁ ନାଜିଂ କାକୁଲ୍ତି; ମତର୍ ଇନେନ୍ ୱାରି ମାନ୍ଗାନାତ୍, ହେୱାନ୍ତି ଦିନ୍କେ ୱାରି ମାନାତ୍ । ଗଣ୍ଡ୍ଗଲ୍ତ କିଜ଼ି ବେସି ସମ୍ପତି ଆନି ବାଟା ନିତ୍ରେମାପ୍ରୁତି ପାଣ୍ଡ୍ରୁ ଆସି ଅଲପ୍ ମାନାକା ହାର୍ । ଡାରା ଲାହାଂ ଦୁମା କଡିଜେଇ ବଜି ବାଦୁଲ୍ ଜିଉ ମାନି ବାହାତ ଡାଡ଼୍କୁଚା ତିନାକା ହାର୍ । ରିସା ମାନାୟ୍ କଲି ଉବ୍ଜାୟ୍ କିନାନ୍; ଆରେ, ରିସା ଆୱି ମାନାୟ୍ ଗଣ୍ଡ୍ଗଲ୍ ଚିମ୍ରା କିନାନ୍ । ନିସ୍ତାୟ୍ ହାଜ଼଼ି ୱାଡ଼ିଂବାଡ଼୍ ଲାକେ, ମତର୍ ହୁଦାର୍ତି ମାନାୟ୍ ହାଜ଼ି ଅହାର୍ ଲାକେ କିୟାନାତ୍ । ଗିଆନି ମାଜ଼଼ି ଆବାତି ୱାରିକିନାକା ଉବ୍ଜାୟ୍ କିନାନ୍; ମତର୍ ମୁର୍କିୟା ମାଜ଼଼ି ଜାର୍ ଆୟାଙ୍ଗ୍ ଗିଣ୍ ଇନାନ୍ । ବୁଦିହିଲ୍ୱି କାଜିଂ ଅଗିୟାନି ୱାରିନିକା; ମତର୍ ବୁଦିକାରିୟା ମାନାୟ୍ ଜାର୍ ହାନାକା ସଲକ୍ କିନାନ୍ । ହାର୍ଦି କାତା ଅବାବ୍ତ ହାନ୍ଦାୟ୍କିନାକା ବେକାର୍ ଆନାତ୍; ମତର୍ ବେସି ନେତାର୍ ହୁକେ ହେଦାଂ ତିର୍ ଆନାତ୍ । ଜାର୍ ୱେଇନି ଉତର୍ତ ମାନାୟ୍ତି ୱାରି ଆନାତ୍, ଆରେ ସମାନ୍କାଡ଼୍ନି କାତା ଇନେସ୍ ହାର୍ ! ତାରେନ୍ନି ପାତାଲ୍ତ ପିହ୍ନି କାଜିଂ ବୁଦିକାରିୟା ମାନାୟ୍ କାଜିଂ ଜିବୁନ୍ନି ହାଜ଼଼ି ଜପି ହାନାତ୍ । ଆକ୍ରିୟା ମାନାୟ୍ନି ଇଲ୍ ନିତ୍ରେମାପ୍ରୁ ଉନ୍ଦି ତୁହିହିନାନ୍; ମତର୍ ରାଣ୍ଡିତି ହାନ୍ଦି ହେୱାନ୍ ତିର୍ କିନାନ୍; ବାନ୍ୟାହାନ୍ଦାୟ୍ ନିତ୍ରେମାପ୍ରୁତି ଲାଗାଂ ଗିଣ୍ନି ବିସ୍ରେ; ମତର୍ ହଲ୍ନି ବେରଣ୍ ସକଟ୍ । ଲବ୍ରା ଜାର୍ ଟଣ୍ଡାର୍ବାଇରିଂ ଦୁକ୍ ହିନାନ୍, ମତର୍ ଇମ୍ଣି ମାନାୟ୍ ଲାଞ୍ଚ୍ ଗିଣ୍ କିନାନ୍, ହେୱାନ୍ ବାଚାଆନାନ୍ । ଦାର୍ମିର୍ତି ମାନ୍ ବାବି କିଜ଼଼ି ଉତର୍ ହିନାନ୍; ମତର୍ ଦୁସ୍ଟର୍ତି ୱେଇ ବାନ୍ୟା କାତା ଇନାନ୍ । ନିତ୍ରେମାପ୍ରୁ ଦୁସ୍ଟର୍ତାଂ ଦେହା ମାନ୍ଗାନାନ୍; ଆରେ, ଦାର୍ମିର୍ତି ପାର୍ତାନା ହେୱାନ୍ ୱେନାନ୍ । ଚନ୍ଞ୍ଚଲ୍ ମୁମ୍ ମାନ୍ତିଂ ୱାରି କିନାତ୍; ଆରେ, ହାର୍ଦି କାବୁର୍ ପ୍ଡେକୁକାଂ ସାକ୍ତି କିନାତ୍ । ଇମ୍ଣି ମାନାୟ୍ ଜିବୁନ୍ନିକା କେତ୍ନି ହିକ୍ୟା ୱେନାନ୍, ହେଦାଂ ଗିଆନିର୍ ବିତ୍ରେ ବାହା କିନାତ୍ । ଇମ୍ଣି ମାନାୟ୍ ସାସନ୍ ମାନିକିଉନ୍, ହେୱାନ୍ ଜାର୍ ପାରାଣ୍ତିଂ ବେକାର୍ ଇନାନ୍; ମତର୍ ହାର୍କାଜିଂ କେତ୍ନି ହିକ୍ୟା ଇନେନ୍ ୱେନାନ୍, ହେୱାନ୍ ବୁଦି ପାୟାନାନ୍ । ନିତ୍ରେମାପ୍ରୁ ବିସ୍ରେନି ପାଣ୍ଡ୍ରୁ ଗିୟାନିକା ହାର୍ଦି ହିକ୍ୟା; ଆରେ, ହୁଦାର୍ ଗାଜା ପାଣ୍ ମୁମ୍ଦ ମାନ୍ଗାନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.