Pengo Bible
ହିତପଦେସ 14
ବୁଦିକାରିୟାଣି କଗ୍ଲେ ଜାର୍ ଇଲ୍ ରଚ୍ନାତ୍; ମତର୍ ଅଗିୟାନି ନିଜ୍ କେଇଦ ହେଦାଂ ନସ୍ଟ କିନାତ୍ । ଇନେନ୍ ଜାର୍ ସଲ୍କେ ବେବାର୍ କିନାନ୍, ହେୱାନ୍ ନିତ୍ରେମାପ୍ରୁଙ୍ଗ୍ ପାଣ୍ଡ୍ରା ଆନାନ୍; ମତର୍ ବିନେ ତାଂନାକାନ୍ ନିତ୍ରେମାପ୍ରୁଙ୍ଗ୍ ବେକାର୍ କିନାନ୍ । ଅଗିଆନି ୱେଇଦ ଆକାର୍ନି ଟେଙ୍ଗା ମାନ୍ଗାନାତ୍; ମତର୍ ଗିୟାନି ମାନାୟ୍ତି ୱେଇଦାଂ ହେୱାରିଂ ରାକ୍ୟା କିନାନ୍ । ଇନେର୍ ତାକେ ବଇଲାଂ ହିଲିତିସ୍ କୁଣ୍ଡ୍ ନିର୍ମଲ୍ ମାନାତ୍, ହେୱାନ୍ ତାକେ ତାସ୍ ହିଲୁତ୍, ବଇଲାଂ ସାକ୍ତିତାଂ ବେସି ଦନ୍ ଉବ୍ଜା ଆନାତ୍ । ପାର୍ତିନି ସାକି ମିଚ୍ ଇନୁନ୍; ମାତର୍ ସତ୍ହିଲ୍ୱି ସାକି ମିଚ୍ ଇନ୍ୟାନାତ୍ । ନିନ୍ଦା କିନାକାନ୍ ଗିଆନ୍ ଡେକ୍ତିସ୍ ପାୟା ଆଉନ୍; ମତର୍ ବୁଦିକାରିୟା କାଜିଂ ଗିଆନ୍ ଆଡ଼୍ୱା । ମୁର୍କିୟା ଲାଗାଂ ହାଚିସ୍, ଏପେଙ୍ଗ୍ ହେୱାନ୍ତି ଗିୟାନ୍ ୱେଇ ହୁଡ଼଼ୁଦେର୍ । ଚାତୁର୍ ମାନାୟ୍ ଗିୟାନ୍ ଲାହାଙ୍ଗ୍ ଜାର୍ ହାସିତିଂ ବାବି କିନାନ୍ ମାତର୍ ମୁର୍କିୟାର୍ ଅଗିୟାନ୍ ଲାହାଙ୍ଗ୍ ଟକାୟ୍ କିନାର୍ । ଅଗିୟାନିର୍ ଦସ୍ତିଂ ବେକାର୍ ଇନାର୍; ମତର୍ ଦାର୍ମି ମୁମ୍ଦ ମାନାୟାର୍ତି ବିତ୍ରେ ଦୟା ମାନ୍ଗାନାତ୍ । ୱାସ୍କିତ ଜାର୍ତି ଦୁକ୍ ପୁନାନ୍; ଆରେ, ଜାଣାହିଲ୍ୱି ମାନାୟ୍ ତା ୱାରିତ ୱାରି କିଉନ୍ । ଦୁସ୍ଟର୍ତି ଇଲ୍ ନସ୍ଟ ଆନାତ୍; ମତର୍ ହୁଦାର୍ ମାନାୟାର୍ତି ତୁମ୍ ଡ୍ରିଙ୍ଗୁତ୍ । ମାନାୟ୍ତି କାଣ୍କୁତ ଇମ୍ଣି ଇମ୍ଣି ହାଜ଼଼ି ସଲ୍କେ ଚଞ୍ଜ୍ନାତ୍; ମତର୍ ତାଦି ହାରିହାରା ହାକିନି ହାଜ଼଼ି ମାନାତ୍ । ଗ୍ଡାଇନି ସମୁତ ମାନ୍ଦୁକ୍ ଆନାତ୍; ଆରେ, ୱାରି ହାରିହାରା ଦୁକ୍ ଆନାତ୍ । ୱାସ୍କିତ ବିନେହାନାକାର୍ ଜାର୍ ବେବାର୍ନି କାଜିଂ ବାର୍ତି ଆନାତ୍; ଆରେ। ହାର୍ଦି ମାନାୟ୍ ଜାର୍ତାଂ ପାଞ୍ଜ୍ନାନ୍ । ବୁଦିହିଲ୍ୱି ମାନାୟ୍ ସବୁ କାତା ପାର୍ତି କିନାର୍; ମତର୍ ଚାତୁର୍ ମାନାୟ୍ ଜାର୍ତି ସବୁ ତାଙ୍ଗ୍ନାକା ହାର୍ କିଜ଼଼ି ବୁଜାଆନାନ୍ । ଗିୟାନି ମାନାୟ୍ ପାଣ୍ଡ୍ରା ଆନାନ୍ ଆରି ବାନ୍ୟାତିଂ ପିହ୍ନାନ୍; ମତର୍ ମୁର୍କିୟା ମାନାୟ୍ ଗରବ୍ ଆଜ଼଼ି ସାହାସ୍ ଆନାନ୍ । ଇନେନ୍ ତ୍ରିପ୍କୁ ରିସା ଆନାନ୍, ହେୱାନ୍ ଅଗିୟାନି କାମାୟ୍ କିନାନ୍; ଆରେ, ବାନ୍ୟା ହାନ୍ଦାୟ୍କିନାକାନ୍ ନିର୍ବୁଦିୟା ମାନାୟ୍ ଗିଣ୍ନି ଜଗ୍ । ଜାଗ୍ରତ୍ହିଲ୍ୱି ମାନାୟାର୍ ବୁଦିହିଲ୍ୱି ଆଦିକାର୍ ପାୟାନାର୍; ମତର୍ ଚାତୁର୍ ମାନାୟ୍ ଗିୟାନ୍ବାର୍ତି ଇନାମ୍ ତୁସ୍ନାର୍ । ବାନ୍ୟା ଲଗୁ ହାର୍ଦି ମାନାୟାରିଂ ମୁମ୍ଦ ମେଣ୍ଡାଂକୁନ୍ଦି କିନାର୍, ଦୁସ୍ଟର୍ ଦାର୍ମିର୍ ଦୁୱେର୍ତ ଡାଣ୍ଡାହାଣ୍ ଆନାର୍ । ଅର୍କିତ୍ ଜାର୍ ପାଡ଼୍ହାଇଞ୍ଜାକାର୍ ନେ ଗିଣ୍ ଆନାନ୍; ମତର୍ ମାଜାନ୍ତିଂ ବେସି ବନ୍ଦୁ ମାନ୍ଗାନାର୍ । ଇମ୍ଣି ମାନାୟ୍ ପାଡ଼୍ହା ଇଞ୍ଜାକାରିଂ ବେକାର୍ ବାବି କିନାନ୍, ହେୱାନ୍ ପାପ୍ କିନାନ୍; ମତର୍ ଇମ୍ଣି ମାନାୟ୍ ହିଲ୍ୱାକାରିଂ ଦୟା କିନାନ୍, ହେୱାନ୍ ଦନ୍ୟ । ବାନ୍ୟା ଚିନ୍ତାକିନାର୍ ଇନାକା ବୁଲ୍କା ଆଉର୍ ? ମତର୍ ହାର୍ଦି ଚିନ୍ତା କିନାକାର୍ କାଜିଂ ଦୟା ଆରି ସତ୍ ଗିଟାନାତ୍ । ସବୁ ବାନିନି କସ୍ଟତ ପାଡ଼୍ ମାନାତ୍; ଆରେ, କାମାୟ୍ କିୱାଦାଂ କେବଲ୍ କାତା ଇଚିସ୍ ହେଦାଂ ଅର୍କିତ୍ ଆନାତ୍ । ଅଗିୟାନିର୍ତି ମୁକୁଟ୍ ହେୱାର୍ତି ଦନ୍ ଆନାତ୍; ଆରେ, ମୁର୍କର୍ତି କେବଲ୍ ଅଗିୟାନ୍ ମାନାତ୍ । ହାତ୍ପା ସାକି ବିନ୍ ଜିବୁନ୍ତିଂ ରାକ୍ୟା କିନାତ୍; ମତର୍ ମିଚ୍ଇନାକାନ୍ ସାକି ଟକାୟ୍ କିନାନ୍ । ନିତ୍ରେମାପ୍ରୁ ବିସ୍ରେନି ପାଣ୍ଡ୍ରୁ ଡାଟ୍ ପାର୍ତିନିକା; ଆରେ, ହେୱାନ୍ତି ମାଜ଼଼ିର୍ ଆହ୍ର ବାହା ପାୟାନାର୍ । ହାକି ଡ଼ୁକାତାଂ ମାସ୍ତିନି କାଜିଂ ନିତ୍ରେମାପ୍ରୁ ବିସ୍ରେନି ପାଣ୍ଡ୍ରୁ ଜିବୁନ୍ନି ଜାରାଣ୍ ଲାକେ । ବେସି ମାନାୟାର୍ ଆତିସ୍ ରାଜାର୍ତି ଜାଜ୍ମାଲ୍ କିନାର୍; ଆରେ, ମାନାୟାର୍ ଅବାବ୍ତ ଆତିସ୍ ବିଚାର୍ କାରିୟାର୍ ନାସ୍ ଆନାର୍। ଇନେନ୍ ରିସା ଆନିତ ହୁଦାର୍, ହେୱାନ୍ ବେସି ବୁଦିକାରିୟା; ଆରେ, ତ୍ରିପ୍କୁ ରିସାନି ଅଗିୟାନି ଆନାନ୍ । ହୁଦାର୍ ମାନ୍ତିନି ଗାଗାଡ଼ନି ଜିବୁନ୍ ଲାକେ; ଆରେ, ଡାରା ପ୍ଡେନ୍ନି ଜିରାନି ଲାକେ । ଇମ୍ଣି ମାନାୟ୍ ଅର୍କିତ୍ତିଂ ଉତ୍ପାତ୍ୟା କିନାନ୍, ହେୱାନ୍ ତା ଉବ୍ଜାୟ୍ କିତାକାନିଂ ନିନ୍ଦା କିନାନ୍; ଆରେ, ଇନେନ୍ ଅର୍କିତ୍ତିଂ ଦୟା କିନାନ୍, ହେୱାନ୍ ହେୱାନିଂ ୱାରି କିନାନ୍ । ଦୁସ୍ଟ ମାନାୟ୍ ଜାର୍ ବାନ୍ୟା କାମାୟ୍ କିନାକାନିଂ ପେସ୍ନାର୍, ମତର୍ ହାନିକାଡ଼୍ଦ ଦାର୍ମିତି ଆହ୍ର ମାନ୍ଗାନାତ୍ । ଗିଆନ୍ ବୁଦିକାରିଆ ଗାଗାଡ଼୍ତ ମାନ୍ଗାନାତ୍; ଆରେ, ମୁର୍କିୟାତି ମାନ୍ତ ବାବ୍ନା ପୁନ୍ୟାନାତ୍ । ଦାର୍ମିକାତା ରାଜିନି ଉନ୍ତି ହପ୍ନାତ୍; ମତର୍ ପାପ୍ ନାର୍ତିଂ ଅପ୍ମାନ୍ । ବୁଦିକାରିୟା ଆଡ଼଼ିୟା ରାଜାତି ସାରିନିକାନ୍; ଆରେ, ଇନେନ୍ ଲାଜୁ ଆନାନ୍, ତା କାଜିଂ ହେୱାନ୍ ରିସା ଆନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.