Pengo Bible
ହିତପଦେସ 13
ଗିଆନ୍ନି ମାଜ଼ି
ଗିଆନ୍ନି ମାଜ଼଼ି ଜାର୍ ଆବାତି ହିକ୍ୟା ୱେନାନ୍; ମତର୍ ଦିନ୍ଦା କିନାକାନ୍ କେତ୍ନାକା ୱେନୁନ୍ । ମାନାୟ୍ ଜାର୍ ୱେଇନି ପାଡ଼୍ ହୁଦାଂ ହାର୍ ବଗି କିନାନ୍; ମତର୍ ବିସାସ୍ତ ବିସ୍ହିନାକାନ୍ ପାରାଣ୍ ଉତ୍ପାତ୍ୟା ବଗି କିନାନ୍ । ଇମ୍ଣି ମାନାୟ୍ ଜାର୍ ୱେଇଦ ଟେବାୟ୍ କିନାନ୍, ହେୱାନ୍ ଜାର୍ ପାରାଣ୍ ରାକ୍ୟା କିନାନ୍; ମତର୍ ଇନେନ୍କି ଚିନ୍ତା କିୱାଦାଂ କାତା ଇନାନ୍, ହେୱାନ୍ତି ନାସ୍ ଆନାତ୍ । ନିସ୍ତାୟ୍ ମାନ୍ତ ଆହା କିତିସ୍ ପା ଇନାକା ପାୟା ଆଉନ୍, ମତର୍ କାମ୍ଲିୟା ପାରାଣ୍ ମଜ୍ବୁତ୍ ଆନାନ୍ । ଦାର୍ମି ମାନାୟ୍ ମିଚ୍ତିଂ ଗିଣ୍ କିନାନ୍; ମତର୍ ଦୁସ୍ଟ ମାନାୟ୍ ଗାନ୍ଦାନାକାନ୍ ଲାକେ, ଆରେ ହେୱାନ୍ ଲାଜ୍ କୁଗାନାନ୍ । ଦାର୍ମିକାତା ହୁଦାର୍ ହାଜ଼଼ିହାନାକାରିଂ ରାକ୍ୟା କିନାନ୍; ମତର୍ ଦୁସ୍ଟକାତା ପାପିରିଂ ଉଲ୍ଟାୟ୍ କିନାତ୍ । ଇନେର୍ ଜାର୍ତିଂ ଦନି ଚଚ୍ନାନ୍, ମାତର୍ ହେୱାନ୍ତି ଇନାକାପା ଆକାୟ୍; ଇନେର୍ କି ଜାର୍ତିଂ କାକୁଲ୍ତି ଚଚ୍ନାନ୍, ମାତର୍ ହେୱାନ୍ତି ବେସି ଦନ୍ ମାନାତ୍ । ମାନାୟ୍ତି ଜିବୁନ୍ ବାଦୁଲ୍ ଜାର୍ ଦନ୍ ହିଦେଂ ଆଡ୍ନାନ୍; ମତର୍ ଅର୍କିତ୍ ଲଗୁ ଦାକା ୱେନୁନ୍ । ଦାର୍ମିର୍ତି ଅଜଡ଼୍ ୱାରି କିନାତ୍; ମତର୍ ଦୁସ୍ଟର୍ତି ଅଜଡ଼୍ ପାଗ୍ୟାନାତ୍। ଆକାର୍ତାଂ କେବଲ୍ ଗଣ୍ଡ୍ଗଲ୍ ହପ୍ନାର୍; ମତର୍ ହାର୍ ହିକ୍ୟା ଇଟ୍ନାକାରିଂ ବୁଦି ମାନାତ୍ । ମିଚ୍ତ ପାୟାତି ଦନ୍ ବୁଡା ଆନାତ୍, ମତର୍ କେଇଦାଂ ଆର୍ଜାତି ଦନ୍ ବାଡା ଆନାତ୍ । ଆହା ପୁରାନାକା ବିଲମ୍ ଆତିସ୍ କସ୍ଟ ଆନାତ୍; ମତର୍ ବାଚାତି ମାନ୍ ହାର୍ଦି ଜିବୁନ୍ ମାର୍ ଲାକେ । ଇମ୍ଣି ମାନାୟ୍ ଇସ୍ୱର୍ତି ହିକ୍ୟା ବେକାର୍ ଇନାନ୍, ହେୱାନ୍ ଜାର୍ ଜପିତିଂ ନାସ୍ ତେନାନ୍; ମତର୍ ଇନେନ୍ ବଲ୍ତିଂ ପାଣ୍ଡ୍ରାନାନ୍, ହେୱାନ୍ ଇନାମ୍ ପାୟା ଆନାନ୍ । ହାକିନି ଡ଼ୁକାତାଂ ବାଚାନି ମାନାୟ୍ କାଜିଂ ଗିଆନ୍ନି ବିଦି ଜିବୁନ୍ ଚୁରାଣ୍ ଲାକେ ଆନାତ୍ । ହାର୍ ବୁଦିନି ପାଡ଼୍ ଦୟା, ମତର୍ ବିସାସ୍ତ ବିସ୍ହିନି ହାଜ଼଼ି କାଲ୍କୁଡ଼ି ଆନାତ୍ । ୱିଜ଼଼ାର୍ ଚାତୁର୍ ମାନାୟ୍ ବୁଦିତ କାମାୟ୍ କିନାନ୍; ମତର୍ ମୁର୍କ ଅଗିୟାନି କାତା ମେଙ୍ଗି କିନାନ୍ । ବାନ୍ୟାତି କାବୁର୍ ୱେଚ୍ନାକାନ୍ ସନିତ ପଡ଼ାନାନ୍; ମତର୍ ପାର୍ତିନି କାବୁର୍ ୱେଚ୍ନାକାନ୍ ହାର୍ମାନାନ୍ । ଇମ୍ଣି ମାନାୟ୍ ସାସନ୍ ମାନିକିଉନ୍, ହେୱାନ୍ ଅର୍କିତିରିଂ ଆରି ଲାଜୁ ଆନାନ୍; ମତର୍ ଇନେନ୍ କେତ୍ନାକା ଆହ୍ନାନ୍, ହେୱାନ୍ ମାନି ପାୟାନାନ୍ । ମାନ୍ତି ଇଚା ସପଲ୍ ଆତିସ୍ ପାରାଣ୍ତିଂ ହୱାଦ୍ ଆନାତ୍; ଆରେ, ମୁର୍କିୟା ମାନାୟ୍ ଗିଣ୍ ବିସ୍ରେ । ଅଗିୟାନି ରଚେ ବୁଲାଚାଲା କିୟାଟ୍, ହେବେନି ଏପେଙ୍ଗ୍ ଗିଆନି ଆନାଦେର୍; ମତର୍ ମୁର୍କର୍ତି ଲାହାଂ ମେହାତିସ୍ କସ୍ଟ ପାୟାନାନ୍ । ପାପିର୍ତି ପାଚେ ବାନ୍ୟା ଏକାନାତ୍; ମତର୍ ଦାର୍ମିରିଂ ହାର୍ଦାକା ଇନାମ୍ ହିୟାନାତ୍ । ହାର୍ଦି ମାନାୟ୍ ଜାର୍ ନାତିର୍ କାଜିଂ ଆଦିକାର୍ ପିହ୍ନାତ୍; ମତର୍ ପାପିର୍ତି ଦନ୍ ଦାର୍ମିର୍ତି କାଜିଂ ରୁଣ୍ଡା ଆନାତ୍ । ଅର୍କିତ୍ତି ଚାସ୍ ହୁକେ କାଦିନି ବେସି ଆନାତ୍; ମତର୍ ଅନ୍ୟାୟ୍ କାଜିଂ ଇନେ ଇନେର୍ତି ନାସ୍ ଆନାତ୍ । ଇନେନ୍ ବେଡ୍ଗା ବେବାର୍ କିଦେଂ ମୁନା କିନାନ୍, ହେୱାନ୍ ଜାର୍ ମାଜ଼଼ିଙ୍ଗ୍ ଗିଣ୍ କିନାନ୍; ଆରେ ଇନେନ୍ ତାଙ୍ଗ୍ ଜିଉନନାନ୍, ହେୱାନ୍ ସମାନ୍କାଡ଼୍ଦ କସ୍ଟ ହିଦ୍ନାନ୍ । ଦାର୍ମି ଜାର୍ ପାରାଣ୍ନି ପାଞ୍ଜ୍ନି ପାତେକ୍ ତିନାନ୍, ମତର୍ ପାପିର୍ତି ବାର୍ତ ପାଞ୍ଜ୍ୱାଦାଂ ମାନ୍ଗାନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.