Baghlayani Bible
निर्गमन 12
फसह रा त्योआर
तेबे यहोवे मिस्र देशो दे मूसा ओर हारूणो खे बोलेया, “ये मीन्ना तुसा माणूंआ खे शुरूओ रा ठईरो, मतलब सालो रा पईला मीन्ना येई ठईरो। इस्राएलो रिया सारी मण्डल़िया खे ईंयाँ बोलो कि इजी मीन्ने रे दसुए दिने तुसे सब आपणे-आपणे पितरो रे कराने रे मुताबिक, एकी कराने खे एक मिन्टू लई राखो ओर जे केसी रे करानेया रे एक मिन्टू खाणे खे माणूं कम ओ, तो सेयो आपणे सबी ते नेड़े रणे वाल़े पड़ोसिया साथे तिना री गिणतिया रे मुताबिक एक मिन्टू लई राखो ओर तुसे हर एकी रे खाणे रे मुताबिक मिन्टूआ रा साब करना। तुसा रा मिन्टू बिना नुक्शो रा ओर पईले सालो रा नर ओ ओर से चाए पेडा बीचा ते लणा, चाए बाकरिया बीचा ते। ओर तुसे एते मीन्ने रे चौदुए दिनो तक से राखी की छाडी देणा ओर तेस दिने सूरजो रे छिपणे रे बखते, इस्राएलो री सारिया मण्डल़िया रे लोक तेसखे बलिदान करो। तेबे सेयो तेसरे खूनो ते कुछ लई की जिना कअरो रे मिन्टू खाणा, तिना रे द्धारो री साखा ओर पाँदली चौखटा रे सिरे पाँदे लगाओ। ओर सेयो तेसरे मासो खे तेसी ई राती आगी रे पूजी की बिना सजेड़े रिया रोटिया साथे ओर कड़ुए सागो साथे खाओ। से सिर, पैर, ओर आंतड़िया साथे आगी रे पूजी की खाणा, काच्चा या पाणिए बीचे कुछ बी पकाई की नि खाणा। तेते बीचा ते प्यागा खे कुछ नि राखणा ओर जे प्यागा खे कुछ बची बी जाओ, तो से आगी बीचे फूकी देणा। ओर तिजी खे खाणे रा तरीका ये ए कि लक बानी की, पैरो रे जोड़े पईनी की ओर आथो रे सोठी लई की से फटाफट खाणा; से तो यहोवे रा फसह रा त्योआर ऊणा। कऊँकि तेसा राती रे मां मिस्र देशो रे बिछिए ऊई की जाणा ओर मिस्र देशो रे माणूं, डांगर, सबी रे जेठे बच्चे मारने ओर मिस्रो रे सारे देवतेया खे बी मां सजा देणी; कऊँकि आऊँ यहोवा ए। ओर जिना कअरा रे तुसे रणे तिना पाँदे से खून तुसा रिया तँईं चिह्न ठईरना; मतलब मां से खून देखी की तुसे छाडी देणे ओर जेबे मां मिस्र देशो रे माणूं मारने, तेबे से मुसीबत तुसा पाँदे नि पड़नी ओर तुसे खत्म नि ऊणे। ओर से दिन तुसा खे याद दलाणे वाल़ा दिन ऊणा, तुसे से यहोवे खे त्योआर करी की मनाणा; ओर से दिन तुसा री पीढ़िया खे सदा री रवाज जाणी की त्योआर मानेया जाओ।
बिना सजेड़े री रोटी
“साता दिना तक बिना सजेड़े रिया रोटिया खाया करनिया, तिना बीचा ते पईले दिने आपणे-आपणे कअरो ते सजेड़ा चकी देणा, बल्कि जो पईले दिनो ते लई की सातुए दिनो तक कोई सजेड़ी रोटी खाओ, से माणूं इस्राएलिया बीचा ते निकाल़ेया जाओ। त्योआरो रे पईले दिने यहोवे री आराधना खे एक पवित्र सभा ओर सातुए दिने बी एक पवित्र सभा करनी ओर तिना दुँईं दिना रे कोई काम नि करना, सिर्फ माणूंआ खे रोटी बणाओ बस इतना ई काम करी सकोए। इजी रिया तँईं तुसे बिना सजेड़े रिया रोटिया रा त्योआर मानणा, कऊँकि तेस ई दिने मानो मैं तुसे चूण्ड-चूण्ड करी की मिस्र देशो ते निकयाल़ी राखे, इजी बजअ ते से दिन तुसा रिया पीढ़िया रे सदा री रवाज जाणी की मानेया जाओ। पईले मीन्ने रे चौदुए दिनो री साँजा ते लई की इक्खिये दिनो री साँजा तक तुसे बिना सजेड़े रिया रोटिया खाया करनिया। साता दिना तक तुसा रे कअरे कुछ बी सजेड़ा ना रओ, बल्कि जो कोई बी सजेड़ी रोटी खाओगा, चाए से देसी ओ चाए परदेशी, से माणूं इस्राएलिया री मण्डल़िया ते निकाल़ेया जाणा। कोई सजेड़ी चीज नि खाणी; सबी आपणे कअरे बिना सजेड़े रिया रोटिया खाया करनिया।”
पईला फसह रा त्योआर
तेबे मूसे इस्राएलिया रे सब स्याणेया खे बुलाई की बोलेया, “तुसे आपणे कुला रे मुताबिक एक-एक मिन्टू तिना रे चूण्डो बीचा ते लग करी की राखी देओ ओर फसह रे दिने से बलि करना ओर तेसरा खून जो तसले बीचे ऊणा, तिदे जूबा रा एक गुच्छा डबोई की तेसी तसले रे खूने की द्धारो री चौखटा रे सिरे पाँदे ओर दुँईं तरफा री साखा पाँदे कुछ लगाणा; ओर प्यागा तक तुसा बीचा ते कोई बी कअरो ते बारे नि निकल़ो। कऊँकि यहोवा देशो रे बीचे ऊई की मिस्रिया खे मारदा ऊआ जाणा; मतलब जेती-जेती से चौखटा रे सिरे ओर दुँईं तरफा री साखा पाँदे खून देखोगा, तेती-तेती तेस से द्धार छाडी देणा ओर खत्म करने वाल़े तुसा रे कअरे मारने खे जाणे नि देणे। तेबे तुसे ये बिदी आपू खे ओर आपणे वंशो खे सदा री रवाज जाणी की मानेया करनी। जेबे तुसे तेस देशो दे जो यहोवे आपणे कईणे रे मुताबिक तुसा खे देणा, तेबे तुसे तिदे जांदे बखते एसा रवाजा खे मनाया करेयो। ओर जेबे तुसा रे बाल-बच्चे तुसा ते पूछो, ‘एते त्योआरो रा क्या मतलब ए?’ तेबे तुसे तिना खे ये जबाब देणा, यहोवे जो मिस्रिया खे काणे रे बखते मिस्रो रे रणे वाल़े आसा इस्राएलिया रे कअरो खे छाडी की आसा रे कअर बचाए, इजी बजअ ते यहोवे री महिमा खे फसह रा ये बलिदान कित्तेया जाओआ।” तेबे लोके चूकी की माथा तेकेया। तेबे जो आज्ञा यहोवे मूसे ओर हारूणो खे दित्ती थी, इस्राएलिये जाई की तेड़ा ई कित्तेया।
दसी मुसीबत–जेठे बच्चेया री मौत
एड़ा ऊआ कि आदिया राती यहोवे मिस्र देशो रिया राजगद्दिया पाँदे बैठणे वाल़े फिरौनो ते लई की, जेला रे पड़े रे बंदुआ तक, सबी रे पईले बच्चे, बल्कि डांगरा तको रे सबी रे पईले बच्चे काई ते।
ओर फिरौन राती ई उठी की बैठेया ओर तेसरे सब काम करने वाल़े, बल्कि सारे मिस्री उठे ओर मिस्रो रे बऊत पारी आल्ला-गोला ऊणे लगेया, कऊँकि एक बी एड़ा कअर नि था जिदे कोई मरेया नि ओ। तेबे फिरौने राती ई राती मूसा ओर हारूणो खे बुलाई की बोलेया, “तुसे इस्राएलिया समेत मेरेया लोका बीचा ते निकल़ी जाओ ओर आपणे कईणे रे मुताबिक जाई की यहोवे री पूजा करो। आपणे कईणे रे मुताबिक आपणी पेडा-बाकरिया ओर गाय-बल़दा खे साथे लई जाओ ओर माखे बी आशीर्वाद देई की जाओ।” ओर मिस्री लोके इस्राएली लोका पाँदे दबाओ पाई की बोलेया, “एते देशो ते फटाफट निकल़ी जाओ।” नई तो आसे सब मरी जाणे। तेबे तिने आपणा गूँदा-गूँदाया रा आटा बिना सजेड़े रा ई पण्डारो समेत टाल्लेया रे बानी की आपणियां-आपणियां कांदा पाँदे पाईता। इस्राएलिये मूसे रे कईणे रे मुताबिक मिस्रिया ते सूईने-चाँदिए रे गईणे ओर टाल्ले मांगी ले। ओर यहोवे मिस्री लोक आपणियां प्रजा पाँदे एड़े दयावान बणाए कि तिने जो-जो मांगेया से सब तिना खे दित्तेया। ईंयाँ इस्राएलिये मिस्री लूटी ले।
इस्राएलिया रा मिस्र देश छाडणा
तेबे इस्राएली लोक रामसेस शईरो ते चली की सुक्कोत शईरो खे चले ओर बाल-बच्चेया खे छाडी की सेयो कोई 6 लाख पैदल चलणे वाल़े मर्द थे। तिना साथे मिली-जुली एक पीड़ गयी ओर पेडा-बाकरिया, गाय-बल़द बऊत सारे डांगर बी साथे गये। ओर जो गूँनेया रा आटा सेयो मिस्रो ते साथे लईगे तिजी रिया तिने बिना सजेड़े रिया रोटिया बणाईया, कऊँकि सेयो मिस्रो ते एड़े जबरदस्ती निकयाल़े कि तिना खे मोका नि मिलेया कि बाटा खे कुछ खाणे खे पकाई सको, इजी बजअ ते से गूँदेया रा आटा बिना सजेड़े रा था। मिस्रो रे बसे रे इस्राएलिया खे 430 साल ऊईगे थे। तिना 430 साला रे बीतणे पाँदे, ठीक तेसी ई दिने, यहोवे री सारी प्रजा मिस्र देशो ते निकल़ी गी। यहोवा इस्राएलिया खे मिस्र देशो ते निकयाल़ी की ली आया, इजी बजअ ते से रात, यहोवे री महिमा खे मानणे जोगी ए; ये यहोवे री सेई रात ए, जेतेरा पीढ़िया-पीढ़िया तक मानणा इस्राएलिया खे बऊत जरूरी ए।
फसह रे त्योआरो री बिधि
तेबे यहोवे मूसा ओर हारूणो खे बोलेया, “फसह रे त्योआरो री बिधि ये ए; कोई परदेशी तिजी ते नि खाओ; पर जो केसी रा मोलो रा दास ए ओर तुसे तेसरा खतना करी राखेया ओ, से तो तिजी बीचा ते खाई सकोआ। पर परदेशी ओर मजदूर तिजी बीचा ते नि खाओ। तेसरा खाणा एक ई कअरो रे ओ; मतलब तुसे तिजी रे मासो बीचा ते कुछ बी बारे नि निणा ओर बलिया रे डांगरो री कोई बी आड्डी नि तोड़नी। फसह रा त्योआरो खे मानणा इस्राएलिया री सारी मण्डल़िया रा फर्ज ए। ओर जे कोई परदेशी तुसा साथे रयी की, यहोवे खे फसह रा त्योआर मनाणा चाओ, तो से आपणे कअरो रे सबी मर्दा रा खतना कराओ, तेबे से नेड़े आई की तिजी खे मनाओ ओर से देसी माणूंए जेड़ा ठईरना। पर कोई बिना खतना करे रा माणूं तिजी बीचा ते नि खाओ। तिजी रा बिधि-बिधान देसी ओर तुसा बीचे रणे वाल़े परदेशी दुँईं खे एक ई ओ।” ये आज्ञा जो यहोवे मूसे ओर हारूणो खे दित्ती तिजी रे मुताबिक सारे इस्राएलिये कित्तेया। ओर ठीक तेसी ई दिने यहोवा इस्राएलिया खे मिस्र देशो ते चूण्ड-चूण्ड करी की निकयाल़ी की लईगा।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.