Baghlayani Bible
निर्गमन 13
पईले बच्चेया रा चढ़ावा
तेबे यहोवे मूसे खे बोलेया, “तुसे क्या इस्राएली माणूंआ रे ओर क्या डांगरा रे जितणे बी आपणियां-आपणियां माया रे पईले बच्चे नर ओ सेयो माखे पवित्र मानणे; से तो मेरे ईए।”
बिना सजेड़े री रोटिया रा त्योआर
तेबे मूसे माणूंआ खे बोलेया, “ये दिन याद राखो, जिदे तुसे माणूं गुलामिया रे देश, मतलब मिस्रो ते निकल़ी की आयी रे, यहोवा तो तुसा खे तेथा ते आपणे सामर्थी आथा री तागती साथे निकयाल़ी की ल्याया; इदे सजेड़ी रोटी नि खाई जाओ। आबीबो रे मीन्ने रे आजके दिनो रे मिस्रो ते तुसे निकल़ी रे। इजी री खातर जेबे यहोवा तुसा खे कनानी, हित्ती, एमोरी, हिब्बी ओर यबूसी माणूंआ रे देशो दे जो सच्चो खेई बऊत ई पजणे वाल़ा ए पऊँचाओ, जेतेखे देणे री यहोवे तुसा रे बुजुर्गा ते कसम खाई थी, तेबे तुसे एते मीन्ने रे एस कामो खे याद करदे ऊए ये त्योआर मनाणा। साता दिना तक बिना सजेड़े रिया रोटिया खाया करनिया ओर सातुए दिने यहोवे रिया तँईं आदर देणे खे त्योआर मनाणा। इना साता दिना रे बिना सजेड़े रिया रोटिया खाया करनिया, मतलब तुसा री पूरी जमीना रे इस्से दे ना सजेड़ी रोटी, ना सजेड़ा तुसा गे देखणे खे आओ। ओर तेस दिने तुसे आपणे-आपणे बच्चे ये बोली की समजयाई देणे कि ये तो आसे तेसी कामो री बजअ ते करूँए जो यहोवे आसा रे मिस्रो ते निकल़ी की आऊणे रे बखते आसा खे कित्तेया था। फेर ये तुसा खे तुसा रे आथो रे ओर तुसा रे माथे पाँदे तुसा रिया आखी बीचे याद राखणे वाल़ा चिह्न ठईरो; जेते की यहोवे री बिदिया तुसा रे मुंए रे रओ, कऊँकि यहोवे तुसे आपणे तागतबर आथो साथे मिस्रो ते निकयाल़े। इजी बजअ ते तुसे ये रवाज हर साल ठराए रे बखतो पाँदे मानेया करनी।”
पईले बच्चे रे नियम
फेर जेबे यहोवा तेते कसमा रे मुताबिक, जो तिने तुसा रे बुजुर्गा ते ओर तुसा ते खाई राखी, तुसा खे कनानिया रे देशो रे पऊँचाई की, से तुसा खे देई देओगा। तेबे तुसा बीचा ते जितणे आपणी-आपणी माया रे पईले बच्चे ओ, सेयो यहोवे खे चढ़ाणे ओर तुसा रे डांगरा रे पईले नर बच्चे बी यहोवे रेईए। गह्दिया रे हर एक पईले बच्चे खे मिन्टू देई की से छुड़ाई लणा ओर जे तुसे तेसखे छुड़ाणा नि चाओ तो तेसरी क्याड़ी तोड़ी देणी। पर आपणे सब जेठे माणूंआ खे बदला देई की छुड़ाई लएओ ओर आऊणे वाल़े दिनो रे जेबे तुसा रे पाऊ तुसा ते पूछो कि ये क्या ए? तो तिना खे बोलणा, “यहोवा आसा माणूंआ खे गुलामिया रे मिस्र देशो ते आपणे सामर्थी आथो री तागती साथे निकयाल़ी की ल्याई राखेया। तेस बखते जेबे फिरौने सख्त ऊई की आसे पेजणा नि चाए, तेबे यहोवे मिस्र देशो रे माणूंआ ते लई की डांगरा तक सबी रे पईले बच्चे काईते। इजी बजअ ते डांगरा बीचा ते जितणे आपणी माया रे पईले नर बच्चे ए, तिना खे आसे यहोवे खे बलि करूँए, पर आपणे सारे जेठे पाऊ बदला देई की छुड़ाई लऊँए। ये तुसा रे आथो रे एक चिह्न ओर तुसा रे माथे पाँदे प्रियूँआ बीचे टीका जा ठईरो; कऊँकि यहोवा आसा लोका खे मिस्रो ते आपणे सामर्थी आथो रिया तागती साथे निकयाल़ी की ल्याया।”
जेबे फिरौने लोका खे जाणे री आज्ञा देईती, तेबे परमेशर ये सोची की तिना खे पलिश्तिया रे देशो रे ऊई की जाणे वाल़ी बाटा रिये जो नेड़े थी तीसिए नि लईगा कि केथी एड़ा नि ओ कि जेबे यो लोक लड़ाई देखो, तेबे सेयो आपणा मन बदली की मिस्रो खे वापस आई जाओ।
सुनसाण जगा री बाट
इजी री खातर परमेशर तिना खे चक्कर लगाई की लाल समुद्रो री तरफा खे सुनसाण जगा रिया बाटा ते लई चलेया। तेबे इस्राएली लोक मिस्रो ते पंग्ति बणाई की सेना जेड़े निकल़ी गे। ओर मूसा यूसुफो री आड्डिया खे साथे ली आया, कऊँकि यूसुफे इस्राएलिया खे ये बोली की कि परमेशरो पक्का तुसा री सम्बाल़ लणी, तिना खे इजी रे बारे दे पक्की कसम खुल़ाई थी कि सेयो तेसरी आड्डिया खे आपू साथे एथा ते लई जाओगे। तेबे तिने सुक्कोतो ते चली की सुनसाण जगा रे कनारे पाँदे एताम नाओं री जगा रे डेरा कित्तेया।
बादल़ो रा खम्बा ओर आगी रा खम्बा
ओर यहोवे तिना खे दिनो खे बाट दखाणे खे बादल़ो रे खम्बे रे ओर राती प्रयासा देणे खे आगी रे खम्बे रे ऊई की तिना ते आगे-आगे चलेया करो था, ताकि सेयो रात ओर दिन दुँईं बखते चली सको। तिने ना तो बादल़ो रा खम्बा दिने ओर ना आगी रा खम्बा राती लोका रे आगे-आगे जाणे ते टाया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.