Kulvi Outer Seraji Bible
फलिप्पी 4:8
Verse 8 is marked below, with the whole chapter around it. Read from the start
भाईओ, तैही बोला हुंह, ज़सरी मुंह झ़ूरी लागा अर ज़ेथ दी मेरअ ज़िऊ लागी रहा, ज़ुंण मेरअ नंद अर मुगट होए, मेरै पैरै भाईओ, प्रभू दी रहा एऊ ई साबै टेक्की।
पल़सीए सलाह
हुंह करा यूदिआ अर सन्तुखे दुही बैहणी का अरज़ कि तम्हैं आसा प्रभू दी एते तैणीं करा आप्पू मांझ़ै सुल्हअ। ए मेरै शुचै साझ़ू हुंह करा ताखा अरज़ कि तूह कर तिन्नां ज़नानीए सुल्है करना लै मज़त। किल्हैकि तिन्नैं आसा मुंह संघै खुशीए समादा कई ज़ैगा पजैल़णां लै क्लेमेंस अर मेरै तिन्नां होरी संघा काम करनै आल़ै संघै बडी मैन्थ किई दी, ज़सरै नाअं ज़िन्दगीए कताबा दी आसा लिखै दै।
प्रभू दी रहा सदा नंद, हुंह बोला एता तम्हां लै भिई कि नंद रहा! सोभी लोगा का लोल़ी शुझुअ कि तम्हैं आसा हर गल्ला दी झणैल़ू। ऐहा गल्ला डाहै आद कि प्रभू एछणअ छ़ेक्कै फिरी।
किछ़ू गल्लो फिकर निं करी, पर हर गल्ला लै करनी परमेशरा का प्राथणां। ज़ुंण थारी ज़रुरत आसा सह खोज़णीं परमेशरा का, अर ज़ुंण बी तेऊ तम्हां लै किअ करनअ तेऊओ शूकर। तेखअ डाहणैं परमेशरे शांती ज़ुंण सोभी मणछे समझ़ा का बागै आसा थारै दिल अर थारै बच़ार मसीहा ईशू दी बच़ाऊई।1
एते तैणीं, ओ भाईओ, ज़ुंण-ज़ुंण गल्ला परमेशरा सम्हनै शुची अर ज़ुंण-ज़ुंण गल्ला अदर करनै जोगी आसा, अर ज़ुंण-ज़ुंण गल्ला धर्मीं आसा, अर ज़ुंण-ज़ुंण गल्ला पबित्र आसा, अर ज़ुंण-ज़ुंण गल्ला शोभली आसा, अर ज़ुंण-ज़ुंण गल्ला मन्नैं भाऊंणै आल़ी आसा, एते तैणीं, ज़ुंण-ज़ुंण गल्ला भली अर बड़ैई करनै जोगी आसा, तिन्नां ई गल्ला दी दैआ धैन। ज़ुंण गल्ला तम्हैं मुखा शिखल़ी, मनी, शूणीं अर मुंह दी भाल़ी, तेऊ ई साबै च़ला, तै रहणअ परमेशर तम्हां संघै ज़ुंण शांती दैणा लै सोबल़ आसा।
दान दैणा लै शूकर
हुंह आसा प्रभू दी नंद अर खुश कि एतरै धैल़ै बाद फिरी तम्हां भिई मेरी आद अर तम्हैं दैनअ मुल्है दान। तम्हैं सोठअ होए एते बारै पैहलै बी कई बारी पर तम्हां निं मोक्कअ भेटअ। हुंह निं एते तैणीं आथी लागअ द बोल्दअ कि मुंह आसा एते गरज़, किल्हैकि मंऐं आसा शिखल़अ द कि ज़ेही हालता दी हुंह आसा, तेथै रहा हुंह खुश। मुखा आसा थोघ कि थोल़ै अर खास्सै दी किहअ करै लागा रहणअ। च़ाऐ हुंह भुखअ होए या रज्ज़ी होए मुखा आसा हर हालता दी ज़िऊंणेंओ राज़ थोघ। मसीहा ज़ुंण मुल्है शगती दैआ तेऊ दी सका हुंह सोभ किछ़ करी।
तैबी किअ तम्हैं भलअ कि मेरै सांगटा दी बी हुऐ तम्हैं दान दैई मेरै साझ़ू।
ओ फलिप्पी नगरीए मेरै भाईओ, तम्हां का आसा थोघ कि खुशीओ समाद खोज़णें शुरू दी ज़धू हुंह थारै मुल्खै मकिदुनिया का आजू डेऊअ, तधू निं तम्हां छ़ाडी होरी कोही बी टोली ढब्बै-धेल्ले बारै मेरी मज़त किई। इहअ ई करै ज़धू हुंह थिस्सलूणी नगरी त, तधू बी छ़ाडै तम्हैं किछ़ ढब्बै मेरी काम्मी-पेशी पूरी करना लै। एकी बारी निं पर दूई बारी पै किई तम्हैं ढब्बै-धेल्लै दैई मेरी ज़रुरत पूरी। इहअ निं कि हुंह च़ाहा दान, पर हुंह च़ाहा इहअ कि तम्हैं ज़ुंण मुल्है भलाई किई परमेशर तम्हां लै तेतो फल दैए।
मुखा आसा सोभै गल्ला, बोले, खास्सअ बी आसा, ज़ुंण च़िज़ा तम्हैं इपफ्रदीतुस भाईए हाथै छ़ाडी ती तेता करै हुअ हुंह भरपूर, सह, खुशबू अर मनणै जोगी बल़ीदान आसा ज़ुंण परमेशरा भाऊंआ। मेरअ परमेशर बी आपणीं तैहा ज़ैदाते साबै ज़ुंण प्रतप्पा संघी मसीहा ईशू दी आसा, तेऊ करनी थारी हरेक काम्मी-पेशी पूरी।
म्हारै प्रभू अर बाब परमेशरो प्रतप्प लोल़ी जुगै-जुगै हंदअ रहअ। एवमस्तू
खिरी सोभी लै राज्ज़ी-खुशी
हरेक पबित्र मणछ ज़ुंण ईशू मसीहा दी आसा, तिन्नां लै बोलै राज्ज़ी-खुशी। ज़ुंण विश्वासी भाई मुंह संघै आसा, तिंयां बी बोला तम्हां लै राज्ज़ी-खुशी।
सोभै पबित्र लोग, खासकर ज़ुंण माहा राज़ेए घअरे टबरा मांझ़ै विश्वासी आसा, तिन्नैं बी आसा तम्हां लै राज्ज़ी-खुशी दैनी दी।
हुंह च़ाहा इहअ कि म्हारै प्रभू ईशूए झींण लोल़ी सदा तम्हां सोभी लै हुई।
Source notes (1)
- Cross-reference ईशा. 26:3
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.