Kulvi Outer Seraji Bible
फलिप्पी 3
असली धर्मीं हणअ
इहअ करै, भाईओ, प्रभू दी रहा खुश अर ज़ेते बारै मंऐं तम्हां लै पैहलै बी लिखअ त तेते बारै भिई-भिई लिखणा लै निं मुंह किछ़ै कष्ट हंदअ अर एता ई दी आसा थारी भलाई ज़ेता करै परमेशरा का दूर नां होए।
तिन्नां कुक्करा का बी रहा चतैन ज़ुंण कदुष्ट काम करा। ज़ुंण तम्हां लै इहअ बोला कि उद्धार हणां लै आसा देही दी च़िरअ दैणअ ज़रूरी।1
किल्हैकि हाम्हैं ज़ुंण परमेशरे आत्मां दी परमेशरे च़ाकरी करा, हाम्हैं ई आसा तिंयां असली खतैर किऐ दै। हाम्हैं निं मणछे गल्ला दी भरोस्सअ करदै, पर ज़ुंण मसीहा ईशू हाम्हां लै किअ हाम्हैं करा तेथ भरोस्सअ।
हुंह सका देहीए गल्ला दी बी भरोस्सअ डाही। ज़ै कहा देहीए गल्ला दी भरोस्सै करनैओ बच़ार होए, हुंह सका तेऊ का खास्सअ करी।
परमेशरे बधाने साबै हुअ आठुऐ धैल़ै मेरअ खतैर। हुंह आसा इज़राईले खिंबा का अर बिन्यामीने गोत्रा का। हुंह आसा असली इब्रानी मणछ अर बधाना मनणे साबै ज़ै कुंण बोले, हुंह आसा फरीसी ज़िहअ काठअ।
जोशे साबै ज़ै कुंण बोले तै आसा हुंह विश्वासीए टोली लै दुख अर सांगट दैणैं आल़अ, अर यहूदी बधाने बारै ज़ै कुंण बोले तै त हुंह बिलकुल नर्दोश किल्हैकि हुंह मना त सोभी गल्ला।
ईंयां सोभै गल्ला ज़ाण्हिंआं ती मुखा एही कि ईंयां आसा मेरै फाईदे पर मंऐं समझ़ी ईंयां गल्ला आप्पू तेता पिछ़ू घाटअ ज़ुंण मसीहा मुल्है किअ। पर ऐबै बछ़ैणा हुंह मसीहा ईशू अर तेता पिछ़ू ज़िरा हुंह तिन्नां सोभी गल्लो घाटअ बी। हुंह समझ़ा इना सोभी गल्ला बृथा ताकि हुंह सिधअ प्रभू ईशू मसीहो हई सकूं अर तेऊ दी एक हई सकूं। बधाना करै धर्मीं हणअ निं हुंह च़ाहंदअ, पर हुंह च़ाहा मसीहा ईशू दी विश्वास करी धर्मीं हणअ ज़ुंण धर्मीं हणअ परमेशरा का एछा।
हुंह च़ाहा मसीहा समझ़णअ अर परमेशर मुंह दी बी तैहा शगती करै काम करे ज़ेता करै तेऊ मसीहा मरी करै ज़िऊंदअ किअ ताकि हुंह तिहै दुख ज़िरी सकूं ज़िहै मसीहा दुख ज़िरै अर तेऊए मौतो साझ़ू हई सकूं। ईंयां सोभ गल्ले आशा आसा एही कि परमेशर मुंह बी मरी करै ज़िऊंदै करे ज़िहअ तेऊ बाहिदअ आसा किअ द।
नशाणैं बाखा ठुहर्नअ
हुंह निं इहअ बोल्दअ आथी लागअ द कि मुंह मुक्की ईंयां गल्ला भेटी या हुंह मुक्कअ सिध्द हई, पर एता लै आसा हुंह ठुहर्दअ लागअ द, ज़ेते तैणीं मसीहा ईशू हुंह शादअ द आसा। भाईओ, मेरै दिलै निं एही आथी कि हुंह मुक्कअ तैहा गल्ला ढाकी, पर सिधअ एक काम करा हुंह इहअ कि ज़ुंण गल्ला पिछ़ू आसा छ़ुटी गई दी तिन्नां बिस्सरी करै लागा हुंह आजू एछणैं आल़ी गल्ला बाखा लै हांढदअ। हुंह रहा कबल्लअ नशाणैं बाखा लै ठुहर्दअ लागी ताकि मुंह तेते नांम स्वर्गै परमेशरा संघै सदा रहणअ भेटे, ज़ेता लै हुंह परमेशरै मसीहा ईशू दी आसा शादअ द।
ता, हाम्हां मांझ़ै ज़ेतरै लोग विश्वासा दी पाक्कै आसा तिंयां डाहै इहअ ई बच़ार अर ज़ै थारअ किज़ू गल्ला लै किज़ै होर बच़ार होए ता परमेशरा हेरनअ सह बी तम्हां दी प्रगट करी। परमेशरै हाम्हां का प्रगट किई दी गल्ला दी ज़िधी तैणीं हाम्हैं पुजै दै आसा, हाम्हां रहणअ तेऊ ई साबै ज़िऊंदै लागी।
म्हारअ असली देश आसा स्वर्गै
भाईओ, तम्हैं सोभै ज़िऊआ तेही ज़िन्दगी ज़ेही मेरी आसा, अर तिन्नां डाहा बछ़ैणीं ज़ुंण एऊ साबै ज़िन्दगी काटा, ज़ेता तम्हैं हाम्हां का शिखल़ा। किल्हैकि कई मणछे ज़िन्दगी आसा एही, ज़ेते बारै मंऐं तम्हां का कई बारी खोज़अ अर एभै बी बोला हुंह लेरा लाई-लाई करै तम्हां लै कि तिंयां आसा आपणैं च़ाल-च़लणा करै मसीहे क्रूसे दुशमण। तिन्नों अंत आसा बनाश, तिन्नों दईब आसा पेट, अर तिंयां करा आपणीं नशर्म गल्ला दी बी घमंड, अर तिन्नों मन्न हआ संसारे गल्ला दी लागअ द।
पर म्हारअ आपणअ असली देश आसा स्वर्गै अर हाम्हैं आसा उद्धार करनै आल़ै प्रभू ईशू तिधा का फिरी एछदै न्हैल़ै भाल़ै लागै दै। तेऊ का आसा सोभी गल्ला आपणैं बशै करने शगती। तैहा शगती करै बणाणीं तेऊ म्हारी दुबल़ी देहीओ रूप बदल़ी करै आपणैं प्रतप्पे देहीए साबै।
Source notes (1)
- Cross-reference 2 करि. 11:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.