फलिप्पी

फलिप्पी

फलिप्पी नगरीए विश्वासी टोली लै च़िठी

भेत

लिखणैं आल़अ: पल़सी

पहल़णैं आल़ै: फलिप्पी नगरीए विश्वासी

सन: 61-62

फलिप्पी रहणैं आल़ै विश्वासीए नाओंऐं शधाणूं पल़सीए लिखी ती अह च़िठी यूरोप देशै मसीहा दी विश्वास करनै आल़ेए टोली लै ज़ुंण पल़सी बणाईं ती। सह आसा रोमी मुल्खै मकिदुनिया दी। अह च़िठी लिखी ती तधू ज़धू शधाणूं पल़सी कैद खानै त अर ज़धू सह होरी मसीही च़ाकरी करनै आल़ेए बरोध करने बज़्हा परशैन त अर फलिप्पी रहणैं आल़ै विश्वासीए टोली दी पनपी दी गलत शिक्षा करै दुखी त। तज़ी बी रहैऊआ अह च़िठी नंद अर निहंचअ तेता सका सिधअ ईशू मसीहा दी पल़सीए डुघै विश्वासा करै ई समझ़ाऊई।

ऐहा च़िठी लिखणेओ मकसद त तैहा घल़ी फलिप्पी रहणैं आल़ै विश्वासी लै तेऊ दाना लै शूकर दैणअ ज़ुंण तिन्‍नैं पल़सीए गरज़े बगती दैनअ त। सह करा एऊ मोक्‍कै तिन्‍नां लै हैअ विश्वास दैणा लै ताकि तिंयां तेऊ संघा-संघा आपणीं बी मसीबता हंदी बी हैअ अर भरोस्सअ डाहे। सह करा तिन्‍नां का अरज़ कि आपणैं ई बारै सोठणअ अर घमंड निं करनअ। थारअ सभाब लोल़ी तिहअ हुअ ज़िहअ मसीहा ईशूओ थिअ। सह फरेऊआ तिन्‍नां का आद कि मसीहा दी आसा तिन्‍नें ज़िन्दगी परमेशरे झींण अर जशो एक दान ज़ुंण तिन्‍नां विश्वासा करै आसा भेटअ द, नां कि यहूदी बधाना मनणै करै। सह लिखा तैहा नंद अर शांतीए बारै ज़हा परमेशर तिन्‍नां मणछा लै दैआ ज़ुंण मसीहा संघै एक हई ज़िन्दगी ज़िऊआ।

मसीही विश्वासा, ज़िन्दगी दी नंद अर निहंचै दी कठा रही मज़बुती दी ज़ोर दैणअ आसा ऐहा च़िठीए खास गल्‍ल। अह च़िठी करा फलिप्पी नगरीए टोलीए बारै खास्सी झ़ूरी प्रगट।

पल़सी बोला ऐहा गल्‍ला आद करना लै कि ज़ुंण टोली दी परमेशरे लोग आसा तिन्‍नां लागा पबित्र ज़िन्दगी ज़िऊंणीं अर तेही ई सोठ डाहणीं ज़िहअ मसीहा किअ:

“मसीहा निं परमेशर हई बी परमेशरा ज़िहअ हणअ आपणैं बशै डाहणें गल्‍ल समझ़ी। सह बणअ होछ़अ, मणछे देही धरी करै हुअ सह हाम्हां लै दासे रुपै प्रगट हई मणछा ई बराबर। पर तेभै बी त सह परमेशर ई।”

(2:6,7)

कताबे बांड

भेत 1:1-11

पल़सीओ आपणअ हाल 1:12-23

मसीहा दी ज़िन्दगी 1:27—2:18

तिमोथी अर इपफ्रदीतुसे बारै सोठ 2:19-30

दुशमणा अर खातरे खलाफ चतैनगी 3:1—4:9

पल़सी अर तेऊए फलिप्पी गराऊंऐं साथी 4:10-20

नचोल़ 4:21-23