Kulvi Outer Seraji Bible
फलिप्पी 2
मसीहे मानदारी अर महान झींण
तै ऐबै, ज़ै मसीहा दी तम्हां हैअ आसा, मसीहे झ़ूरी दी तम्हां शांती आसा, पबित्र आत्मां दी साझ़ आसा, मसीहा तम्हां लै झींण अर झ़ूरी किई, तै करा मेरी ऐहा खुशी पूरी कि एक मन्न रहा अर एक्कै ई झ़ूरी, एक सोठ अर हर काम करनअ सोभी मिल़ी-ज़ुल़ी करै एक मन्न बणाईं।
ज़ेऊ साबै तम्हैं ज़िन्दगी ज़िऊआ, तेथ निं सिधअ आपणअ नफअ भाल़णअ। घमंडी निं हणअ। हथू करनी होरीए बी इज़त। होर मणछ बी समझ़णैं आप्पू का खास। सिधै आपणैं ई बारै निं सोठणअ कि थारी कै ज़रुरत आसा। तम्हैं सोभी करनी होरीए बी गरज़ पूरी।
थारी सोर लोल़ी तेऊ साबै हुई ज़ेऊ साबै मसीहा ईशू सोठा:
मसीहा निं परमेशर हई बी
परमेशरा ज़िहअ हणअ आपणैं बशै डाहणें गल्ल समझ़ी।
सह बणअ होछ़अ,
मणछे देही धरी करै हुअ सह हाम्हां लै
दासे रुपै प्रगट हई मणछा ई बराबर।
पर तेभै बी त सह परमेशर ई।
मणछे रुपै प्रगट हई हुअ सह मानदार
अर परमेशरे हर गल्ला मनी मरनै तैणीं, इधी तैणीं कि ज़ुल्म करनै आल़ै ज़ेही ज़िरी तेऊ क्रूसे मौत बी।
तैही किअ परमेशरै मसीहा लै सोभी का बडी पदबी दैई तेऊओ अदर
परमेशरै दैनअ तेऊ लै अह नाअं ज़ुंण सोभी नाओंआं का बडअ आसा।
कि ज़ुंण स्वर्गै अर पृथूई दी अर ज़ुंण पृथूई हेठै आसा,
तिंयां सोभै प्रभू ईशूए नाओंऐं ज़ान्हूं टेक्की करै तेऊओ अदर करे।
बाब परमेशरे प्रतप्पा लै
सोभै लोग ऐहा गल्ला मने कि ईशू मसीहा ई आसा प्रभू।
संसारै च़मका प्रैश्शै ज़िहै
मेरै पैरै भाईओ, ज़धू हुंह तम्हां संघै त तधू रहै तम्हैं सदा मेरी हर गल्ला मंदै लागी। ऐबै आसा हुंह तम्हां का दूर अर तै आसा तम्हां लै होर बी ज़रूरी कि तम्हैं मेरी गल्ला मने। परमेशरो अदर अर डरा हेठै रही मना तेऊए हर गल्ला, थारै उद्धारा का भेटणैं आल़ी शोभली गल्ला लै करा होर बी खास्सी मैन्थ। किल्हैकि परमेशर आसा तम्हां दी आप्पै लागअ द काम करदअ अर तम्हां लै एही शोभली च़ाहा अर शगती दैंदअ लागअ द ज़ेता करै सह खुश हआ।
कोई बी कामां करना लै नां हठल़दै लागणअ अर नां किज़ै खरी खोज़णीं। ताकि तम्हैं शुचै अर पबित्र हई उंबल़ै अर हठू लोगा मांझ़ै परमेशरे बेदाग लुआद बणी रहे। ज़हा मांझ़ै तम्हैं सदा रहणैं आल़ी ज़िन्दगीओ बैण लई एऊ संसारै ज़ल़दै सदीऐ ज़िहै शुझिए। कि मसीहे फिरी एछणें धैल़ी हुंह बी तम्हां पिछ़ू घमंड करी सकूं कि नां मेरअ प्रभू दी अह ठुहर्नअ अर नां मेरी अह मैन्थ ज़ांऐं डेऊई।
ज़ै मुंह थारै विश्वासे बल़ीदान अर च़ाकरी लै मुंह मरनअ बी पल़े तैबी आसा हुंह खुश अर तम्हां सोभी संघै मनाऊंआं हुंह खुशी। तिहै ई रहा तम्हैं बी खुश, अर मुंह संघै मनाऊंआं खुशी।
तिमोथी अर इपफ्रदीतुस
मुंह आसा प्रभू ईशू दी आशा कि तिमोथी छ़ाडणअ मुंह तम्हां सेटा लै एभी, ताकि थारै हाल-च़ाल ज़ाणीं करै मुंह बी हैअ भेटे। किल्हैकि मुखा निं इहै सभाबो कोहै आथी ज़ुंण शुचै मन्नैं थारअ फिकर करे। होरी हआ सिधी आपणैं बारै फिकर। तिन्नां निं मसीहा ईशूए कामें बारै फिकर हंदअ।
पर तिमोथी आसा तम्हैं परखी बी हेरअ द अर तम्हां का इहअ थोघ बी आसा कि ज़ेही मैन्थ एक शोहरू आपणैं बाब संघै करा, तेही मैन्थ किई तेऊ मुंह संघै खुशीए समादा खोज़णें च़ाकरी करना लै। मुंह आसा एही आशा कि ज़िहअ ई मुखा थोघ लागे कि आजू मेरी किज़ै दशा हणीं, तिहअ ई छ़ाडणअ मुंह अह तेभी तम्हां सेटा लै। मुंह आसा प्रभू दी इहअ बी भरोस्सअ कि आप्पू बी एछणअ हुंह तम्हां सेटा लै छ़ेक्कै।
इपफ्रदीतुस आसा तम्हैं मुंह सेटा लै ज़रूरी गल्ला लै मेरी च़ाकरी करनै आल़अ दूत छ़ाडअ द। सह आसा मेरअ भाई, प्रभूए कामां लै साझ़ू शधाणूं अर साथी जोधअ पर मंऐं समझ़अ सह तम्हां सेटा लै ज़रूरी छ़ाडणअ। किल्हैकि तेऊओ मन्न त तम्हां सोभी सेटा लागअ द अर तैही रहा त अह खास्सअ बेचैन ज़िहअ, किल्हैकि तम्हैं त एऊए बमारीए बारै शूणअ द। अह हुअ त सच्च़ी बमार, इधी तैणीं कि सह गअ त मरी, पर तेऊ लै किई परमेशरै झींण कि सह नरोगअ। मुल्है बी किई झींण कि मुल्है शोगा प्रैंदै शोग नां होए।
तैही किई मंऐं तेऊ तम्हां सेटा लै छ़ाडणें कोशिश कि तम्हैं तेऊओ मुंह भाल़ी खुशी होए अर मेरी फिकर बी दूर होए। तैही करै तम्हैं बी प्रभू दी तेऊओ बडै नंद अर खुशी दी सुआगत अर इना इहै मणछो करनअ अदर। किल्हैकि एऊ पाऐ मसीहे कामां लै आपणैं प्राण बी खातरै दी अह बच़अ मरनै का बाल़-बाल़, ताकि ज़ुंण कामीं पेशी तम्हां बाखा का मेरी च़ाकरी दी हुई, तैहा पूरी करे।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.