Kulvi Outer Seraji Bible
कुलूस्सी 1
अदर
अह च़िठी आसा मुंह पल़सी बाखा ज़ुंण परमेशरे मरज़ी करै मसीहा ईशूओ शधाणूं आसा अर विश्वासा दी मेरै भाई तिमोथी बाखा।
हाम्हैं लिखा एता मसीहा दी तिन्नां पबित्र अर शुचै-पाक्कै भाई-बैहणी लै ज़ुंण कुलूस्स नगरी रहा।
म्हारै बाब परमेशर अर प्रभू ईशू मसीहा का आसा मेरी एही अरज़ कि तम्हां सोभी लोल़ी झींण अर शांती सदा हुई।
पल़सीओ शूकर करनअ
हाम्हैं करा हर धैल़ै तम्हां लै प्राथणां अर आपणैं प्रभू ईशू मसीहे बाब, परमेशरो शूकर।
किल्हैकि हाम्हैं शूणअ इहअ कि मसीहा ईशू दी आसा थारअ विश्वास अर सोभी पबित्र लोगा संघै डाहा तम्हैं झ़ूरी। तम्हैं करा एता तैहा च़िज़े आशा डाही करै ज़ुंण तम्हां लै स्वर्गै आसा डाही दी, ज़ेते बारै तम्हैं तेऊ खुशीए समादे शुचै बैणा दी तिन्नां का शूणीं आसा मुक्कै दै ज़ुंण तम्हां सेटा शुरू दी आऐ।
ज़ुंण अह खुशीओ समाद तम्हां सेटा पुजअ अह आसा तम्हां सेटा का सारै देशै कई ज़ैगा लागअ द पुजदअ। अह आसा संसारै पज़दी ज़िम्मीं ज़िहअ लोगे ज़िन्दगी बदल़दअ लागअ द ज़ेथ नाज़ बधिया बझ़ा अर खास्सी फसल निखल़ा। ठीक तेही ई ज़ेही तम्हैं तैहा धैल़ी ओर्ही आपणीं ज़िन्दगी बदल़ी ज़धू तम्हैं पैहली बारी खुशीओ समाद शूणअ होर परमेशरे जशो सत्त बछ़ैणीं।
तेऊए ई शिक्षा शिखल़ी तम्हैं म्हारै पैरै ज़ोल़ीदार इपफ्रास भाई का, ज़ुंण हाम्हां लै मसीहो शुचअ-पाक्कअ दास आसा। तेऊ ई खोज़अ हाम्हां का थारी होरी सोभी संघै झ़ूरी करने बारै ज़ुंण पबित्र आत्मां तम्हां लै आसा दैनी दी।
तैही ज़हा धैल़ी ओर्ही हाम्हैं अह शूणअ, हाम्हैं करा हर बगत तम्हां लै प्राथणां कि परमेशरे आत्मां तम्हां लै अक्ल अर समझ़ दैए अर तम्हैं ऐहा गल्ला समझ़े कि परमेशरे मरज़ी किज़ै आसा, ताकि थारअ च़ाल-च़लण प्रभू जोगी होए, अर तम्हैं सोभी गल्ला दी परमेशरा खुश करी सके, अर तम्हां दी सोभी रंगे भलै कामों फल़ लागे, अर तम्हां का परमेशरे बारै होर बी खास्सअ थोघ लागे।
हुंह करा एही प्राथणां परमेशर तम्हां आपणीं महान शगती करै होर बी खास्सै जोधै बणांए, ताकि तम्हैं हर दुख तकलिफी सबर करी खुशी-खुशी ज़िरी सके। हाम्हैं करा हर बगत बाब परमेशरो शूकर, ज़ुंणी तम्हैं एता जोगी बणाऐं कि तम्हैं बी तेऊ प्रैश्शै दी पबित्र लोगे ज़ैदाता दी साझ़ू होए ज़ेते तेऊ आपणैं लोगा लै करार आसा किई दी।
किल्हैकि तेऊ ई छ़ड़ैऊऐ हाम्हैं न्हैरै दी काम करनै आल़ी राख्से शगतीए बशा का अर तेऊ पजैल़ै हाम्हैं आपणैं पैरै पूते राज़ा दी। आपणैं पूतो बल़ीदान करी तेऊओ लोहू बहाऊई दैनअ तेऊ हाम्हां लै राख्से शगती का छ़ुटकारअ मतलब म्हारै पाप किऐ माफ।
मसीहा दी मेल़-ज़ोल़
हाम्हैं निं परमेशरा भाल़ी सकदै,
पर ज़ांऊं मसीहा ईशू मणछ देही लई, तेऊ भाल़ी लागअ हाम्हां का थोघ कि परमेशर किहअ आसा
किल्हैकि मसीहा ईशू आसा परमेशरा ई ज़िहअ।
सह आसा सोभी का ज़ेठअ, तेऊ बाद ज़ेतरी बी गल्ला परमेशरै बणाईं,
सह आसा तिन्नां सोभिओ मालक।
किल्हैकि सह मसीहा ई त परमेशरा संघै सोभी गल्ला बणाणैं आल़अ,
स्वर्गै या पृथूईए, भाल़ी दी होए या नांईं भाल़ी दी होए,
कै राज़गाद्दी, कै राज़, कै गुप्त संसारे शगती।
सारी च़िज़ा आसा तेऊ करै अर तेऊए ई अदर करना लै बणाईं दी।
सोभी च़िज़ा बणाणैं का आजी त मसीहा,1
अर सोभै च़िज़ा रहा तेऊ ई दी कठा काम।
टोली आसा देही ज़ेही, अर मसीहा आसा तेतो मूंड।
सह ई त सोभी का आजी
अर सह ई आसा मूंऐं दै मांझ़ै ज़िऊंदै हणैं आल़अ पैहलअ
कि सोभी गल्ला दी सह ई प्रधान होए।
किल्हैकि बाब परमेशरे खुशी आसा एता ई दी कि
तेऊओ सारअ सभाब मसीहा दी बस्से
अर मसीहा करै परमेशर सोभी आप्पू सेटा लै बापस आणे।
तेऊ किअ मसीहे क्रूसा दी बहाऊऐ दै लोहू करै स्वर्ग अर पृथूईए सोभी च़िज़ो मेल़-ज़ोल़।
तेऊ किअ आपणीं सारी देही अर मौता करै थारअ बी परमेशरा संघै मेल़-ज़ोल़, ज़ुंण पैहलै पराऐ तै अर कदुष्ट कामां करै मन्नां का परमेशरे दुशमण तै। परमेशरै किअ मसीहे संसारे देही दी क्रूसा दी मरी करै थारअ बी मेल़-ज़ोल़ ताकि तम्हां आप्पू सेटा पबित्र अर नर्दोश बणाईं करै हाज़र करे। थारअ विश्वास लोल़ी मसीहा दी पाक्की आथरी प्रैंदै बणाऐं दै घअरा ज़िहअ पाक्कअ हुअ, अर तैहा आशा निं तम्हैं छ़ाडी ज़ुंण तम्हां तधू आसा भेटी दी ज़धू तम्हैं खुशीओ समाद शूणअ। ज़ुंण समाद सारै संसारै सोभी का खोज़अ अर हुंह पल़सी आसा तेता खोज़णा लै परमेशरो दास छ़ांटअ द।
पबित्र मसीही टोलीओ दास-पल़सी
मुंह हआ खुशी ज़ेभै हुंह थारी तैणीं आपणीं देही दी दाह-दुख ज़िरा। हुंह समझ़ा इहअ कि हुंह आसा मसीहे दाह-दुखा दी साझ़ू ज़ुंण कबल्लै तेऊए देही दी मतलब विश्वासी टोली दी आसा। परमेशरै बणाअं हुंह आपणअ दास अर तेऊ सभाल़ी मुखा ज़रूरी कामें ज़िम्मैंबारी, सह काम आसा इहअ कि हुंह तम्हां ज़िहै लोग ज़ुंण यहूदी निं आथी तिन्नां का परमेशरो पूरअ समाद खोज़ूं। मतलब सह भेद, ज़ुंण कई ज़मानैं ओर्ही गुप्त थिअ रहअ द पर ऐबै हुअ परमेशरे पबित्र लोगा दी प्रगट। परमेशर च़ाहा इहअ कि तिन्नां का लोल़ी थोघ लागअ कि मसीहे ज़ैदात अर प्रतप्प आसा तम्हां होरी ज़ातीए लोगा लै बी। अह भेद आसा इहअ कि मसीहा रहा तम्हां दी। अह दैआ तम्हां लै परमेशरे प्रतप्पा दी साझ़ू हणें आशा।
हाम्हैं खोज़ा होरी का मसीहे बारै, हाम्हैं दैआ लोगा लै चतैनगी अर लोगा सखाऊआ हाम्हैं तैहा अक्ल करै ज़ुंण हाम्हां लै परमेशरै आसा दैनी दी। हाम्हैं च़ाहा तिन्नां परमेशरा सम्हनै मसीहा संघै तिन्नें पाक्कै रिश्तै संघै निंणअ। तैही करा हुंह तन-मन्न लाई करै काम अर हुंह करा खास्सी मैन्थ, किल्हैकि मसीहा दैआ मुल्है शगती ज़ुंण मुंह दी काम करा।
Source notes (1)
- Cross-reference प्रका. 1:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.