कुलूस्सी

कुलूस्सी

कुलूस्स नगरीए विश्वासी टोली लै च़िठी

भेत

लिखणैं आल़अ: पल़सी

पहल़णैं आल़ै: कुलूस्स नगरीए विश्वासी

सन: 60

शधाणूं पल़सीए टोलीए नाओंए च़िठी लिखी ती एशिया मुल्खे कुलूस्स नगरी दी रहणैं आल़ै विश्वासी लै ज़ुंण इफिसुस नगरीए पुर्बा दिशा बाखा त। अह विश्वासीए टोली निं पल़सी आथी ती बणाईं दी, पर अह ती तेऊ मुल्खै ज़ेते ज़िम्मैंबारी पल़सी आपणीं समझ़ा त, ज़िहअ कि हाम्हैं तेऊ रोमी राज़ा दी यूनान मुल्खे राज़धानी इफिसुस नगरी लै लिखी दी च़िठी पहल़ा। पल़सी का लागअ इहअ थोघ कि कुलूस्स नगरी विश्वासीए टोली दी थिऐ कई गलत गूरू ज़ुंण एही शिक्षा लै ज़ोर दैआ तै कि हरेकी मणछा लागा परमेशरा समझ़णा लै अर पूरै उद्धार पाणा लै लागा किछ़ खास “आत्मिक प्रधाना अर गूरूए” च़ाकरी ज़रूरी करनी। संघा बोला तै तिंयां झ़ुठी गूरू इहअ बी कि हरेकी मणछ लागा किछ़ खास धर्म-बिधी, ज़िहअ खतैर करनअ, अर खाणैं-पिणें बारै अर होर बी कई च़िज़े बारै काठै बधाना दी च़लणअ ज़रूरी।

पल़सी लिखा ऐहा च़िठी इना च़िज़े बरोध करना लै शुचै मसीही समादा संघै। तेऊए ज़बाबो मल्हम आसा अह कि प्रभू ईशू मसीहा आसा पठी उद्धार दैणा लै शगती, अर इहअ बी कि ईंयां होर विश्वास अर बिधी करा असली दी तेऊ मणछा मसीहा का दूर। मसीहा करै ई किई परमेशरै एऊ संसारे रच़ना अर तेऊ ई करै आसा लागअ द सह एता आप्पू सेटा लै बापस आणदअ। उद्धारे आशा आसा सिधी मसीहा ई दी। तै खोज़ा पल़सी विश्वासीए ज़िन्दगी लै एऊ महान ज्ञैने बारै।

अह आसा धैन दैणैं जोगी गल्‍ल कि तुखिकुस, ज़ुंणी पल़सीए अह च़िठी कुलूस्स नगरी लै निंईं ती, तेऊ संघै त उनेसिमुस बी-सह गलाम ज़सरै पक्षा लै पल़सी फिलेमोन नाओंऐं च़िठी लिखी ती।

पल़सी खोज़ा बडै राम्बल़ै करै मसीहे बारै कि सह कुंण आसा:

“हाम्हैं निं परमेशरा भाल़ी सकदै, पर ज़ांऊं मसीहा ईशू मणछ देही लई, तेऊ भाल़ी लागअ हाम्हां का थोघ कि परमेशर किहअ आसा। किल्हैकि मसीहा ईशू आसा परमेशरा ई ज़िहअ। सह आसा सोभी का ज़ेठअ, तेऊ बाद ज़ेतरी बी गल्‍ला परमेशरै बणाईं, सह आसा तिन्‍नां सोभिओ मालक। किल्हैकि बाब परमेशरे खुशी आसा एता ई दी कि तेऊओ सारअ सभाब मसीहा दी बस्से अर मसीहा करै परमेशर सोभी आप्पू सेटा लै बापस आणे।”

(1:15,19,20)

कताबे बांड

भेत 1:1-8

मसीहे सभाब अर काम 1:9—2:19

मसीहा दी नऊंईं ज़िन्दगी 2:20—4:6

नचोल़ 4:7-18