Kulvi Outer Seraji Bible
कुलूस्सी 4
हे मालको, आपणैं दासा लै करा नसाफ अर ठीक बर्ताअ, इहअ समझ़ी कि स्वर्गै आसा थारअ बी एक मालक।1
खास सलाह दैणीं
ज़ेभै तम्हैं प्राथणां करे, कबल्लै रहणअ परमेशरो शूकर करी चतैन। एता संघा-संघा रहा हाम्हां लै बी प्राथणां करदै लागी कि परमेशर हाम्हां लै बी बैणा खोज़णा लै इहअ दुआर खोल्हे कि हाम्हैं मसीहो सह भेद तम्हां का समझ़ाऊई सकूं। ज़ेऊ बैणा खोज़णैं पिछ़ू हुंह कैद आसा किअ द। एही प्राथणां करा कि हुंह मसीहे तेऊ भेदा ठीक अर सोभी नदरी खोज़ी सकूं।
तिन्नां मणछा मांझ़ै रही ज़िऊआ आपणीं ज़िन्दगी समझ़कार रही ज़ुंण विश्वासी निं आथी अर हर मोक्कै समझ़ा किम्मती। थारी गल्ला करनी लोल़ी सदा एही हुई ज़ेथ झींण होए अर शुणनै आल़ैओ बी तेथ मन्न लागे, ताकि ज़ुंण तम्हैं विश्वास करा, तेते बारै तम्हैं सोभी मणछा लै राम्बल़ै करै ज़बाब दैणअ एछे।
खिरी अदर करनअ
विश्वासा दी मेरअ पैरअ भाई अर भरोस्सैमंद दास तुखिकुस, ज़ुंण प्रभू दी मुंह संघै काम करनै आल़अ आसा, तेऊ हेरनी मेरी गल्ला तम्हां का खोज़ी। सह आसा मंऐं तम्हां सेटा लै एते तैणीं छ़ाडअ द कि तम्हां का म्हारी हालतो थोघ लागे अर सह थारै दिला लै शांती दैए अर तम्हां विश्वासा दी मज़बूत करे। तेऊ संघै आसा उनेसिमुस बी छ़ाडअ द, ज़ुंण भरोस्सैमंद अर विश्वासा दी पैरअ भाई अर थारी ई नगरीओ आसा, इना हेरनी तम्हां का इधी म्हारै बारै सारी गल्ला खोज़ी।
अरिस्तखोरस ज़ुंण मुंह संघै इधी कैदी आसा, अर मार्कुस ज़ुंण बरनबासो रिश्तै दी भाई लागा, ज़सरै बारै तम्हां का मार्कुसै पैहलै ई आसा खोज़ी हेरअ द, ज़ै सह तम्हां सेटा लै एछे, तेऊ संघै करै शोभलअ बर्ताअ। ईशू, ज़हा लै जस्तुस बोला, तिन्नैं बी आसा तम्हां लै राज्ज़ी-खुशी दैनी दी। यहूदी विश्वासी मांझ़ै आसा सिधै ईंयां ई चअन परमेशरे राज़ा लै कामां करना लै मेरै साथी अर मुल्है हिम्मत दैणैं आल़ै।
इपफ्रास ज़ुंण थारी नगरी का अर मसीहा ईशूओ दास आसा, सह बी बोला तम्हां लै राज्ज़ी-खुशी। ताकि तम्हैं पाक्कै होए अर विश्वास करे ज़ुंण परमेशरै हाम्हां का सखाऊई अर ज़ेते तेऊ हाम्हां लै करार आसा किई दी। हुंह आसा तेऊओ शाजत कि सह करा तम्हां लै अर लौदिकिया अर हियरापुलिसा नगरी आल़ै लै हर धैल़ै प्राथणां।
पैरअ भाई बैईद लूका अर भाई दमास बी दैआ तम्हां सोभी लै राज्ज़ी-खुशी।
लौदिकिया नगरीए भाई-बैहणी लै राज्ज़ी-खुशी। बैहण नुम्फा अर तिन्नें घअरे विश्वासीए टोली लै बी खोज़ै राज्ज़ी-खुशी।
ज़ेभै ऐहा च़िठी तम्हां सेटा पहल़े, इहअ करै कि लौदिकिया रहणैं आल़ै विश्वासीए टोली सेटा लऐ ऐहा च़िठी पहल़ी, अर तैहा च़िठी ज़ुंण लौदिकिया का एछे, तम्हैं पहल़ै तैहा च़िठी टोली दी। तेखअ बोलै अरखिप्पुस भाई लै इहअ कि ज़ुंण च़ाकरी प्रभू ताखा सभाल़ी दी आसा, तैहा करै बडी धैन मन्न लाई करै पूरी।
हुंह पल़सी लिखा तम्हां सोभी लै आपणैं हाथै राज्ज़ी-खुशी। मेरै इना शांघल़ी लोहै डाहै आद कि हुंह आसा कैद अर मुल्है करै प्राथणां; तम्हां सोभी लै लोल़ी परमेशरो जश अर शांती सदा हुई। एवमस्तू।
Source notes (1)
- Cross-reference लेब. 25:43,53
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.