1 थिस्सलूणी 1

अदर

1अह च़िठी आसा पल़सी, सिलास अर तिमोथी बाखा। अह आसा थिस्सलूणी रहणैं आल़ी विश्वासीए टोली लै लिखी दी ज़ुंण बाब परमेशर अर प्रभू ईशू मसीहे आसा।

तम्हां सोभी लै लोल़ी परमेशरे झींण अर शांती सदा हंदी रही।

थिस्सलूणी नगरीए विश्वासीओ विश्वास

2हाम्हैं करा तम्हां आपणीं प्राथणां दी कबल्‍लै आद अर हाम्हैं करा तम्हां सोभिए बारै परमेशरो शूकर। 3हाम्हैं करा हर बगत आपणैं बाब परमेशरा सेटा थारै विश्वासे काम, झ़ूरी लै मैन्थ, अर म्हारै प्रभू ईशू मसीहा दी पाक्‍की आशा अर परमेशरा लै काम करनअ आद।

4भाईओ, तम्हां ज़हा लै परमेशर झ़ूरा हाम्हैं करा तेता लै बी परमेशरो शूकर किल्हैकि हाम्हां का आसा थोघ कि तेऊ छ़ांटै तम्हैं आपणैं लोग हणें तैणीं।1

5किल्हैकि म्हारअ ईशू मसीहे बारै खुशीओ समाद निं तम्हां सेटा सिधअ बैण पुजअ, पर सह पुजअ पबित्र आत्में शगती अर तेऊए बडै निहंचै करै। ज़िहअ तम्हां का थोघ आसा कि हाम्हैं थारी भलाईए तैणीं तम्हां मांझ़ै रही किहअ बभार डाहअ।

6तम्हैं मनअ बडी खरी दी बी पबित्र आत्मां दी खुशी-खुशी प्रभूओ बैण। इहअ करै लागै म्हारी अर प्रभू ज़ेही च़ाल च़लदै। 7इधी तैणीं कि मकिदुनिया अर अखाया मुल्खै बस्सै दै सोभी मसीहा दी विश्वास करनै आल़ै लै हुऐ तम्हैं गूरू।

8किल्हैकि तम्हां सेटा का निं सिधअ मकिदुनिया अर अखाया मुल्खै प्रभूओ बैण पुजअ, पर हर ज़ैगा ज़िधी बी हाम्हैं डेऊऐ तिधी खोज़अ लोगै थारै परमेशरा दी विश्वासे बारै। इहअ करै निं हाम्हां थारै विश्वासे बारै कहा बोल़णें ज़रुरत ई पल़ी। 9किल्हैकि तिंयां खोज़ा हर ज़ैगा आप्पै ई म्हारै बारै कि म्हारअ तम्हां सेटा एछणअ किहअ हुअ। किल्हैकि तम्हैं फिरै मुहुर्ती का परमेशरा बाखा लै, ताकि ज़िऊंदै अर शुचै परमेशरे च़ाकरी करी सके 10अर तेऊए पूते स्वर्गा का फिरी एछणें न्हैल़ै-भाल़ै रहे लागी, ज़ुंण परमेशरै मरी करै ज़िऊंदअ किअ। मतलब प्रभू ईशू, ज़ुंण हाम्हां आजू हणैं आल़ै परमेशरे नसाफ का बच़ाऊआ।