Kulvi Outer Seraji Bible
1 थिस्सलूणी 2
पल़सीओ खुशीओ समाद खोज़णअ
ए मेरै भाईओ, तम्हां का आसा आप्पै थोघ कि म्हारअ तम्हां सेटा एछणअ निं ज़ांऐं हुअ। पर तम्हैं ज़ाणा आप्पै ई कि पैहलै-पैहल फलिप्पी नगरी दी दुख अर उपद्रभ ज़िरने बी दैनी म्हारै परमेशरै हिम्मत कि हाम्हैं थारी नगरी दी भारी बरोध हणैं का बाद बी तम्हां का परमेशरो खुशीओ समाद खोज़े।
म्हारी शिक्षा निं तम्हां लै कबाता पाणै आल़ी आथी ती, नां म्हारअ मकसद कज़ेही अर छ़ोतली गल्ला करनी थिई अर नां तेथ छ़ल़-कपट आथी त।
परमेशरै आसा हाम्हां दी भरोस्सअ करी खुशीओ समाद सभाल़अ द। तैही निं हाम्हैं कहा मणछा खुश करदै पर हाम्हैं दैआ शिक्षा तेऊ परमेशरा खुश करना लै ज़हा का म्हारै दिला-मन्नों थोघ आसा।1
तम्हां का आसा थोघ कि हाम्हैं नां च़लाकीए गल्ला करदै अर नां तम्हां का किज़ू च़िज़ो मांण किअ, ऐहा गल्लो आसा परमेशर शाजत। मसीहे शधाणूं हणैं पिछ़ू ती तम्हां का मज़त मांगणी म्हारअ हक। तैबी निं हाम्हैं मणछा का अदर च़ाहंदै तै, नां तम्हां का अर नां कहा होरी का।
पर ज़ेही ईज आपणैं शोहरू-माठै धाची-पाल़ी होछ़ै का बडै करा, मसीहा दी किई हाम्हैं तम्हां जैंदरी रही थारी तेही ई हेर-सभाल़। किल्हैकि हाम्हां लागा थारी झ़ूरी। हाम्हैं निं आपणीं बाखा तम्हां लै सिधअ खुशीओ समाद ई खोज़अ ज़ुंण परमेशरै हाम्हां लै दैनअ। पर हाम्हैं तै तम्हां लै आपणीं ज़ान दैणा लै बी तैर किल्हैकि तम्हैं थिऐ गऐ दै म्हारै दिलै बस्सी।
किल्हैकि भाईओ, तम्हैं डाहा म्हारी मैन्थ अर कष्ट आद कि तिन्नां धैल़ै ज़धू हाम्हैं तम्हां का परमेशरो खुशीओ समाद खोज़अ, हाम्हैं खटै आपणीं हर गरज़ा पूरी करना लै राची धैल़ी काम करी ढब्बै, ताकि तम्हां मांझ़ै कोही लै बी बोझ़ नां होए।
तम्हैं आसा आप्पै ऐहा गल्ले शाजत अर परमेशर बी, कि तम्हां सोभी विश्वासी भाई-बैहणी संघै म्हारअ सभाब किहअ शुचअ, धर्मीं अर नर्दोश त। तम्हां का आसा ऐहा गल्लो थोघ ज़िहअ बाब आपणैं शोहरू संघै बर्ताअ करा, तेही ई दैआ हाम्हैं तम्हां मांझ़ै हरेकी लै शिक्षा अर हैअ अर समझ़ाऊआ बी तै कि थारअ च़ाल-च़लण परमेशरा खुश करनै जोगी होए, ज़ुंण तम्हां आपणैं राज़ अर प्रतप्पा दी शादा।
तैही करा हाम्हैं कबल्लै परमेशरो शूकर, किल्हैकि ज़धू हाम्हैं तम्हां का खुशीओ समाद खोज़अ, तम्हैं निं सह सिधअ मणछे गल्ल समझ़ी, पर तम्हैं मनी म्हारी गल्ला, असली दी परमेशरो बैण समझ़ी। हाम्हैं निं सह समाद आपणीं बाखा खोज़ी। हाम्हैं करा एता लै बी परमेशरो शूकर कि तेऊ बदल़ी थारी ज़िन्दगी किल्हैकि तम्हैं करा एऊ खुशीए समादा दी विश्वास।
भाईओ, हाम्हां का आसा राम्बल़अ थोघ कि थारअ च़ाल-च़लण आसा परमेशरे तिन्नां विश्वासीए टोली ज़िहअ ज़ुंण यहूदा नगरी मसीहा ईशू दी आसा। किल्हैकि तम्हैं ज़िरअ तिहअ ई दुख ज़िहअ तिन्नां लै यहूदी मणछै दुख दैनअ। ज़ुंणी यहूदी प्रभू ईशू अर परमेशरे कई गूर बी पाऐ मारी। हाम्हैं बी काढै च़िक्की-मारी करै कई नगरी का बागै। परमेशर आसा तिन्नां का नराज़ अर तिंयां करा सारी मणछा ज़ातीए खलाफ काम। तिंयां हआ हाम्हां होरी ज़ाती मांझ़ै एऊ खुशीए समादे बारै खोज़णैं का रोक्कदै लागै दै, तिंयां च़ाहा इहअ कि तिन्नां निं उद्धार लोल़ी भेटअ! तिंयां आसा लागै दै साबा का बाधू पाप करदै अर ऐबै भेटणीं परमेशरा का घोर सज़ा।
विश्वासी टोलीए बारै तिमोथीओ हाल खोज़णअ
भाईओ, हाम्हैं हुऐ तै तम्हां का थोल़ै धैल़ै देही दी दूर पर तज़ी बी तै हाम्हैं आपणैं दिला का तम्हां नेल़। ज़धू हाम्हैं थोल़ै धैल़ै तम्हां का दूर किऐ, हाम्हैं च़ेतअ मन्नैं झ़ेरअ। हाम्हैं च़ाहा तै हर घल़ी किहअ करै तम्हां सेटा पुजणअ। मंऐं किई तम्हां सेटा लै एछणें कई बारी कोशिश बी, पर हर बारी डाहै राख्सै हाम्हैं रोक्की।
ज़ेभै म्हारअ प्रभू ईशू भिई फिरी एछणअ तेभै हणैं तेऊ सम्हनै तम्हैं ई म्हारी आशा, नंद अर खुशीए शाबाशीओ मुगट। म्हारी बड़ैई अर नंद आसा तम्हैं ई।
Source notes (1)
- Cross-reference तित. 1:3; इफि. 6:6
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.