Kulvi Outer Seraji Bible
1 थिस्सलूणी 3
तिमोथी विश्वासी सेटा लै छ़ाडणअ
तैही ज़ांऊं म्हारै तम्हां का दूर नांईं रहूअ, मंऐं किअ इहअ फैंसलअ कि सिलास अर मुंह रहणअ एथेंस नगरी। भाई तिमोथी ज़ुंण मसीहा ईशूए खुशीए समादा खोज़णा लै म्हारअ साझ़ू अर परमेशरो दास आसा, सह छ़ाडअ हाम्हैं तम्हां सेटा लै, ताकि सह तम्हां थारै विश्वासा दी पाक्कै करी सके। ज़ुंण दुख-सांगट तम्हां लै हुऐ बितै हाम्हैं निं च़ाहंदै कि तम्हां मांझ़ै एक बी तेते बज़्हा विश्वासा का पिछ़ू हटे। किल्हैकि तम्हां का आसा आप्पै थोघ कि हाम्हैं आसा एही ई दुख-सांगट ज़िरना लै परमेशरै छ़ांटै दै।
किल्हैकि ज़धू पैहलै बी तै हाम्हैं तम्हां सेटा, तधू रहा तै हाम्हैं तम्हां का बोल्दै लागी कि हाम्हां लागणै दुख-सांगट ज़िरनै अर इहअ ई हुअ, ऐहा गल्लो बी आसा तम्हां का थोघ। तैही छ़ाडअ मंऐं तिमोथी तम्हां सेटा लै। मेरै निस्सअ त रहूई अर तेते तैणीं छ़ाडअ मंऐं सह थारै विश्वासे बारै थोघ करने तैणीं कि किधी इहअ निं हआ कि राख्स लागअ होए तम्हां परखदअ अर म्हारी मैन्थ हुई ज़ांऐं।
तिमोथी का गल्ला शुणनी
पर एभै खोज़अ तिमोथी तम्हां सेटा का बापस फिरी करै थारै विश्वास अर परमेशरे झ़ूरी करनैओ समाद। तेऊ खोज़ी ईंयां गल्ला बी कि तम्हैं करा सदा हाम्हां बडी झ़ूरी संघै आद, तम्हैं च़ाहा मेरअ मुंह भाल़णअ ज़िहअ हुंह ज़ेही मुंह आसा लागी दी कि मुंह त एभी तम्हां सेटा लै एछणअ। भाईओ, तैही हुई हाम्हां आपणैं सारै दुख-सांगटा दी थारै विश्वासा दी टेक्की रहणें गल्ला शूणीं खास्सी शांती।
थारै प्रभू ईशू मसीहा दी पाक्कअ विश्वास डाहणें इना गल्ला शूणीं भेटी हाम्हां ज़ेही नऊंईं ज़िन्दगी।
ऐबै करा हाम्हैं थारै बारै परमेशरो शूकर। हाम्हैं करा परमेशरो तेता लै शूकर ज़ुंण खुशी हाम्हां तेऊ सम्हनै तम्हां करै भेटी। हाम्हैं हआ राची धैल़ी तम्हां लै कबल्लै प्राथणां करदै लागै दै कि थारअ मुंह भिई भाल़ी सके अर हाम्हैं तम्हां विश्वासा दी होर बी पाक्कै करी सके।
ऐबै करा हाम्हैं एही प्राथणां कि म्हारअ बाब परमेशर अर म्हारअ प्रभू ईशू पजैल़े ऐबै हाम्हां तम्हां सेटा आप्पै। हाम्हैं करा एही प्राथणां कि प्रभू लोल़ी त इहअ किअ कि ज़ेही हाम्हैं तम्हां संघै झ़ूरी करा, तेही ई थारी झ़ूरी बी आप्पू मांझ़ै अर सोभी मणछा संघै बढदी रहे ताकि प्रभू थारै मन्नां इहअ मज़बूत करे, कि ज़ांऊं म्हारअ प्रभू ईशू मसीहा आपणैं सोभी पबित्र लोगा संघै फिरी एछे, तिंयां म्हारै परमेशर बाब सम्हनै पबित्रता दी नर्दोश निखल़े।1
Source notes (1)
- Cross-reference कुलू. 1:22; इफि. 5:27
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.