Kulvi Outer Seraji Bible
1 थिस्सलूणी 4
एही ज़िन्दगी ज़ुंण परमेशरा खुश करे
भाईओ, हाम्हैं करा तम्हां का अरज़ अर तम्हां समझ़ाऊआ हाम्हैं प्रभू ईशू दी कि ज़ेही तम्हैं हाम्हां का ठीक च़ाल-च़लणीं, परमेशर खुश करनअ आसा शिखल़अ द, अर ज़िहअ तम्हैं च़ला बी, तिहै ई होर बी लागा तम्हैं बझ़दै। किल्हैकि तम्हां का आसा थोघ कि हाम्हैं प्रभू ईशू बाखा तम्हां लै कुंण-कुंण हुकम पजैल़ै।
किल्हैकि परमेशर च़ाहा इहअ कि तम्हैं हआ पबित्र मतलब-कंज़रैई का रहै दूर अर तम्हां मांझ़ै लोल़ी सोभी का थोघ हुअ कि आपणीं बेटल़ी संघै किहअ करै रहणअ, ज़िहअ करै तेसो अदर हआ अर तैहा छ़ाडी बागै डेऊणेओ पाप निं करी। एऊ कामां निं सिधअ आपणीं देही खुश करने च़ाहा पूरी करना लै करी, अर नां तिन्नां होरी ज़ाती ज़िहअ हई ज़हा का परमेशरो थोघ निं आथी। आपणीं देही डाहणीं आपणैं बशै अर नां आपणीं देहीए भुखा लै आपणैं भाई ठगी अर नां तेऊ लै कोई दाअ-पेच़ च़लाऊई। किल्हैकि प्रभू दैणीं इना सोभी गल्ला पिछ़ू सज़ा, ज़िहअ कि हाम्हैं पैहलै बी तम्हां का बोलअ अर चतैनगी बी दैनी।1
किल्हैकि परमेशरै निं हाम्हैं छ़ोतलै हणां लै आथी शादै दै पर हाम्हैं आसा पबित्र हणां लै शादै दै। एते ई बज़्हा ज़ुंण ऐहा चतैनगी बृथा समझ़ा, सह निं मणछा बृथा समझ़दअ पर सह समझ़ा परमेशरा बृथा ज़ुंण तम्हां लै आपणअ पबित्र आत्मां दैआ।
आपणैं साथी-भाई संघै झ़ूरी डाहणें बारै लिखणे निं मुंह ज़रुरत आथी। किल्हैकि आप्पू मांझ़ै झ़ूरी डाहणीं आसा तम्हैं आप्पै परमेशरा का शिखल़ी दी।2
तेतो बी आसा सोभी का थोघ कि मकिदुनिया मुल्खै सोभी विश्वासी भाई लै आसा थारै दिलै झ़ूरी, पर भाईओ, हाम्हैं समझ़ाऊआ तम्हां इहअ कि होर बी लागा आजू बझ़दै।
ज़िहअ हाम्हैं तम्हां लै हुकम आसा दैनअ द, तिहै ई रहा च़ुप्प-च़ुप्पै आपणैं काम-काज़ करदै अर आपणैं-आपणैं हाथै रहा खटदै लागी। बागै होरी लोगा मांझ़ै बी लोल़ी थारअ शोभलअ बर्ताअ हुअ ताकि तिंयां बी थारअ अदर करे अर तम्हां निं किछ़ू गल्ले काम्मी लोल़ी रही कि तम्हैं होरीए भरोस्सै रहे।
ईशूओ भिई फिरी एछणअ
भाईओ, हाम्हैं निं च़ाहंदै कि तम्हैं तिन्नें बारै ज़ुंण मरी आसा गऐ दै, तिन्नें बारै नज़ाण रहे, इहअ निं हआ कि तम्हैं होरी ज़िहअ शोग करे, ज़हा मरनै का बाद आशा ई निं आथी। किल्हैकि, ज़ै हाम्हैं भरोस्सअ करा कि प्रभू ईशू मूंअ अर ज़िऊंदअ बी हुअ, तिहअ ई ज़ुंण मसीहा दी मूंऐं दै आसा तिंयां बी आणनैं परमेशरा मसीहा संघै बापस।
किल्हैकि हाम्हैं बोला प्रभूए बैणे साबै तम्हां लै कि हाम्हैं ज़ुंण अज़ी बी ज़िऊंदै आसा, ज़ेभै प्रभू फिरी एछणअ तेभै निं हाम्हैं तेऊ सेटा मिलदै तिन्नां का आजू डेऊणैं ज़ुंण विश्वासी मरी आसा गऐ दै।
किल्हैकि प्रभू ईशू मसीहा होथणअ आप्पै स्वर्गा का, तेभै शुणनअ अर प्रधान स्वर्ग दूतो बोल अर परमेशरे नाद बाज़णीं, अर ज़ुंण विश्वासी मरी आसा गऐ दै, तिंयां हणैं पैहलै ज़िऊंदै। तेखअ हाम्हैं ज़ुंण ज़िऊंदै अर बच़ै दै आसा, तेखअ च़कणै हाम्हैं बी तिन्नां संघै उझै बादल़ा दी प्रभू सेटा मिलदै अर तेभा पोर्ही रहणैं हाम्हैं सदा प्रभू संघै। इहअ करै करा इना गल्ला करै एकी-दुजै लै हैअ दैई।
Source notes (2)
- Cross-reference भज. 94:1
- Cross-reference जोह. 3:11; रोम. 12:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.