1 थिस्सलूणी

1 थिस्सलूणी

थिस्सलूणी नगरीए विश्वासी टोली लै पैहली च़िठी

भेत

लिखणैं आल़अ: पल़सी

पहल़णैं आल़ै: थिस्सलूणी नगरीए विश्वासी

सन: 51

रोम राज़ा दी थिऐ कई मुल्ख, तेता मांझ़ै त एक मुल्ख मकिदुनिया अर थिस्सलूणी नगरी ती तेऊ मुल्खे राज़धानी। फलिप्पी नगरी का इधा लै एछी बणाऐं तै पल़ी इधी कई टोल विश्वासी। इधी बी हेरअ त तिन्‍नैं यहूदी बरोध करनअ शुरू करी ज़ुंण होरी ज़ाती मांझ़ै पल़सीए मसीही खुशीए समादा सारै दी पुजणैं का ज़ल़ा तै। किल्हैकि होरी ज़ातीए लोग बी डाहा तै यहूदी धर्मां दी रुच़ी। इहअ करै पल़अ पल़सी थिस्सलूणी नगरी छ़ाडणीं अर सह डेऊअ बिरीया नगरी लै। बादा दी ज़ांऊं सह करिन्थ नगरी पुजअ तिधी भेटअ तेऊ आप्पू संघै काम करनै आल़ै अर साथी तिमोथी का मुंहां सम्हनै थिस्सलूणी नगरी टोलीए बारै समाद।

एऊ समादा पुजणैं का बाद लिखी ती थिस्सलूणी नगरीए विश्वासीए नाओंऐं पल़सी पैहली च़िठी तिन्‍नें दिल खुश करनै संघा-संघा भिई हैअ दैणा लै। सह दैआ तिन्‍नां लै तिन्‍नें विश्वास अर खास्सै झ़ूरनै बारै समादा लै शूकर। सह फरेऊआ तिन्‍नां का आपणीं ज़िन्दगीए तिन्‍नां धैल़ै आद ज़ुंण तेऊ तिन्‍नां मांझ़ै रही काटै तै। तेखअ दैआ सह प्रभू ईशूए ऐहा भिई फिरी एछणें बारै सुआले ज़बाब ज़ुंण तैहा विश्वासीए टोली दी तै उझ़ुऐ दै। सुआल तै इहै कि एक विश्वासी, ज़ुंण प्रभू ईशूए भिई एछणैं का पैहलै ई जाए मरी, सह तैहा ज़िन्दगीओ साझ़ू हणअ बी कि नांईं, ज़ुंण प्रभू ईशूए भिई फिरी एछणें बेला हाम्हां भेटणीं? मसीहा केभै एछणअ भिई फिरी? पल़सी खोज़ा एऊ मोक्‍कै तिन्‍नां का इहअ कि तैहा हालता दी ज़ै तम्हैं प्रभू ईशू फिरी एछणैं न्हैल़ै भाल़ै आसा लागै दै, तै रहा च़ुपच़ाप आपणैं एऊ कामां दी लागी।

खिरी दैआ पल़ी एही चतैनगी अर सलाह:

“सदा रहणअ नंद। कबल्‍लै रहणअ प्राथणां दी लागी। हर हालता लै करनअ प्रभूओ शूकर, किल्हैकि तम्हैं मसीहा ईशूए आसा तम्हां लै च़ाहा परमेशर इहअ ई।”

(5:16-18)

कताबे बांड

भेत 1:1

शूकर अर स्तोती 1:2—3:13

मसीही बभारे बारै शिक्षा 4:1-12

मसीहे फिरी एछणें बारै शिक्षा 4:13—5:11

खिरी दैनी दी शिक्षा 5:12-22

नचोल़ 5:23-28