लूका

लूका

लूका लिखअ द खुशीओ समाद

भेत

लिखणैं आल़अ: लूका

पहल़णैं आल़ै: होरी ज़ातीए लोग

सन: 57-59

लूका लिखअ द अह खुशीओ समाद करा ईशू इज़राईलो करार किअ द उद्धार करनै आल़अ अर सारै संसारे मणछ ज़ातीए उद्धार करनै आल़अ दुहीए रुपै पेश। लूका लिखा इहअ कि ईशू शादअ प्रभूए आत्मां “रैनै-गरीबा लै खुशीओ समाद खोज़णें तैणीं।” तैही आसा अह खुशीओ समाद कई रंगे खरी दी पल़ै दै लोगे फिकर हणें गल्‍ला करै भर्हुअ द। लूका लिखै दै एऊ खुशीए समादा दी आसा खुशीए साबै महान पदबी, खासकर शुरूआती धैऊआ दी, ज़ेथ दी ईशूए एछणें बारै आसा बोलअ द, अर खिरी बी आसा ज़िधी ईशूए मरी करै ज़िऊंदै हई स्वर्गा लै डेऊणे बारै खोज़अ द। ईशूए स्वर्गा लै डेऊणैं का बाद आसा ऐहा कताबा लिखणैं आल़ै मसीही विश्वासो सारै देशै बढणअ अर पूरअ हाल शधाणूंए काम नाओंऐं कताबा दी खोज़अ द।

दुजै अर छ़ऊऐ भागा दी लिखी दी कई गल्‍ला भेटा सिधी एऊ ई खुशीए समादा दी। ज़िहअ, ईशूए ज़ल्मां दी स्वर्ग दूते स्तोती गाऊंण, फुआलो ईशू भाल़ै डेऊणअ, होछ़ी बारी ईशू एरुशलेम नगरी भबनै, झणैल़ू सामरी, आल-मस्ती करनै आल़ै शोहरूए कथ्या अर कई होर गल्‍ला। पूरै खुशीए समादा दी आसा प्राथणां, पबित्र आत्मां, ईशूए च़ाकरी दी ज़नानीए साझ़ अर परमेशरा करै पाप माफी दी खास्सअ ज़ोर दैनअ द।

लूका करा आपणीं ऐहा पैहली कताबा इहअ खोज़ी खतम कि ईशू डेऊअ स्वर्गा लै फिरी, पर तेता डेऊणैं का आजी डाहअ तेऊ आपणैं च़ेल्‍लै का खोज़ी:

“अह आसा शास्त्रा दी पैहलै ई लिखअ द कि मसीहो दुख भुगती करै मरनअ आसा ज़रूरी पर चिऊथै धैल़ै हणअ सह मरी करै भिई ज़िऊंदअ। तिन्‍नैं आसा इहअ बी लिखअ द कि ज़ुंण तेऊ दी विश्वास करे तिन्‍नां लै आसा ज़रूरी कि तिंयां हर ज़ैगा ऐहा गल्‍लो प्रच़ार करे ताकि लोग पाप छ़ाडी परमेशरा बाखा लै फिरे अर परमेशर तिन्‍नें पाप माफ करे। मसीहा पिछ़ू हांढणै आल़ै लागा अह खुशीओ समाद प्रच़ार ज़रूरी करनअ किल्हैकि परमेशरै आसा तिंयां एते ई तैणीं छ़ाडै दै। पैहलै करनअ तिन्‍नां एरुशलेम नगरी प्रच़ार अर तेखअ सारै संसारे सोभी ज़ातीए लोगा सेटा लै। तम्हैं आसा इना सोभी गल्‍ले शाजत।”

(24:46-48)

कताबे बांड

भेत 1:1-4

जोहन्‍ना डुबकी दैणैं आल़ै अर ईशूओ ज़ल्म अर बच़पण 1:5—2:52

जोहन्‍ना डुबकी दैणैं आल़ेए च़ाकरी 3:1-20

ईशूए पाणीं दी डुबकी अर परिक्षा 3:21—4:13

गलील मुल्खै ईशूए च़ाकरी 4:14—9:50

गलील मुल्खा का एरुशलेम तैणीं हांढ 9:51—19:27

एरुशलेम नगरी खिरीओ हबतअ 19:28—23:56

ईशूओ ज़िऊंदै हणअ, शुझणअ अर स्वर्गा लै डेऊणअ 24:1-53