लूका 12

छ़ल़-कपट करने खलाफ चतैनगी

(मोत्ती 10:26,27)

1तेतरी हुऐ तिधी हज़ारो लोग कठा एतरै कि लोग लागै एकी दुजे खूरा प्रैंदै गंईं लाई भाल़ै। ईशू बोलअ आपणैं च़ेल्‍लै लै इहअ, “फरीसी मणछे कपट रुपी सज़ेल़ै का रहै चतैन। 2इहअ बगत बी एछणअ ज़ेभै ढोपी डाही दी हर च़ीज़ शुझणीं सोभी का अर गुप्त च़िज़ो लागणअ सोभी का थोघ। 3ज़ुंण तम्हैं न्हैरै दी आसा बोलअ द, सह शुझणअ प्रैश्शै दी, अर ज़ुंण तम्हैं पांडा भितरी काना पिछ़ू आसा बोलअ द तेतो हणअ छ़ाप्परा का प्रच़ार।

कहा का डरनअ

(मोत्ती 10:28-31)

4“पर हुंह बोला तम्हां का ज़ुंण मेरै साथी आसा कि तम्हैं निं तिन्‍नां का डरी आथी ज़ुंण थारी देही च़ाहा मारनअ। तिंयां निं होर किछ़ करी सकदै। 5हुंह खोज़ूं तम्हां का कहा का लागा डरनअ? तेऊ परमेशरा का डरै ज़हा तम्हां मारी करै जम्परी पाणैओ हक आसा। हाँ, सह ई आसा ज़सरी डरा हेठै लागा रहणअ। 6दूई चाम्बे ढब्बै करै कै पांज़ च़ेल्‍ली निं बिक्‍कदी? तैबी निं परमेशर तिन्‍नां मांझ़ै एकी बी बिस्सरदअ। 7इधी तैणीं कि तेऊ आसा थारै मुंडे शराल़ बी सोभ गणै दै। तैही बोला हुंह डरी निं आथी, तम्हैं आसा तिन्‍नां च़ेल्‍ली का खास्सै किम्मती।

ईशू मनणअ या नांईं मनणअ

(मोत्ती 10:32,33; 12:32; 10:19-20)

8“हुंह बोला तम्हां का कि ज़ुंण मुंह मणछे पूता होरी मणछा सम्हनै मने, सह मनणअ मुंह आपणैं बाब परमेशरे स्वर्ग दूते सम्हनै। 9पर ज़ुंण मेरै बारै होरी मणछा सम्हनै हुधिए, तेऊ लै हुधणअ मुंह बी स्वर्गै आपणैं बाब परमेशर अर स्वर्ग दूता सम्हनै।

10“ज़ुंण मुंह मणछे पूतो बरोधी हई किज़ै बोले, तेऊओ ज़ुल्म सका हई माफ, पर ज़ुंण पबित्र आत्में निंदा करे तेऊए ज़ुल्म निं कधि माफ हणैं।

11“ज़ेभै लोग तम्हां सभागृहा, राज़पाल अर सैणैं सम्हनै निंए, तेभै निं फिकर करी कि हाम्हां किहअ करै अर किज़ै बोल़णअ, या किज़ै ज़बाब दैणअ। 12किल्हैकि पबित्र आत्मां खोज़णअ तम्हां का तेभी कि तम्हां किज़ै बोल़णअ।”

एकी सेठ ऐडै मणछे कथ्या

13तेखअ बोलअ एकी मणछै लोगे झाल़ै मांझ़ा का ईशू लै, “हे गूरू, मेरै भाई लै बोल इहअ कि बाबे ज़ैदात दै मुल्है बी बांड।” 14ईशू बोलअ तेऊ लै, “हे मणछा, हुंह कुंणी आसा डाहअ द थारै पांच़ अर बांडी करदअ?”1 15ईशू बोलअ तेखअ तिन्‍नां लै, “चतैन रहा, अर सोभी रंगे मांण करनै का रहा आप्पू बच़दै। किल्हैकि कोहिए ज़िन्दगी निं तेऊए खास्सी ज़ैदात करै बच़दी।”

16तेखअ खोज़ी ईशू तिन्‍नां का एक होर कथ्या, “एकी सेठ मणछे हुई ज़िम्मीं दी खास्सी पज़ैआ। 17तेखअ लागअ सह आपणैं मन्‍नैं आप्पू लै बोल्दअ, ‘हुंह किज़ै करूं? मुखा निं एतरी फसला डाहणां लै ज़ैगा आथी।’ 18तेखअ बोलअ तेऊ ‘मुंह करनअ इहअ कि मुंह बणाणैं होछ़ै मणशू खोल्ही करै बधिया बडै अर तेथ डाहणअ मुंह आपणअ नाज़। 19तेखअ दैणीं मुंह आपणैं शाह लै एही दसल्‍ली कि ताखा आसा आजू खास्सी साला लै धन-माया अर ज़ैदात डाही दी। मुंह करनअ ऐबै बैह संघा हणीं मुंह मौज़।’ 20पर परमेशरै बोलअ तेऊ लै इहअ, ‘आरा ऐडै मणछा, तूह मरनअ ऐहा ई राची अर ज़ुंण बी तंऐं कठा आसा किअ द, सह कसरअ हणअ?’ 21इहअ ई ऐडअ आसा सह मणछ बी ज़ुंण आप्पू लै धन-माया कठा करा, पर परमेशर निं तेऊ सेठ मंदअ।”

परमेशरा दी डाहा भरोस्सअ

(मोत्ती 6:25-34)

22तेखअ बोलअ ईशू आपणैं च़ेल्‍लै लै, “तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि हाम्हां किज़ै खाणअ, किज़ै पिणअ नां आपणीं देही लै फिकर करी कि किज़ै बान्हणअ? 23किल्हैकि ज़िन्दगी आसा रोटी का अर देही आसा झिकल़ै का खास्सी किम्मती। 242 सरगै डैऊंदै काऊड़ै भाल़ा! ईंयां नां बऊंदै अर नां लऊंदै नां तिन्‍नें खेच खहल़ नां भढार हंदै। तैबी धाचा तिन्‍नां परमेशर आप्पै। तम्हैं आसा इना का खास्सै किम्मती।

25“तम्हां मांझ़ै इहअ कुंण आसा ज़ुंण फिकर करी आपणीं अमर धख ज़ेही बी सका लाम्मी करी? 26तैही बोला हुंह तम्हां लै, ज़ै तम्हैं फिकर करी एक होछ़अ ज़िहअ काम बी निं करी सकदै, होरी गल्‍ला लै किल्है करा फिकर?

27“बणैं लागै दै होछ़ै-होछ़ै फूला लै दैआ धैन कि तिंयां किहअ करै बझ़ा! तिंयां नां मैन्थ करदै अर नां तिंयां कातदै, तैबी बोला हुंह तम्हां लै कि सुलैमाने राज़ै बी निं आपणीं ज़िन्दगीए सारै राज़-पाठा दी तिन्‍नां मांझ़ै कहा एकी बराबर झिकल़ै बान्हैं। 28ज़ै परमेशर घैहणींए घाहा लै, ज़ुंण आझ़ आसा अर काल्‍ला दहणअ सह आगी जैंदरी, तिन्‍नां का बी इहै झिकल़ै बन्हैऊंआं। ओ बैहमी विश्वासीओ, तम्हां लै कै सह झिकल़ै दैई निं सकदअ? 29तम्हैं ऐहा गल्‍ला लोल़ै निं रहा लागी कि किज़ै खाणअ अर किज़ै पिणअ? नां बैहम करा। 30किल्हैकि संसारे ज़ाती रहा इना गल्‍ला लोल़ी लागी। पर थारै बाब परमेशरा का आसा थोघ कि तम्हां किज़ू गल्‍ले ज़रुरत आसा। 31पर तम्हैं करा आपणैं बाब परमेशरे धर्म अर राज़े लोल़-तोप अर ईंयां सोभ गल्‍ला जाणीं तम्हां भेटी।

स्वर्गो धन

(मोत्ती 6:19-21)

32“तम्हैं आसा भेडे होछ़ै छ़ुंडा ज़िहै ज़हा हुंह सभाल़ा, तम्हैं निं किछ़ी गल्‍ले फिकर करी। किल्हैकि थारै बाब परमेशरा लागअ इहअ भलअ कि तेऊ दैणअ तम्हां लै राज़। 33आपणीं ज़ैदात करा बेच़ी दान अर आप्पू लै बणाआं इहै थैल्‍लू ज़ुंण कधि पराणैं निं हंदै। मतलब स्वर्गै करा आप्पू लै धन कठा ज़ुंण तिधी सदा रहणअ। नां तेता नेल़ च़ोर एछदअ अर नां किल़ै लागदै। 34किल्हैकि ज़िधी थारअ धन आसा, तिधी रहणअ थारअ मन्‍न बी लागी।

बिऊंतै रहा

35“थारी कुछी लोल़ी गाची बान्हीं रही अर थारै दीऐ लोल़ी ज़ल़दै रहै। 3 36तम्हैं रहा तिन्‍नां मणछ ज़िहै ज़ुंण आपणैं मालका न्हैल़ै रहा लागी कि बैहा का केभै एछणअ फिरी कि ज़ेभै सह दुआर टोक्‍के, तेभै खोल्हणअ तेभी तेऊ लै दुआर। 37तिन्‍नां लै आसा बर्गत, ज़हा तिन्‍नों मालक एछी बिहुदै भाल़े। हुंह खोज़ा तम्हां का सत्त कि ज़ेभै सह तिन्‍नां रोटी खांदअ बशैल़े, तेभै करनी तेऊ आप्पै दास बणी तिन्‍नें च़ाकरी। 38ज़ै सह राचकै दुजै पहरै या चिऊथै पहरै तिन्‍नां बिऊंतै भाल़े, तिन्‍नां लै हणअ सह खुश।

39“पर ऐहा गल्‍ला लऐ तम्हैं समझ़ी कि, ज़ै घअरे मालका का इहअ थोघ हंदअ कि च़ोर केभै एछणअ तै रहणअ त तेऊ बिऊंतै अर आपणैं घअरै निं तेऊ च़ोरी दैणीं ती हणैं। 40तम्हैं बी रहा हर बगत तैर। किल्हैकि ज़हा घल़ी तम्हैं सोठी बी निं सकदै, तैहा घल़ी एछणअ हुंह मणछो पूत।”

विश्वासा करनै या नांईं करनै जोगी दास

(मोत्ती 24:45-51)

41तेखअ बोलअ पतरासै, “हे प्रभू, ऐहा कथ्या कै तूह सिधअ हाम्हां ई लै बोला कि होरी लै बी बोला?” 42ईशू बोलअ तेऊ लै, “इहअ भरोस्सै करनै जोगी अर समझ़कार मणछ कुंण आसा ज़सरै मालकै सह सोभी दास-दासी लै हुकम करदअ अर कामां कराऊंदअ भढारी डाहअ बणाईं कि तिन्‍नां लै रोटी-पाणीं करे दैई? 43मालक हआ तेऊ दासा लै खुश ज़हा तेऊओ मालक इहअ ई करदै भाल़े। 44हुंह खोज़ा तम्हां का सत्त कि तेऊ बणाणअं सह आपणीं सारी ज़ैदातो भढारी। 45पर ज़ै सह दास इहअ सोठे कि मेरै मालक एछणा लै आसा अज़ी खास्सी बल़ैग, अर सह होरी दास-दासी च़िक्‍कदअ-मारदअ अर शूर-शराबा झुटदअ लागे, 46तेऊ दासो मालक एछणअ तैहा धैल़ी, ज़ेभै सह न्हैल़अ बी निं होए लागअ द। ज़ेभै तेऊओ मालक एछणअ तेऊ का निं थोघ बी लागणअ। तेऊ भेटणीं तेते सज़ा तिन्‍नां ज़ेही ज़ुंण विश्वास घात करा।

47“सह दास ज़हा आपणैं मालके बारै थोघ त पर तैर निं रहअ अर नां तेऊ तिहअ किअ ज़िहअ मालकै तेऊ लै बोलअ त! तेऊ भेटणीं बेघै बूरी मार। 48पर ज़हा दासा का इहअ थोघ निं होए कि तेऊओ मालक किज़ै काम कराऊंणअ च़ाहा अर नज़ाणै दी कोई गलती करे, तेऊ भेटणीं थोल़ी मार। तैही ज़हा लै खास्सअ आसा दैनअ द, तेऊ का मांगणअ खास्सअ ई अर ज़हा का खास्सअ डाहअ द आसा, तेऊ का काढणअ बी खास्सअ।

ईशूए एछणेंओ फल

(मोत्ती 10:34-36)

49“हुंह आसा पृथूई दी आगी चैल़दअ आअ द। हुंह होर एता सुआई किज़ै च़ाहा कि आग एभी ज़ल़े! 50मुंह आसा आजू एक घोर दाह-दुखे डुबकी लणा लै। ज़ेभै तैणीं सह पूरअ निं हुअ तेभै तैणीं आसा मुल्है खास्सअ बोझ़। 51तम्हैं किज़ै समझ़ा कि हुंह पृथूई दी मेल़-ज़ोल़ करदअ आसा आअ द? हुंह बोला नांईं, पर हुंह आसा मणछा एकी-दुजै का ज़ुदै करदअ आअ द। 52किल्हैकि एभा पोर्ही हणैं एकी घअरे पांज़ ज़ण्हैं आप्पू मांझ़ै बरोधी चिई ज़ण्हैं दूई का अर दूई ज़ण्हैं चिई का।4

53‘बाबा करनी शोहरू संघै ज़ीद

अर शोहरू करनी बाबा संघै ज़ीद।

ईजा डाहणीं शोहरी संघै ज़ीद

अर शोहरी डाहणीं ईजा संघै ज़ीद।

शाशुई करनी नुशा संघै ज़ीद

अर नुशा डाहणीं शाशुई संघै ज़ीद।’”

प्रभू एछणेंओ नछ़ैण

(मोत्ती 16:2,3)

54ईशू बोलअ तिधी तिन्‍नां खास्सै झाल़्हुऐ दै लोगा बाखा फिरी, “ज़ेभै तम्हैं बादल़ पछ़मा बाखा भाल़ा, तेभै बोला तम्हैं इहअ कि पाणीं हणअ अर इहअ ई हआ बी। 55ज़ेभै दखणा बाखा बागरी च़ला, तेभै बोला तम्हैं इहअ कि आझ़ पल़णअ चटाक धुप्पअ अर हआ बी तिहअ ई। 56ओ कपटी मणछो, पृथूई अर सरगे बारै जाआ तम्हैं तेते लछ़ण भाल़ी समझ़ी, तै एऊ जुगो भेद किल्है निं समझ़दै?

दुशमणा संघै मेल़-ज़ोल़

(मोत्ती 5:25,26)

57“तम्हैं आप्पै किल्है निं फैंसलअ लंदै कि भलअ किज़ै आसा? 58ज़ेभै तूह आपणैं दुशमणा संघै पांच़ा सेटा लै आसा च़ाल्‍लअ द, तेभै कर बाता हांढदी तेऊ संघै मेल़-ज़ोल़। इहअ निं हआ कि सह निंए ताह पांच़ा सेटा अर पांच़ दैए ताह सपाही का अर सपाही पाए ताह कैद खानै दी। 59हुंह खोज़ा तम्हां का सत्त ज़ेभै तैणीं तूह पाई-पाई नां भरी मुक्‍के, तेभै तैणीं निं तूह तिधा का छ़ुटणअ।”