Kulvi Outer Seraji Bible
लूका 24
ईशूओ ज़िऊंदै हणअ
(मोत्ती 28:1-10; मार्कुस 16:1-8; जोहन्ना 20:1-10)
पर हबते पैहली धैल़ी तिंयां दोत्ती-दोत्थी तिन्नां खुशबूदार च़िज़ा ज़ुंण तिन्नैं बणाईं ती, तिन्नां निंईं करै घोरी सेटा लै डेऊई। तिन्नैं भाल़अ कि सह बडी टोल्ह आसा घोरीए मोहरै का पोर्ही बदल़ी दी। तेखअ भाल़अ तिन्नैं भितरी कि प्रभू ईशूए ल्हास बी निं इधी आथी। ऐहा गल्ला भाल़ी तिंयां झशकुई कि अह कै हुअ अर हेरे, तिधी आऐ दूई मर्ध च़मकिल्लै झिकल़ै बान्हैं दै अर तिंयां खल़्हुऐ तिन्नां सेटा।
तिंयां ज़ांऊं डरी, अर पृथूई बाखा मुंह ढोल़ी करै रही, तिन्नैं दूई दूतै बोलअ, “तम्हैं ज़िऊंदै लोल़ी मूंऐं दै मांझ़ै किल्है आसा लागी दी?1 सह निं इधी आथी, पर सह हुअ ज़िऊंदअ, आद करा कि ज़धू सह गलील मुल्खै त, तधू तेऊ कै बोलअ त, ‘अह आसा ज़रूरी कि मुंह मणछे पूता पापी मणछ ढाकी कैद करे अर तिंयां मुंह क्रूसा दी मारी पाए अर हुंह चिऊथै धैल़ै ज़िऊंदअ होए।’”
तेखअ आई तिन्नां ईशू खोज़ी दी गल्ला आद। तेखअ ठुर्ही तिंयां घोरी सेटा का च़ेल्लै सेटा लै अर तिन्नैं खोज़ी सारी गल्ला गैरा च़ेल्लै का अर होरी सोभी का। ज़ुंणी शधाणूं का ईंयां गल्ला खोज़ी, तिंयां ती मगदल़ गराऊंए मरिअम, जोआना, याकबे ईज मरिअम अर होर बेटल़ी बी थिई।
पर तिन्नें गल्ला लागी तिन्नां ज़ेही बृथा अर तिन्नैं निं तिन्नें गल्लो विश्वास किअ। तेखअ उझ़ुअ पतरास अर सह ठुर्हअ घोरी सेटा लै अर तिधी भाल़ै तेऊ सिधै झिकल़ै पल़ै दै। ज़ुंण हुअ त तेता भाल़ी हुअ सह रहैन, संघा फिरअ सह घअरा लै बापस।
इम्माऊस गराऊंऐं बाता ईशू च़ेल्लै संघै
(मार्कुस 16:12,13)
तेखअ तैहा ई धैल़ी तै लागै दै तिन्नां मांझ़ै दूई च़ेल्लै इम्माऊस नाओंऐं गराऊंआं लै डेऊंदै, सह थिअ एरुशलेम नगरी का कोई सात मील दूर। तिंयां थिऐ इना गल्ले बारै आप्पू मांझ़ै गल्ला करदै लागै दै ज़ुंण हुई ती। ज़ांऊं तिंयां आप्पू मांझ़ै गल्ला अर पुछ़-ज़ाच़ करदै तै लागै दै, ईशू आअ अर सह लागअ तिन्नां संघै हांढदअ। पर तिन्नें आछी ती एही बंद कि तिंयां निं ईशू बछ़ैणीं सकै।
ईशू पुछ़अ तिन्नां का, “तम्हैं आप्पू मांझ़ै हांढदी-हांढदी आप्पू मांझ़ै किज़ै गल्ला करा?”
तिंयां खल़्हुऐ दुखी ज़िहै। इहअ शूणीं बोलअ एकी कलोपास नाओंए मणछै, “तूह कै एरुशलेम नगरी एक्कै मणछ आसा परदेसी कि ज़हा का इहअ थोघ बी निं आथी कि इना धैल़ै एरुशलेम नगरी कै-कै हुअ।”
ईशू पुछ़अ तिन्नां का, “कै गल्ला हुई?”
तिन्नैं बोलअ इहअ, “नासरत नगरीओ ईशू ज़ुंण परमेशर अर सोभी लोगा नेल़ काम अर बैणा दी शगती आल़अ अर परमेशरो गूर त, सह धर्मीं ढाकअ बडै प्रोहतै अर अफसरै कि तेऊ लै दैणीं मौते सज़ा अर सह मारअ तिन्नैं क्रूसा दी। पर हाम्हां ती एही आशा कि एऊ दैणअ इज़राईला लै दुशमण रोम राज़ा का छ़ुटकारअ। पर इहअ निं हई सकअ। इना गल्ला का लाऊआ हुई तेऊ मरी हई आझ़ चअन धैल़ी।
“हाम्हां मांझ़ै कई बेटल़ीए गल्ला शूणीं झाखुऐ हाम्हैं होर बी, तिंयां डेऊई दोत्ती घोरी दी ज़िधी सह दाबी त डाहअ द। तिन्नां निं ईशूए ल्हास तिधी भेटी अर तिंयां बोला इहअ कि तिन्नां भेटै तिधी स्वर्ग दूत अर तिन्नैं स्वर्ग दूतै बोलअ इहअ कि ईशू हुअ ज़िऊंदअ। म्हारै साथी मांझ़ै बी डेऊऐ कई घोरी सेटा भाल़ै अर ज़िहअ तिन्नैं बेटल़ी बोलअ त तिन्नैं बी भाल़अ तिहअ ई, पर सह निं भाल़ी तिन्नैं।”
तेखअ बोलअ ईशू आपणैं तिन्नां च़ेल्लै लै, “हे ऐडै मणछो, तम्हैं आसा तिन्नां गल्ला दी विश्वास करना लै खास्सै बेसमझ़ ज़ुंण परमेशरे गूरै मसीहे बारै आसा शास्त्रा दी खोज़ी दी! अह कै ज़रूरी नांईं त आथी कि मसीहा दुख भुगती करै आपणैं प्रतप्पा लै डेओए?” तेखअ समझ़ाऊअ तेऊ तिन्नां का परमेशरे गूर मोसा अर होरी गूरे कताबा का शुरू करी पबित्र शास्त्रा दी खोज़ै दै बधाना का आपणैं बारै लिखी दी सारी गल्लो मतलब।2
तेतरी गऐ तिंयां तेऊ गराऊंआं नेल़ पुजी। ज़ांऊं तिंयां तिधा लै डेऊंदै लागै, तेऊए हांढणे साबा का ज़ाण्हुंअ इहअ थोघ कि सह च़ाहा त तिन्नां का बी आजू डेऊणअ। पर तिंयां लागै तेऊ का एही अरज़ करी तेऊ तिधी रोक्कदै, “हाम्हां संघै दै आझ़ बैल़ी रहणैं ऐबै गई सान्ह पल़ी।” तेखअ डेऊअ सह तिन्नां संघै भितरा लै।
ज़ांऊं सह तिन्नां संघै रोटी खांदअ बेठअ, तेऊ किअ रोटी ढाकी करै शूकर अर रोटी चोल़ी करै लागअ तिन्नां लै दैंदअ। तेखअ तिन्नें आछी खुल्ही अर तिन्नैं बछ़ैणअ कि अह आसा प्रभू, पर ईशू हुअ तिन्नें आछी सेटा का लोप।
तेखअ किई तिन्नैं आप्पू मांझ़ै गल्ला, “बाता हांढदी ज़ांऊं सह हाम्हां संघै गल्ला करदअ त लागअ द अर पबित्र शास्त्रा का मतलब समझ़ाऊअ, म्हारै दिलै तै ज़िहै खुशी दी बुआल़ लागै दै एछदै।” तिंयां उझ़ुऐ तिधा का तेभी संघा पुजै राची भितरी तिंयां एरुशलेम नगरी। तिन्नैं भाल़ै कि ईशूए गैरा च़ेल्लै अर होर साथी तै तिधी कठा हुऐ दै। तिंयां थिऐ लागै दै बोल्दै, “प्रभू ईशू हुअ सच्च़ी ज़िऊंदअ अर शमौन पतरासा का बी शुझुअ।” तेखअ खोज़ी तिन्नैं बी तिन्नां का बाता हुई दी गल्ला अर इहअ बी खोज़अ कि रोटी खांदी बारी हाम्हैं सह किअ करै बछ़ैणअ।
ईशू च़ेल्लै का शुझणअ
(मोत्ती 28:16-20; मार्कुस 16:14-18; जोहन्ना 20:19-23; शधाणूं 1:6-8)
तिंयां थिऐ इना गल्ला करदै ई लागै दै कि ईशू खल़्हुअ आप्पै तिन्नां सेटा संघा बोलअ तिन्नां लै, “तम्हां सोभी लोल़ी शांती हुई।” पर तिंयां सोभ डरै, अर तिन्नैं ज़ाणअ इहअ कि हाम्हां का शुझुअ भूत। ईशू बोलअ तिन्नां लै, “तम्हैं किल्है डरै अर थारै मन्नैं किल्है आसा बैहम। मेरै हाथा-खूरा भाल़ा, हुंह आसा सह ई। मुंह छ़ुंहां किल्हैकि आत्मां दी निं हाड-मास्स हंदअ ज़ुंण हाड-मास्स तम्हैं मुखा भाल़ा।”
इहअ बोली रहैऊऐ ईशू तिन्नां का आपणैं हाथ खूर।
पर तिन्नां निस्सअ खुशीए मारै विश्वास हई अर तिंयां हुऐ रहैन, ईशू तिन्नां का पुछ़अ, “तम्हां का खाणां लै बी आसा किज़ै?” तिन्नैं दैनअ भुज़ी दी म्हाछ़लीए एक टांक। ईशू ढाकी तिन्नां सम्हनै अर खाई।
तेखअ बोलअ ईशू तिन्नां लै, “ईंयां आसा मेरी तिंयां गल्ला ज़ुंण मंऐं तम्हां संघै रही तम्हां का खोज़ी ती कि अह आसा ज़रूरी कि ज़ेतरी बी गल्ला, मोसा गूरे बधान अर परमेशरे गूरै लिखी दी भज़ने कताबा दी मेरै बारै आसा लिखी दी, तिंयां लोल़ी पूरी हुई।”
तेखअ दैनी तेऊ तिन्नां लै पबित्र शास्त्रा दी तेऊए बारै लिखी दी गल्ला समझ़णा लै अक्ल। तेऊ बोलअ तिन्नां लै इहअ, “अह आसा शास्त्रा दी पैहलै ई लिखअ द कि मसीहो दुख भुगती करै मरनअ आसा ज़रूरी पर चिऊथै धैल़ै हणअ सह मरी करै भिई ज़िऊंदअ।3
“तिन्नैं आसा इहअ बी लिखअ द कि ज़ुंण तेऊ दी विश्वास करे तिन्नां लै आसा ज़रूरी कि तिंयां हर ज़ैगा ऐहा गल्ला खोज़े ताकि लोग प्राश्त करी पाप छ़ाडी परमेशरा बाखा लै फिरे अर परमेशर तिन्नें पाप माफ करे। मसीहा पिछ़ू हांढणै आल़ै लागा अह खुशीओ समाद प्रच़ार ज़रूरी करनअ किल्हैकि परमेशरै आसा तिंयां एते ई तैणीं छ़ाडै दै। पैहलै करनअ तिन्नां एरुशलेम नगरी प्रच़ार अर तेखअ सारै संसारे सोभी ज़ातीए लोगा सेटा लै। तम्हैं आसा इना सोभी गल्ले शाजत।
“भाल़ा, ज़ुंण करार मेरै बाब परमेशरै आसा किई दी, सह करनी मुंह तम्हां दी पूरी अर ज़ेभै तैणीं तम्हैं स्वर्गा का शगती निं भेटे तेभै तैणीं रहै ऐहा ई नगरी।”
ईशूओ स्वर्गा लै डेऊणअ
(मार्कुस 16:19,20; शधाणूं 1:9-11)
तेखअ निंयैं ईशू तिंयां सोभ एरुशलेम नगरी का बागै बेथनी गराऊंऐं तैणीं, संघा आपणैं हाथ च़की दैनी तिन्नां लै बर्गत। तेखअ हुअ बर्गत दैंदी-दैंदी तिन्नां का ज़ुदअ अर तिन्नें आछी सम्हनै च़कअ ईशू स्वर्गा लै।4
तिन्नैं टेक्कअ ईशू सेटा माथअ अर बडी खुशी-खुशी फिरै एरुशलेम नगरी लै बापस तिंयां करा तै धैल़ परमेशरो शूकर अर धैल़ हआ तै भबनै कठा।
Source notes (4)
- Cross-reference प्रका. 1:18; मार्क. 16:5-6
- Cross-reference जोह. 1:45; लूक. 24:44; बधा. 18:15
- Footnote ईशा. 53:5; लूक. 24:7
- Cross-reference शधा. 1:9; भज. 47:5
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.