Kulvi Outer Seraji Bible
इफिसी 2
मौता का ज़िन्दगी बाखा लै
मसीहा दी विश्वास करनै का आजी तै तम्हैं मूंऐं दै ज़िहै, तम्हां का निं परमेशरे ज़िन्दगी आथी ती किल्हैकि तम्हैं किअ पाप अर तम्हैं निं परमेशरे साबै ज़िन्दगी काटदै तै। तम्हैं थिऐ एऊ जुगे लोगा ज़िहै ज़ुंण तेऊ राख्से साबै च़ला तै ज़ुंण तिन्नां कदुष्ट आत्मों राज़अ आसा ज़हा हाम्हैं इना संसारे आछी करै हेरी निं सकदै। सह ई राख्स करा तिन्नां मणछा मांझ़ै काम ज़ुंण परमेशरो अदर निं करदै। एकी ज़मानैं तै हाम्हैं बी तिन्नां ज़िहै ज़ुंण परमेशरा का दूर रहा तै, हाम्हैं बी करा तै तिन्नां गल्ला ज़ेतो हाम्हां च़ाअ लागा त, ज़ेता करै म्हारी देही अर मन्न खुश हआ त। तेता करै त परमेशर हाम्हां लै नराज़ ज़िहअ एभै होरी लै आसा।
पर परमेशरा लागा म्हारी खास्सी झींण अर सह करा हाम्हां लै खास्सी झ़ूरी। मसीहा दी विश्वास करनै का आजी तै हाम्हैं पाप करनै पिछ़ू मूंऐं दै ज़िहै, परमेशरै दैनी हाम्हां लै ज़िन्दगी ज़ेभै तेऊ मसीहा मरी करै भिई ज़िऊंदअ किअ अर परमेशरे जशा करै ई आसा थारअ उद्धार हुअ द। परमेशरै किऐ हाम्हैं मूंऐं दै मांझ़ा का मसीहा संघै ज़िऊंदै अर मसीहा ईशू संघै स्वर्गै राज़ दैई किअ तेऊ म्हारअ अदर परमेशरै किअ इहअ एते तैणीं कि तेऊ रहैऊंणअ आजू सोभी का कि तेऊओ जश किहअ महान आसा। अह जश हेरअ तेऊ हाम्हां का तिन्नां सोभी गल्ला करी रहैऊई ज़ुंण हाम्हैं मसीहा ईशू दी एक आसा हुऐ दै।
किल्हैकि परमेशरै किअ आपणैं जशा करै थारअ उद्धार ज़ेभै तम्हैं विश्वास किअ, तम्हैं निं आपणैं उद्धार हणां लै किछ़ै मोल दैनअ। एता लै निं तम्हैं इहअ किछ़ै भलअ काम आथी किअ द ज़ेता लै तम्हैं घमंड करी सके। किल्हैकि हाम्हैं आसा तेऊ परमेशरै बणाऐं दै अर मसीहा ईशू दी आसा हाम्हैं नऊंऐं मणछ तिन्नां भलै कामां लै बणाऐं दै ज़ुंण परमेशरै पैहलै ई आसा म्हारै बारै सोठअ द कि हाम्हैं करे।
मसीहा दी एक
तैही डाहा ऐहा गल्ला आद कि तम्हैं आसा होरी ज़ाती दी पैईदा हुऐ दै, यहूदी करा थारअ सुहांग इहअ बोली कि थारअ निं खतैर आथी हुअ द! तिंयां बोला इहअ कि तिंयां आसा परमेशरे खास आपणैं लोग किल्हैकि तिन्नैं आसा खतैर किअ द। अह हुई एही गल्ल कि तिन्नैं किअ सिधअ आपणीं देही दी पर आपणैं दिलै निं किअ। तम्हैं थिऐ तैहा घल़ी मसीहा का ज़ुदै अर परमेशरे आपणीं परज़ा इज़राईली संघै नांईं तै तम्हैं परमेशरे करारा दी साझ़ू आथी। तम्हां निं संसारै आशा ई आथी ती रही दी अर परमेशरा का थिऐ तम्हैं दूर।
पर ज़ुंण तम्हैं दूर थिऐ, ऐबै आणै परमेशरै तम्हैं मसीहा ईशूए तेऊ लोहू करै आप्पू नेल़ ज़ुंण मसीहा थारी तैणीं बहाऊअ।
मसीहा दी आसा सोभै एक
मसीहा किअ आप्पै हाम्हां मांझ़ै मेल़-ज़ोल़। पैहलै ती ज़ेही एक दुआल ज़ुंण यहूदी अर होरी ज़ाती ज़ुदै करा ती। तिंयां करा तै एकी-दुजै संघै नफरत। पर ऐबै पाई मसीहा सह दुआल ढोल़ी अर तिंयां दूई दल किऐ एक।1
मसीहा किअ क्रूसा दी ज़ान दैई मोसा गूरो बधान तेते बिधी अर रबाज़ा संघी खतम ताकि सह यहूदी अर होरी ज़ातीओ आप्पू लै मेल़-ज़ोल़ करी एक नऊंअ लोगो दल बणांए। तेऊए क्रूसा दी मौता करै हुऐ दूई दल एक अर परमेशरा संघै मेल़-ज़ोल़, इहअ करै हुई यहूदी अर होरी ज़ातीए मांझ़ै ज़ीद खतम।
मसीहा आणअ दुही लै अह मेल़-ज़ोल़ करनैओ खुशीओ समाद तम्हां होरी ज़ाती लै ज़ुंण तेऊ का दूर थिऐ अर यहूदी लै बी ज़ुंण नेल़ तै।2
मसीहा आसा म्हारी कूणींए ज़ान
मसीहा किअ हाम्हां लै इहअ कि ऐबै सका हाम्हैं सोभै बाब सेटा तैहा ई पबित्र आत्मां करै पुजी। ऐबै निं तम्हैं होरी ज़ातीए मणछ परदेसी अर पाखलै रहै। तम्हैं हुऐ ऐबै परमेशरे पबित्र लोगा संघै रहणैं आल़ै परमेशरे आपणैं टबर। हाम्हैं आसा सोभै कठा हई तेऊओ भबन ज़ुंण शधाणूं अर गूरे आथरी प्रैंदै आसा च़िणैं द अर तेते सोभी का खास कूणींए ज़ान आसा मसीहा ईशू आप्पै।3
मसीहा डाहा आपणैं लोगा पात्थरा ज़िहै कठा ज़ोल़ी ताकि परमेशरो पबित्र भबन बणें। तम्हैं होरी ज़ातीए विश्वासी बी आसा कठा परमेशरे होरी लोगा संघै पबित्र आत्में शगती करै कठा ज़ोल़ै दै किल्हैकि तम्हैं आसा मसीहा दी एक हुऐ दै। इहअ करै हुऐ तम्हैं सह कोठी ज़िधी परमेशर रहा।
Source notes (3)
- Cross-reference गल. 3:28; इफि. 2:15
- Cross-reference इफि. 2:13; शधा. 2:39
- Cross-reference ईशा. 28:16; 1 करि. 12:28
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.