Kulvi Outer Seraji Bible
इफिसी 3
होरी ज़ाती मांझ़ै पल़सीए च़ाकरी
इना सोभी गल्ला पिछ़ू करा हुंह पल़सी तम्हां लै प्राथणां। हुंह करा मसीहा ईशू लै तम्हां होरी ज़ाती का खुशीए समादा खोज़णेंओ काम अर एता पिछ़ू आसा हुंह कैद खानै बंद किअ द।
परमेशरै आसा आपणैं जशा करै मुल्है तम्हां का खुशीए समादा खोज़णें ज़िम्मैंबारी सभाल़ी दी। तम्हैं आसा सह खुशीओ समाद पाक्कै दी शूणअ द।
ज़िहअ मंऐं थोल़अ ज़िहअ तम्हां लै पैहलै बी लिखअ त, परमेशरै किअ त आप्पै मुखा अह गुप्त भेद प्रगट। एते तैणीं च़ाहा हुंह ऐहा च़िठी तम्हां का खोज़णअ। ज़ेभै तम्हैं ऐहा च़िठी पहल़े, तम्हां का जाणअ थोघ लागी कि मुखा किहअ राम्बल़ै करै आअ मसीहो भेद समझ़। पिछ़ली पोस्तीए लोगा का निं परमेशरै अह भेद प्रगट किअ। पर ऐबै किअ अह पबित्र शधाणूं अर गूरा का पबित्र आत्मां करै प्रगट।
अह गुप्त भेद आसा इहअ कि ज़ुंण यहूदी नांईं आथी तिंयां बी हुऐ मसीहा दी खुशीए समादा करै यहूदी संघै परमेशरे आत्मिक बरासते साझ़ू अर तिंयां होरी ज़ातीए लोग बी आसा परमेशरे लोगा संघै साझ़ू अर तिन्नां बी भेटणीं तिंयां गल्ला ज़ेते परमेशरै करार आसा किई दी किल्हैकि तिंयां बी आसा मसीहा ईशू दी एक।
परमेशरे जश अर शगती करै बणअ हुंह तेऊओ दास अर मुंह भेटअ तेऊए खुशीए समादा खोज़णेंओ मोक्कअ।
परमेशरे भेदो मकसद
हुंह ज़ुंण परमेशरे सोभी पबित्र मणछा मांझ़ै सोभी का होछ़अ आसा, परमेशरै दैनअ मुल्है आपणैं जशा करै मोक्कअ। हुंह सका होरी ज़ातीए लोगा का खुशीओ समाद खोज़ी कि मसीहा आसा बेअन्त बर्गतो मूल़ अर सोभी लै ऐहा गल्ला प्रगट करूं कि तेऊ परमेशरो सह गुप्त सोठ किज़ै आसा। ज़ुंण परमेशर सोभी गल्ला बणाणैं आल़अ आसा तेऊ डाहअ अह शुरू ओर्ही गुप्त।
ताकि ऐबै विश्वासीए टोली करै परमेशरो सारअ ज्ञैन तिन्नां राज़ करनै आल़ै अर ज्ञैनी दी प्रगट होए ज़ुंण स्वर्गे ज़ैगा आसा राज़ करदै लागै दै। अह आसा सह ई गल्ल ज़ुंण परमेशरै सदा लै आसा सोठी दी अर ज़ुंण तेऊ म्हारै प्रभू मसीहा ईशू करै किई पूरी।
ऐबै सका हाम्हैं हिम्मत अर बडै भरोस्सै डाही परमेशरा सेटा एछी किल्हैकि हाम्हैं करा मसीहा दी विश्वास। तैही करा हुंह अरज़ कि ज़ुंण सांगट थारी तैणीं मुल्है आसा लागै दै हंदै, तेता पिछ़ू निं हिम्मत छ़ाडी, किल्हैकि तम्हैं लोल़ी अह गल्ल आपणीं बड़ैई समझ़ी कि हुंह आसा थारी तैणीं इना दुख सांगटा ज़िरना लै बी तैर।
मसीहे झ़ूरी
इना सोभी गल्ला पिछ़ू करा हुंह पल़सी बाब परमेशरा सेटा तम्हां लै माथअ टेक्की करै प्राथणां ज़ुंणी स्वर्गै अर पृथूई दी सोभै गल्ला बणाईं। हुंह करा परमेशरा सेटा एही अरज़ कि सह आपणैं प्रतप्पे साबै एऊ दाना दैए अर तेऊए पबित्र आत्मां तम्हां लै शगती दैए ज़ेता करै थारअ दिल मज़बूत होए।
अर मसीहा थारै दिला दी बस्से ज़िहअ तम्हैं तेऊ दी विश्वास करा। हुंह करा प्राथणां कि परमेशरा लै अर एकी-दुजै लै थारी झ़ूरी करै लोल़ी तम्हैं पाक्कै हुऐ अर तम्हैं पापा दी पल़णै का बच़े। सोभी पबित्र लोगा मांझ़ै लोल़ी तम्हां का ऐहा गल्लो थोघ लागअ कि परमेशर हाम्हां लै केतरी झ़ूरी करा। सह करा हाम्हां संघै महान बेअन्त झ़ूरी। मसीहे बारै बी तम्हां का थोघ लागे कि सह हाम्हां संघै केही झ़ूरी करा ज़ुंण म्हारी समझ़ा का बी बागै आसा, कि थारअ च़ाल-च़लण बी परमेशरे च़ाल-च़लणा ज़िहअ होए।
ऐबै लोल़ी परमेशरो प्रतप्प प्रगट हुअ, तेऊए महान शगती ज़ुंण हाम्हां दी काम करा सह सका म्हारी सोठ समझ़ अर म्हारै मांगणै का बी खास्सी हर गल्ला पूरी करी। टोली अर मसीहा ईशू दी लोल़ी तेऊ परमेशरो हर बगत प्रतप्प सारी सदा तैणीं हुअ! एवमस्तू।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.