इफिसी

इफिसी

इफिसुस नगरीए विश्वासी टोली लै च़िठी

भेत

लिखणैं आल़अ: पल़सी

पहल़णैं आल़ै: इफिसुस नगरीए विश्वासी

सन: 60

शधाणूं पल़सीए इफिसुस रहणैं आल़ै विश्वासीए नाओंए च़िठी आसा सोभी का आजी एते बारै कि परमेशरे सोठ कै आसा “परमेशरे ती एही सोठ कि ज़ेभै ठीक बगत एछे, तेभै स्वर्ग अर पृथूईए सोभी च़िज़ा दी मसीहा राज़ करे।” अह आसा परमेशरे विश्वासी लोगा का मांग बी कि तिंयां मसीहा दी एक हई मणछ ज़ाती एक हणां लै परमेशरे ऐहा महान सोठे साबै आपणीं ज़िन्दगी ज़िऊए।

इफिसुस नगरी लै ऐहा च़िठी दी लिखा लिखणैं आल़अ पैहलै विश्वासी एक हणें बारै, तैहा बाते बारै खोज़दी ज़ेता करै बाब परमेशरै आपणैं लोग छ़ांटी करै ज़ुदै किऐ कि तिन्‍नां किहअ करै भेटी शोहरू मसीहा करै पाप माफी अर तिंयां आज़ाद हुऐ अर किहअ करै दैनअ पबित्र आत्मां करै परमेशरे महान करार पूरै हणैंओ हैअ। दुजै भागा दी करा सह पहल़णैं आल़ै का एही ज़िन्दगी ज़िऊंणें मांग कि मसीहा दी लोल़ी तिन्‍नों एक हणअ साझ़ू ज़िन्दगीओ सत्त बणअ।

मसीहा दी विश्वास करनै आल़ै परमेशरे लोगो एक हणें बारै खोज़णा लै आसा समझ़ाऊऐ दै कई तरिकै करै, ज़िहअ कि: विश्वासीए टोली आसा एक देही ज़ेही, ज़ेतो मूंड मसीहा आसा, या एकी मैहला ज़ेही, ज़ेते कूणींए ज़ान मसीहा आसा, या एकी लाल़ी ज़िहअ ज़सरअ लाल़अ आसा मसीहा। मसीहा दी परमेशरे मांग धारणा करै असर करनै आल़ी। लिखणैं आल़ेए साबै छ़ुंहां अह च़िठी कई महान बडी ज़ैगा। हरेक गल्‍ला दी आसा एथ मसीहे झ़ूरी, बल़ीदान, माफी, जश अर सिध्द हणें प्रैश्शै दी भाल़ी दी।

पल़ी निं ऐहा गल्‍ला बिस्सरदअ आथी कि परमेशर किहअ झणैल़ू आसा, सह बोला इहअ:

“पर परमेशरा लागा म्हारी खास्सी झींण अर सह करा हाम्हां लै खास्सी झ़ूरी। मसीहा दी विश्वास करनै का आजी तै हाम्हैं पाप करनै पिछ़ू मूंऐं दै ज़िहै, परमेशरै दैनी हाम्हां लै ज़िन्दगी ज़ेभै तेऊ मसीहा मरी करै भिई ज़िऊंदअ किअ अर परमेशरे जशा करै ई आसा थारअ उद्धार हुअ द। परमेशरै किअ आपणैं जशा करै थारअ उद्धार ज़ेभै तम्हैं विश्वास किअ, तम्हैं निं आपणैं उद्धार हणां लै किछ़ै मोल दैनअ।”

(2:4,5,8)

कताबे बांड

भेत 1:1-2

मसीहा अर विश्वासीए टोली 1:3—3:21

मसीहा दी नऊंईं ज़िन्दगी 4:1—6:20

नचोल़ 6:21-24