Kulvi Outer Seraji Bible
इफिसी 1
अह च़िठी आसा मुंह पल़सी बाखा ज़ुंण परमेशरे मरज़ी दी मसीहा ईशूओ शधाणूं आसा।
हुंह लिखा इफिसुस नगरी रहणैं आल़ै परमेशरे तिन्नां पबित्र मणछा लै ज़ुंण मसीहा ईशू दी शुचअ-पाक्कअ आसा।
म्हारै बाब परमेशर अर प्रभू ईशू मसीहा का आसा मेरी एही अरज़ कि सोभी लै लोल़ी तेऊए झींण अर शांती सदा हुई।
मसीहा दी आत्मिक बर्गत
परमेशरो करा शूकर ज़ुंण म्हारै प्रभू मसीहा ईशूओ बाब आसा। तेऊ दैनी हाम्हां लै मसीहा दी स्वर्गे ज़ैगा सोभी रंगे आत्मिक बर्गत। किल्हैकि हाम्हैं हुऐ मसीहा संघै एक। अह आसा इहअ कि स्वर्ग अर पृथूई बणाणैं का पैहलै ई छ़ांटै परमेशरै हाम्हैं मसीहा करै आप्पू लै। ताकि हाम्हैं पबित्र होए अर हाम्हां दी परमेशरा किछ़ै खोट निं शुझिए।
किल्हैकि परमेशर करा हाम्हां लै झ़ूरी, तेऊ डाही पैहलै ई अह गल्ल हाम्हां लै सोठी कि तेऊ बणाणैं हाम्हैं मसीहा ईशू करै आपणैं शोहरू। परमेशरै किअ अह एते तैणीं कि ज़ुंण परमेशरै हाम्हां लै जश दैनअ, तेता लै हाम्हैं तेऊए स्तोती करे ज़ुंण तेऊ हाम्हां लै मुफ्त दैनअ। किल्हैकि हाम्हैं आसा तेऊए पैरै पूता दी एक हुऐ दै।
परमेशर आसा जश अर झींण करना लै सेठ। ज़ेभै मसीहा म्हारी तैणीं आप्पू बल़ीदान हुअ, परमेशरै दैनअ हाम्हां लै मसीहे लोहू करै छ़ुटकारअ अर म्हारै पाप किऐ तेऊ माफ। परमेशरै दैनी आपणीं महान अक्ल अर समझ़ा करै हाम्हां लै आपणीं झींण तरैल़ी।
परमेशरै खोज़ै हाम्हां का आपणैं दिला-मन्नें भेद ज़ुंण महान काम तेऊ मसीहा करै हाम्हां लै त सोठअ द। तेऊ लागअ इहअ ई करनअ ठीक अर एता करै खोज़अ तेऊ हाम्हां का कि मसीहा करै हाम्हां किज़ै भेटणअ। परमेशरे ती एही सोठ कि ज़ेभै ठीक बगत एछे, तेभै स्वर्ग अर पृथूईए सोभी च़िज़ा दी मसीहा राज़ करे।
परमेशरै छ़ांटै हाम्हैं पैहलै ई मसीहा दी एक हणां लै तिहै ई कामां करना लै ज़िहअ सह च़ाहा।
परमेशरे सोठ ती एही कि ज़ुंण हाम्हैं यहूदी ज़हा पैहलै ई मसीहा का आशा ती कि हाम्हां करै परमेशरो प्रतप्प प्रगट होए। ऐबै शूणअ तम्हैं होरी ज़ाती बी शुचअ बैण, ज़ुंण खुशीओ समाद आसा कि परमेशरै दैनअ तम्हां लै उद्धार। ज़ांऊं तम्हैं मसीहा दी विश्वास किअ तेऊ बणाऐं तम्हैं बी पबित्र आत्मां दैई आपणैं, ज़ेते तेऊ खास्सी साला पैहलै करार ती किई दी। किल्हैकि परमेशरै आसा हाम्हां लै पबित्र आत्मां दैनी दी, तेता करै हआ हाम्हां निहंचअ कि तेऊ दैणीं हाम्हां लै तिंयां भली गल्ला ज़ेतो तेऊ हाम्हां लै बाहिदअ आसा किअ द। सह हणअ तेभै ज़ेभै परमेशर हाम्हां पठी निंए बच़ाऊई ज़ुंण हाम्हैं तेऊए आपणैं लोग आसा, एता करै हणअ परमेशरो अदर अर प्रतप्प प्रगट।
पल़सीए प्राथणां
किल्हैकि परमेशरै किअ तम्हां लै बतेर्हअ, मंऐं शूणअ प्रभू ईशू दी थारै पाक्कै विश्वासे बारै अर हर ज़ैगा सोभी विश्वासी भाई लै थारी झ़ूरी करनी। हुंह करा कबल्लअ थारै बारै परमेशरो शूकर अर आपणीं प्राथणां दी करा हुंह हर बगत आद।
हुंह करा प्रतप्पा आल़ै परमेशर बाब अर म्हारै प्रभू ईशू मसीहा का प्राथणां कि सह तम्हां लै आत्मिक अक्ल दैए अर समझ़ दैए। हुंह करा प्राथणां बी कि परमेशर थारै दिलै तैहा गल्ला प्रगट करे ज़ेता सह हाम्हां लै दैणअ च़ाहा, ताकि तम्हां का थोघ लागे कि ज़ेते हाम्हां तेऊ का आशा आसा तिंयां गल्ला हाम्हां लै केतरी महान आसा। अर तिन्नां सोभी लै बी ज़ुंण तेऊ पबित्र हणें तैणीं शादै दै आसा।
हुंह च़ाहा इहअ कि तम्हां का परमेशरे महान शगतीओ थोघ लागे ज़ुंण हाम्हां मसीहा दी विश्वास करनै आल़ै लै आसा डाही दी। अह आसा सह ई महान शगती ज़ेता करै परमेशरै मसीहा भिई ज़िऊंदअ किअ अर सह मसीहा स्वर्गै आपणीं दैहणीं बाखा सोभी का बडी पदबी दी बशैल़अ।1
तेऊ संसारै हणअ मसीहा सोभी प्रैंदै राज़अ। हरेक शगती आल़ी आत्मां, हर राज़ करनै आल़ै नाअं ज़ुंण बी आसा तिन्नां सोभी का आसा मसीहा सोभी का बडअ सदा लै राज़अ। परमेशरै दैनअ तेऊ लै सोभी गल्लो हक अर सह आसा मसीहा ई ज़ुंण परमेशरै तिन्नां सोभिओ सैणअ बणाअं ज़ुंण विश्वास करा।2 हाम्हैं विश्वासी आसा मसीहे देही ज़िहै। मसीहा। सह करा सारी शगती संघै हाम्हां मांझ़ै काम ज़िहअ सह सारै भ्रमंडै काम करा।
Source notes (2)
- Cross-reference इब्रा. 10:22; भज. 110:1
- Cross-reference कुलू. 2:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.