1 राज़ै

1 राज़ै

राज़ै सुलैमानो दोहरअ मन्‍न अर इज़राईल देश बांढुअ दूई बाखा लै

भेत

लिखणैं आल़अ: खास थोघ निं आथी पर कोऐ बोला अह आसा जेरमयाह गूरै लिखी दी

सन: 590 का 538 ईसा आजी

पहल़णैं आल़ै: इज़राईली

पैहलै राज़े ऐहा कताबा दी आसा शमूएले कताबा का आजूए गल्‍ला लिखी दी। शुरू दी थिई 1 राज़ै अर 2 राज़ै एक्‍कै कताब अर सह थिई खास्सी लाम्मी अर तैही बणाऐं तेते दूई भाग। अह कताब आसा राज़े कताबो पैहलअ भाग। अह कताब आसा तधू लिखी दी ज़धू एरुशलेम बिधातो पैहलअ भबन थिअ।

ऐहा कताबा सका चिई हेस्सै दी बांडी:

दाबेदो शोहरू सुलैमान इज़राईल अर यहूदो राज़अ अर राज़ै दाबेदे मौत।

राज़ै सुलैमानो राज़ अर तेऊए काम खासकर एरुशलेम नगरी बिधाता लै भबन बणाणअं।

इज़राईल देश बांढुअ उतर अर दखण दूई हेस्सै दी अर ईसा आजी नहुई सदी दी इना दुही मुल्खै राज़ करनै आल़ै राज़ै।

1 राज़ै ऐहा कताबा दी आसा कई मशूर गूर एलीशे बारै बी खोज़अ द ज़ुंणी उतरा बाखा मुल्खे कदुष्ट राज़ै अहाब अर राणीं जज़बेलो बरोध किअ। एलियाह दैनी परज़ा लै चतैनगी कि बिधाता छ़ाडी होरी देअ देबतै निं पूज़ी आथी। एलियाह च़ाहा त लोगा का ऐहा गल्‍ला समझ़ाऊंणअ कि एक बिधाता ई आसा शुचअ अर असली परमेशर अर तेऊ रहैऊअ बिधाता अर होरी लोगे बाल देअआ मांझ़ै मकाबलअ बी अर बिधाता निखल़अ असली अर शुचअ। एलियाह खोज़अ लोगा का इहअ:

“तम्हां कधू तैणीं रहणअ दुही बाता? ज़ै परमेशर बिधाता आसा, तै पूज़ा तेऊ! ज़ै बाल देअ आसा परमेशर, तै पूज़ा तम्हैं तेऊ! बाल देअए गूर करै आपणैं देअआ सेटा अरज़ अर हुंह करूं बिधाता सेटा। तेखअ ज़ुंण सरगा का आग शोटी ज़बाब दैए सह ई हणअ असली परमेशर।”

(18:21,24)

कताबे बांड

सुलैमानो राज़ 1:1—11:43

इज़राईल बांढुअ दूई बाखा 12:1—16:34

एलियाह अर अहाब 17:1—22:53