Kulvi Outer Seraji Bible
1 राज़ै 10
शेबा देशे राणीं पुजी राज़ै सुलैमाना सेटा मिलदी
(2 इतिहास 9:1-12)
शेबा नगरीए राणीं शूणीं बिधाते बारै राज़ै सुलैमाने मशूरी, सह आई एरुशलेम नगरी लै सुलैमाना का कठण सुआला पुछ़दी कि तेऊ परखे। तैहा आणअ आप्पू संघै आपणैं कार-करिंदैओ बडअ दल एरुशलेम नगरी लै। सुलैमाना लै आणै तैहा किम्मती मणीं, सुन्नैं अर कई रंगे खुशबूदार मसालै ऊँट लादी भैंट। सुलैमाना सेटा पुजी लागी सह तिन्नां सुआला पुछ़दी ज़ुंण तैहा सोठी तै डाहै दै। राज़ै सुलैमानै दैनअ तेसे सोभी सुआलो ज़बाब, एही निं किज़ै गल्ल ई रही ज़ुंण सुलैमान तैहा का खोज़ी निं सकअ।
शेबा नगरीए राणीं हुई राज़ै सुलैमाने अक्ल भाल़ी रहैन। ज़ांऊं तैहा सुलैमानो मैहल, तेऊए पलगा दी खाणअ-पिणअ अर तेऊए कार-करिंदै किहै बेठा, तेऊए दास-दासी किहै झिकल़ै बान्हीं हआ खल़ै, तेऊए मैहलै रोटी-पाणीं खैऊंणैं-पणैऊंणै आल़ैओ किहअ सूल आसा अर राज़अ सुलैमान बिधाते भबना लै डेऊई किहै हूम अर बल़ीदान करा करी, सह हुई इना सोभी गल्ला भाल़ी हक्की-बक्की। तैहा बोलअ राज़ै सुलैमाना लै, “ज़िहअ मंऐं आपणैं देशै तेरै अर तेरी अक्लीए बारै शूणअ त, तूह आसा असली दी तिहअ ई। पर ज़ांऊं तैणीं मंऐं इधी एछी आपणीं आछी निं भाल़अ, तेभै तैणीं निं मुंह विश्वास हुअ। मुखा निं एते आधी गल्ले बारै बी थोघ आथी त। ज़ेतरअ मुखा खोज़अ त, तूह आसा तेता का कई गुणा खास्सअ अक्ली आल़अ अर सेठ। तेरी राणीं भाल़ केही भागा आल़ी आसा! अर किहै भागा आल़ै आसा तेरै दास-दासी ज़ुंण कबल्लै ताह सेटा रहा अर तेरी अक्लीए गल्ला शूणां। तेरै परमेशर बिधाते लोल़ी ज़ै-ज़ैकार हुई, सह आसा ताल्है खुश अर तेऊ बणाअं तूह इज़राईल देशो राज़अ। किल्हैकि इज़राईला लै तेऊए झ़ूरी आसा अटल़। तूह बणाअं तेऊ तिन्नां प्रैंदै एते तैणीं राज़अ कि धर्म अर नसाफ बणी रहे।”
शेबा नगरीए राणीं दैनअ राज़ै सुलैमाना लै पज़ाह कुंटल़ सुन्नअ, खास्सी किम्मती मणीं, खास्सै खुशबूदार किम्मती मसालै। एतरी च़िज़ा भैंट निं इज़राईला लै कधि भैंट दैनी ती।
राज़ै हिरामे ज़हाज़ बी ज़ुंण ओपीर नगरी का सुन्नअ आणा तै, तिन्नैं बी आणअ खास्सअ सुन्नअ, च़ंदन नाओंए बूटे किम्मती काठ अर खास्सी किम्मती मणीं। च़ंदने काठा करै बणाऐं राज़ै सुलैमानै बिधाते भबन अर राज़ दरबारा लै शिहल़ी, गिहा बोल़णैं आल़ै लै बींन, अर तारा आल़ै साज़-बाज़। इहै च़ंदने काठ बी निं आझ़ तैणीं इज़राईले राज़ै लै कोही दैनै तै, नां कुंणी तधा बाद दैनै अर नां कुंणी भाल़ै।
शेबा देशे राणीं दैनी होर बी ज़िहअ राज़ै सुलैमानै च़ाहअ तेही भैंट अर राज़ै सुलैमानै बी दैनअ तैहा लै तिहअ ई ज़िहअ सह च़ाहा ती। तेखअ डेऊऐ सह अर तेसे कार-करिंदैओ सारअ दल आपणैं देशा लै फिरी।
राज़ै सुलैमानो बल अर ज़ैदात
(2 इतिहास 9:13-29)
हर साल एछा त राज़ै सुलैमाना सेटा लै दूई शौ पज़ाह कुंटल़ सुन्नअ, बपारी का कारअ, अरब देशे राज़ै का कारअ अर आपणैं इज़राईल देशे राज़पाला का कारअ एछा त एता का लाऊआ।
राज़ै सुलैमानै ती सुन्नअ गाल़ी करै दूई शौ बडी-बडी ढाल़ा बणाईं दी, एकी-एकी ढाल़ा दी थिअ कोई सात-सात किलू सुन्नअ लाअ द। तेही ई बणाईं तेऊ चअन शौ होर ढाल़ा अर तेथ त एकी-एकी ढाल़ा दी कोई दूई-दूई किलू सुन्नअ लाअ द। तिंयां ढाल़ा ती तेऊ आपणैं मैहलै अर लाबानोन बणां नाओंए मैहलै डाही दी।
आप्पू लै ती तेऊ हाथी दांदे राज़गाद्दी बणाईं दी अर सह थिई च़ोखै सुन्नैं करै महल़ी दी। राज़गाद्दीओ कठैम्ह त प्रैंदा का गोल़ बल्दे मुंहां ज़िहअ अर दोहरी बाखा तै बाहा टकैल़णा लै ढासणैं लाऐ दै अर तेथ थिऐ दोहरी बाखा सिहा ज़िहै मुंह। राज़गाद्दी लै थिई तोल़ा बाखा उझै छ़ह पैल़ी अर हर पैल़ी दी थिऐ दोहरी बाखा बाढै सिहा ज़िहै मुंह काढै दै पठी बारा सिह। एही राज़गाद्दी निं सारै संसारै किधी आथी त।
राज़ै सुलैमाने झुटणें भांडै बी थिऐ च़ोखै सुन्नैं करै बणाऐं दै। लाबानोन बणां नाओंए मैहलै डाहै दै सोभै भांडै बी थिऐ सोभै च़ोखै सुन्नें। तेथ निं च़ंदीओ एक बी भांडअ आथी त। राज़ै सुलैमाने ज़मानैं निं च़ंदीओ किज़ै मोल ई समझ़दै तै। राज़ै सुलैमानै थिऐ समुंदरे बपारा लै खास्सै ज़हाज़ डाहै दै। तिन्नां करा त सह राज़ै हिरामा संघै हर चिऊथी साला सुन्नैं, च़ंदी, हाथी दांद, गूणी-बांदर अर मोरा आणदै छ़ाडी।
राज़अ सुलैमान त संसारे सोभी राज़ै का खास्सअ सेठ अर अक्ली आल़अ। सारै देशा का च़ाहा तै लोग तेऊ का सलाह लणी अर अक्ल शुणनी ज़ुंण तेऊ लै बिधाता आसा दैनी दी। ज़ुंण बी राज़ै सुलैमाना सेटा एछा थिअ, सह आणा त तेऊ सेटा भैंट ज़रूर। हर साल एछा तै तेऊ सेटा दूरा-दूरा का लोग संघा आणा तै सुन्नअ, च़ंदी, किम्मती झिकल़ै, अस्त्र-शस्त्र, खुशबूदार मसालै, घोल़ै अर खच़रा लादी।
राज़ै सुलैमाना का हुऐ च़ौदा शौ रथ, बारा हज़ार घोल़े शुंआरी। तिंयां थिऐ तेऊ एरुशलेम अर होरी नगरी दी डाहै दै।2 सुलैमाने राज़ा दी हुअ त एरुशलेम नगरी च़ंदीओ मोल केल़ुईए काठ अर पात्थर अर यहूदा मुल्खै निऊल़ै लागै दै आम डाल़-बूटे काठा बराबर।3 राज़अ सुलैमान आणा त आप्पू लै घोल़ै मिसर देशा का। राज़े बपारी आणा तै तिन्नां ज़ेतरअ भाअ पाक्कअ हुअ किअ द तेते साबै छ़ूंढे-छ़ुंढ मोलै लई।4 एक रथ आणा तै तिंयां तेऊ ज़मानें छ़ह शौ च़ंदीए सिक्कै मिसर देशा का मोल दैई, अर घोल़ै लै दैआ तै तिंयां एक शौ पज़ाह च़ंदीए सिक्कै मोल। हित्ती अर सिरीया देशे राज़ै लै बी दैआ तै तिंयां बपारी एऊ ई मोलै।
Source notes (4)
- Cross-reference मोत्त. 12:42; लूक. 11:31
- Cross-reference 1 राज़. 4:26
- Cross-reference बधा. 17:17
- Cross-reference बधा. 17:16
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.