Kulvi Outer Seraji Bible
1 राज़ै 7
राज़ै सुलैमानो आप्पू लै मैहल
सुलैमानै बणाअं आप्पू लै बी नऊंअ मैहल अर एता बणाणां लै लागी तेर्हा साला। एक मैहल बणाअं तेऊ होर, तेऊ नाअं त लाबानोन बणों मैहल। अह थिअ शौ हाथ लाम्मअ, पज़ाह हाथ बिरलअ अर तिह हाथ उछ़टी ती एते मज़ल। एथ ती बडै-बडै केल़ुईए थाम्हे च़ार लगैगा लाई दी। एकी लगैगा दी थिऐ पंद्रा थाम्ह अर तिन्नां सोभी थाम्हा प्रैंदै तै तेतरै ई मोट्टै पंजताल़ी शौर पाऐ दै। तेता प्रैंदै त केल़ुईए काठो मेल़ पाअ द। बागै दोहरी बाखा पाई चअन-चअन ताक्कीए लगैग आर-पार सम्हनै। तेते दुआरे द्रींड तै च़कूणै बणाऐं दै, तिंयां थिऐ दोहरी बाखा चअन-चअन आर पार सम्हनै लाऐ दै।
सुलैमानै बणाअं पज़ाह हाथ लाम्मअ अर तिह हाथ बिरलअ एक च़ऊंरअ बी, तेथ तै सिधै थाम्ह लागै दै अर तेथ आजू बणाअं तेऊ एक होर ताटल़ू ज़ेथ थाम्ह अर प्रैंदै छ़ाप्पर त।
एक बणाअं सुलैमानै राज़ दरबार ज़िधी सह लोगा लै नसाफ दैआ त, तेता लै बोला त नसाफ करने गाद्दीओ मैहल। सह तेथ तै धरनीं मेल़ अर फेर भित्ती एकी पुंझ़ा का दुजै पुंझ़ा तैणीं केल़ुईए काठ लागै दै।
राज़ दरबारे मैहला भितरी त पिछ़ू त तिहअ ई सुलैमाना लै एक कमरू बणाअं द अर मिसर देशे माहा राज़ेए देई ज़हा संघै सुलैमानै बैह त किअ द, तैहा लै बी थिअ तिहअ ई कमरू बणाअं द।1
ईंयां सोभै भबन अर राज़े मैहलै तै गोधा आथरी उझै मडाथरू तैणीं किम्मती पात्थरा करै बणाऐं दै। पात्थर तै छ़िणीं ठोल्लू अर आरी करै बराबर च़कोर रद्दै बणाऐं दै। आथरी दी थिऐ आठ-आठ, दस-दस हाथ लाम्मै किम्मती पात्थर लाऐ दै। प्रैंदै बी थिऐ किम्मती पात्थर लाऐ दै अर तिंयां थिऐ नापी करै काटै दै अर चाची दी थिऐ केल़ुईए दार पाऐ दै। राज़ मैहले मेट अर बिधाते भबने मेट थिऐ चअन फेरै पात्थरे रद्दै अर हर च़ौथै फेरै केल़ुईए काठे चाची पाई च़िणैं दै।
हिराम कारीगीरो काम
(2 इतिहास 2:13,14)
राज़ै सुलैमानै शादअ सूर नगरी का हिराम नाओं एक ठठार सह थिअ कांस्से कामां लै बडअ सज़ाण कारीगीर। तेऊओ बाब त मरी गअ द अर ईज थिई तेऊए नप्ताली गोत्रा का। हिरामा ती खास्सी समझ़, सह बी त आपणैं बाबा ज़िहअ कांस्से कामां लै सज़ाण अर मशूर कारीगीर। सह पुजअ राज़ै सुलैमाना सेटा संघा सभाल़ी कांस्से कामें सारी ज़िम्मैंबारी।
कांस्से दूई थाम्ह
(2 इतिहास 3:15-17)
हिरामै बणाऐं कांस्सअ गाल़ी करै ठारा-ठारा हाथ लाम्मै कांस्से दूई थाम्ह, गोल़ तै तिंयां थाम्ह सूता करै नापी कोई बारा-बारा हाथ, भितरा का थिऐ तिंयां खोखलै अर तेथ त च़ार आंगल़ मोट्टअ कांस्सअ लागअ द। तिन्नां थाम्हा प्रैंदा लै बणाऐं तेऊ पांज़ हाथ उछ़टै टोप। तिन्नां टोपे च़ुंडी दी पाई सात-सात फेरै शांघल़ी ज़ेही ज़ाल़ीदार खेल़्तरा आल़ी कांगणी। दूई कांगणी लाई टोपा दी होर अर तेथ लाऐ नारदाणैं ज़िहै कांस्से शल़ुम्हणूं।
कांगणी का च़ार हाथ उझै त टोप सुरघे फूला ज़िहअ बणाअं द, ज़ुंण थाम्हे टोपा दी सोभी का हेठै दूई-दूई शल़ुम्हणूं आल़ी कांगणी लाई तेथ तै एकी-एकी कांगणी दी एक-एक शौ नारदाणैं ज़िहै कांस्से शल़ुम्हणूं लागै दै।
हिरामै किऐ ईंयां दूई कांस्से थाम्ह बिधाते भबने प्रऊल़ी आजू खल़ै। ज़ुंण दखण दिशा बाखा थिअ, तेऊ नाअं डाहअ, “जाकीन2” अर ज़ुंण थाम्ह उतर दिशा बाखा थिअ, तेऊ नाअं डाहअ “बोआज़3।” सुरघे फूला ज़िहअ टोप बशैल़अ तिन्नां थाम्हा प्रैंदै।
इहअ करै किअ हिरामै कांस्से थाम्हा बणाणेंओ काम पूरअ।
कांस्सैओ कल़ाह
(2 इतिहास 4:2-5)
हिरामै बणाअं कांस्सैओ बडअ गोल़ कल़ाह, सह थिअ प्रैंदा का दस हाथ खुल्हअ, घेर थिई तेते सूत नापी करै तिह हाथ गोल़ अर सह थिअ कोई पांज़ हाथ उछ़टअ। कल़ाहे घेरै दी थिई उंधै उझै दूई लगैगा दी एक-एक बैथ दूर बल्दे खेल़्तरा पाई दी, तेते खेल़्तर ती तेऊ कल़ाह ई दी काढी दी। सह कल़ाह डाहअ बारा कांस्से बल्दा प्रैंदै। चिई बल्दो मुंह उतर दिशा बाखा, चिई बल्दो मुंह दखण, चिई बल्दो मुंह पुर्बा बाखा अर चिई बल्दो मुंह पछ़म दिशा बाखा। लिंघणैं तै तिन्नें पिछ़ू बाखा कल़ाहे एकी ज़ैगा ज़ुल़ै दै अर तिन्नें पिठी प्रैंदै बशैल़अ कल़ाह। तेऊ कल़ाहो मडोखर त कोई च़ार आंगल़ मोट्टअ अर तेतो घेरअ ज़ाण्हिंआं त सुरघे फूला ज़िहअ। तेथ भितरी एछा त कोई बिह हज़ार बाटी पाणीं।
कांस्से गाड्डै
हिरामै बणाऐं कांस्से दस गाड्डै, तिंयां थिऐ च़ार हाथ लाम्मै अर च़ार हाथ बिरलै अर चअन हाथ उछ़टै। तेथ तै च़ऊ बाखा च़ूल़ै काटी पाल्लै लाऐ दै अर मांझ़ै तै तेथ दिलै ज़ोल़ै दै। दिलै दी थिऐ सिह, बल्द अर करूब नाओंए स्वर्ग दूते खेल़्तर पाई दी। चकाठी दी बी थिई तेही ई खेल़्तर पाई दी। एकी-एकी गाड्डै दी तै हेठै कांस्से च़ार-च़ार घरेट लाऐ दै, तिन्नां चैल़णा लै कांस्से धूर बणाऐं दै। च़ऊ कूणैं दी थिई भितरा बाखा लै कल़ाह थम्हणा लै कांस्से धज़ी लागी दी। तेथ थिई डबरै बशैल़णा लै कांस्से कांगणी लागी दी, एक हाथ रहा ती सह गाड्डै का उझै अर एक बैथ थिई भितरी अर प्रैंदै थिई तेथ खेल़्तर पाई दी। गाडे घरेट तै डेढ-डेढ हाथ उछ़टै तिंयां थिऐ थाल्लै कांस्से धूरा करै ज़ोल़ै दै। तिंयां घरेट थिऐ रथे घरेटा ज़िहै, तेतो घेरअ, घरेट, शल़ाही अर तेते ज़ोल़ सोभै गल़ाऊई-ढल़ाऊई करै बणाऐं दै। सोभी गाड्डै प्रैंदै ती फेर-फिरदी एक बैथ बिरली गोल़ काणस लाई दी अर गाड्डै च़ऊ कूणीं हेठै हाथकला लागी दी। प्रैंदे थुम्हणीं अर धज़ी थिई धरनीं गाड्डै दी ज़ुल़ी दी। पाल्ले धज़ी अर दिलै दी थिई सिह, बल्द अर करूब नाओंए स्वर्ग दूत खज़ूरे बूटे खेल़्तर पाई दी। फेर-फिरदी ती च़ऊ बाखा तेथ काणसा लाई दी। इहअ करै छ़ेक्कै तिंयां दस गाड्डै बणाईं। तिंयां सोभ तै नापी करै एक बराबर अर एक्कै ज़िहै।
तिन्नां गाड्डै प्रैंदा डाहणां लै बणाऐं हिरामै च़ार-च़ार हाथ बिरलै दस डबरै, एकी-एकी डबरै दी एछा त कोई च़ार शौ बाटी पाणीं।4 पांज़ गाड्डै डाहै तेऊ बिधाते भबनै दखणा बाखा पाशल़ी अर बाकी पांज़ डाहै पुर्बा बाखा भबने दुजी पाशल़ी अर सह बडअ कल़ाह डाहअ दखण अर पुर्बा दिशा मांझ़ा-मांझ़ी।
हिराम ठठारै बणाईं दी च़िज़ा
(2 इतिहास 4:11—5:1)
होर बणाऐं हिरामै बतिल्लै, पल़ैंज़ै, प्रिहै। राज़ै सुलैमाना बिधाते भबनै ज़ेतरअ कांस्सैओ काम करनअ त, सह किअ हिरामै पूरअ। तेऊ बणाईं ईंयां च़िज़ा:
दूई कांस्से थाम्ह,
थाम्हा प्रैंदा लै दूई टोप,
शांघल़ी ज़ेही ज़ाल़ीदार खेल़्तरा आल़ी कांगणी,
दुही थाम्हा लै दूई-दूई शल़ुम्हणूं आल़ी कांगणी
तिन्नां च़ऊ कांगणी लै नारदाणैं ज़िहै च़ार शौ शल़ुम्हणूं।
दस गाड्डै अर तेता प्रैंदै कांस्से दस डबरै।
बडअ कल़ाह अर तेता हेठै बारा बल्द, होर बतिल्लै अर पल़ैंज़ै अर
होर प्रिहै।
ईंयां सोभै भांडै ज़ुंण राज़ै हिरामै राज़ै सुलैमानै तैणीं बिधाते भबना लै बणाणैं बझ़ैल़ै, ईंयां तै कांस्सअ कराही करै बणाऐं दै।
ईंयां बझ़ैल़ै तै राज़ै जरदण खागै सक्कोत अर सारतान मांझ़ै तैहा ज़ैगा बणाणैं ज़िधी च़कणाट माट्टअ आसा। अह कांस्सैओ समान निं सुलैमानै तोलअ ई आथी किल्हैकि ईंयां तै खास्सै, तिहअ करै निं थोघ ई आथी कि तेथ केतरअ कांस्सअ लागअ। 5
बिधाते पबित्र ज़ैगा लै ज़ेतरी च़िज़ा लोल़ी ती, तिंयां महल़ी सुलैमानै सुन्नैं करै। बेदी, भोज़ना डाहणां लै मेज़, 6खास पबित्र ज़ैगा आजूए दस सदीऐ, पांज़ दखण दिशा बाखा अर पांज़ उतर दिशा बाखा, फूल, दीऐ, च़िमटै, डबरी, काता, प्रिहै, धूप दानी, धनैरै, भितरा बाखा खास पबित्र ज़ैगा अर भबने बाघली प्रऊल़ीए कल़ोलै बी महल़ै सुन्नैं करै।
ज़ांऊं राज़ै सुलैमानै भबनो सारअ काम करी छ़ेक्कअ, तेऊ डाही सुन्नैं, च़ंदीए अर होर च़िज़ा बिधाते भबने भढारै ज़ुंण तेऊए बाब दाबेदै बिधाता लै ज़ुदी ती डाही दी।7
Source notes (7)
- Cross-reference 1 राज़. 3:1
- Footnote जाकीन परमेशरे फाज़त
- Footnote बोआज़ परमेशरो बल
- Cross-reference लुआ. 30:17-21
- Cross-reference लुआ. 30:1-3; 25:23-30
- Cross-reference लुआ. 25:1-40
- Cross-reference 2 शमू. 8:11; 1 राज़. 18:11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.