Kulvi Outer Seraji Bible
1 राज़ै 16
बिधाता खोज़अ हनानीए शोहरू जेहू गूरा का राज़ै बाशा लै इहअ समाद, “तूह निं किछ़ बी आथी त, पर मंऐं बणाअं तूह आपणीं परज़ा इज़राईली प्रैंदै सैणअ। तंऐं बी किअ ऐबै जरोबामा ज़िहअ पाप अर मेरी परज़ा इज़राईली का बी कराऊऐ तंऐं तिहै ई पाप। तेरै इनै कामैं ठैऊई मुल्है रोश्शै। बाशा, ऐबै करनै मुंह तूह अर तेरअ खिंब खतम, ज़िहअ मंऐं नबाते शोहरू जरोबामा लै किअ। तेरै खिंबा दी ज़ुंण नगरी भितरी मरे, तिन्नैं खाणीं ल्हासा बी कुक्करा अर ज़ुंण नगरी बागै मरे, तिन्नें ल्हासा च़ोच़ल़णी काअ-गरली। अह गल्ल डाही मंऐं बिधाता बोली।”
राज़ै बाशा ज़ुंण बी काम किऐ, ज़िहअ बीर सह थिअ तिंयां गल्ला आसा इज़राईले राज़े इतिहासे कताबा दी लिखी डाही दी। बाशा मूंअ संघा डाहअ सह तिर्सा नगरी दाबी। आजू बणअ तेऊओ शोहरू एला इज़राईलो राज़अ।
बिधाता ज़ुंण समाद हनानीए शोहरू जेहू गूरा का राज़ै बाशा लै दैनअ, सह हुअ एता पिछ़ू कि बाशा किअ बिधाते खलाफ पाप। बिधाता निं तेऊ लै सिधी एता पिछ़ू रोश्शै आई कि तेऊ किअ जरोबामा ज़िहअ पाप, तेऊ लै पल़अ कोप एता पिछ़ू कि तेऊ पाऐ तै जरोबामे खिंबा दी सोभ मारी।
इज़राईला दी राज़अ एला
यहूदा दी त राज़अ आसाह अर तेऊए राज़ा दी छब्बूई साला बणअ बाशा राज़ैओ शोहरू एला इज़राईला दी राज़अ। तेऊ किअ तिर्सा नगरी का दूई साला तैणीं राज़। कार-करिंदै मांझ़ै त एक ज़िम्री नाओं मणछ राज़े आधै रथे दलो प्रधान, तेऊ सोठी राज़ै मारने बिक्री। एकी धैल़ै त राज़अ एला अर्सा नाओंए बज़ीरे घअरै झुटदअ बेठअ द, अर्सा त तिर्सा राज़ मैहलो प्रधान। ज़िम्री आअ घअरा भितरा लै संघा पाअ एला मारी। आप्पू बेठअ तेऊए ज़ैगा इज़राईला दी राज़अ। इहअ हुअ यहूदा मुल्खै राज़ै आसाहे स्ताहुई साला।
ज़िहअ ई राज़अ ज़िम्री राज़अ बणअ, तेऊ पाऐ राज़ै बाशो सारअ खिंब मारी, तेऊ निं राज़ै बाशे रिश्तैदार अर साथी-संघी जैंदरी तोही एक शोहरू बी ज़िऊंदअ छ़ाडअ! राज़ै बाशो हुअ सारअ खिंब खतम, ज़िहअ बिधाता जेहू गूरा का पैहलै ई हेरअ त चतैनगी दैई बोली। बाशा अर एला किअ पाप अर इज़राईली का बी कराऊअ तिन्नैं पाप, बृथा मुहुर्तीए पूज़ा करी ठैऊई तिन्नैं बिधाता लै रोश्शै। ज़िहै-ज़िहै काम राज़ै एला किऐ, तिंयां आसा इज़राईला दी राज़े इतिहासे कताबा दी लिखी डाहै दै।
इज़राईला दी राज़अ ज़िम्री
यहूदा मुल्खै त राज़अ आसाह राज़अ, तेऊए राज़ा दी स्ताहुई साला बणअ ज़िम्री इज़राईल मुल्खो राज़अ। तेऊ किअ तिर्सा नगरी का इज़राईला प्रैंदै साता धैल़ी तैणीं राज़। इज़राईली तै पलिश्ती गिबतोन नगरी संघै जुधा लै डेरै पाऐ दै। ज़ांऊं जुधा लै डेरै पाऐ दै इज़राईली का थोघ लागअ कि ज़िम्री पाअ धोखै करै राज़अ एला मारी संघा बणअ तेऊए ज़ैगा राज़अ। तैहा ई धैल़ी बणाअं इज़राईली सैना आपणअ सैनापति ओमरी इज़राईलीओ राज़अ। ओमरी अर तेऊए सारी सैना फिरै गिबतोन नगरी का पिछ़ू संघा गोटी तिर्सा नगरी फेर-फिरदी। ज़ांऊं राज़ै ज़िम्री का ज़ाण्हुंअ कि तिर्सा नगरी हेरी ऐबै तिन्नैं ज़िती, सह डेऊअ गहल़ा लै मैहला भितरी संघा चैल़ी तेथ आग अर आप्पू बी दझ़अ तेथै। ज़िम्री बी किअ तिहअ ई पाप ज़ेता बिधाता नांईं च़ाहंदअ त। तेऊ बी किअ जरोबामा ज़िहअ पाप अर इज़राईली का बी कराऊअ पाप। ज़िहै-ज़िहै काम राज़ै ज़िम्री किऐ, तिंयां आसा तेऊए द्रोह करने गल्ला संघी इज़राईला दी राज़े इतिहासे कताबा दी लिखी डाहै दै।
इज़राईला दी राज़अ ओमरी
इज़राईली परज़ा बांढुई दूई बाखा, तिन्नां मांझ़ै कई च़ाहा तै गनाथे शोहरू तिबनी राज़अ बणाणअं अर होर तै ओमरी बाखा फिरै दै। खिरी हुई तिन्नें ज़ीत ज़ुंण ओमरी बाखा तै, गनाथो शोहरू तिबनी पाअ मारी अर ओमरी बणअ इज़राईला दी राज़अ। यहूदा मुल्खै थिअ तिहा साला ओर्ही आसाह राज़अ, तेऊए राज़ा दी कत्तुई साला बणअ ओमरी इज़राईला प्रैंदै राज़अ अर तेऊ किअ बारा साला तैणीं इज़राईला प्रैंदै राज़। पैहली छ़हा साला किअ तेऊ तिर्सा नगरी का राज़। बादा का लई तेऊ सामरी धारे ज़ैगा शमेर नाओंए मणछा का छ़ह हज़ार च़ंदीए सिक्कै मोल दैई। ओमरी बणाअं तैहा धारा गहल़ संघा बसाऊई तिधी नगरी। तेखअ डाहअ तैहा नगरी नाअं शमेरे ई नाओंऐं सामरी।
ज़ेतरै राज़ै ओमरी का पैहलै थिऐ, तेऊ किअ तिन्नां का बी खास्सअ पाप ज़ेता का बिधाता नफरत करा। तेऊ ढाकी नबाते शोहरू राज़ै जरोबामे बात संघा ठैऊई बिधाता लै रोश्शै। तेऊ आप्पू बी किअ पाप अर इज़राईली का बी कराऊअ पाप। तिन्नैं ठैऊई बृथा मुहुर्तीए पूज़ा करी बिधाता लै रोश्श। ज़िहै बी भलै-कदुष्ट काम ओमरी किऐ, तिंयां आसा इज़राईला दी राज़े इतिहासे कताबा दी लिखी डाहै दै। राज़अ ओमरी मूंअ संघा डाहअ सह सामरी नगरी दाबी अर तेऊ बाद बणअ तेऊओ शोहरू अहाब इज़राईल मुल्खो राज़अ।
इज़राईला दी राज़अ अहाब
यहूदा मुल्खै गई ती राज़ै आसाहे राज़ा ठत्ती साला हई, तैहा साला बणअ इज़राईला ओमरीओ शोहरू अहाब इज़राईला दी राज़अ अर तेऊ किअ सामरी नगरी का इज़राईला प्रैंदै बाई साला तैणीं राज़। ओमरीए शोहरू अहाबा का आजी ज़ेतरै बी इज़राईला दी राज़ै रहै, तेऊ किअ तिन्नां सोभी का बी खास्सअ पाप ज़ेता का बिधाता नफरत करा। ज़ुंण पाप नबाते शोहरू राज़ै जरोबामै किऐ, तिंयां पाप निं अहाबा सेटा किछ़ बी आथी तै! सह निखल़अ तेता का बी आजू संघा किअ सदोनी राज़ै एतबाले शोहरी जज़बेला संघै बैह, संघा करा त तैहा संघै बाल देअआ पूज़दअ डेऊई! तेऊ बणाअं सामरी नगरी बाल देअआ लै एक देहुरअ अर तेता लै बणाईं एक बेदी। अहाबै बणाईं अशेरा देबीए मुहुर्ती बी। अहाबा का आजी ज़ेतरै बी इज़राईला दी राज़ै थिऐ, तेऊ ठैऊई बिधाता लै तिन्नां सोभी का खास्सी रोश्श। तेऊए राज़ा दी बसाऊई बेतेले हीएलै जेरिहो नगरी भिई। तैहा नगरीए आथरी पांदा मूंअ अहाब राज़ैओ ज़ेठअ शोहरू अबीराम। ज़ांऊं तेऊ नगरीए प्रऊल़ खल़ी किई तेभै मूंअ तेऊओ कान्हअ शोहरू सगूब। अह हुई बिधाता बोली दी सह गल्ल पूरी ज़ुंण तेऊ नूने शोहरू ज़ैहसू का पैहलै ई हेरी ती खोज़ी।1
Source notes (1)
- Cross-reference ज़ैह. 6:26
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.