1 जोहन्‍ना

1 जोहन्‍ना

जोहन्‍ना लिखी दी पैहली च़िठी

भेत

लिखणैं आल़अ: जोहन्‍ना

पहल़णैं आल़ै: एशिया मुल्खै रहणैं आल़ै विश्वासी

सन: 80-95

जोहन्‍ने ऐहा पैहली च़िठीए आसा दूई मकसद (1) आपणैं पहल़णैं आल़ै परमेशर अर तेऊए शोहरू ईशू मसीहे साझ़ू हई ज़िन्दगी ज़िऊंणां लै हैअ दैणअ। (2) तिन्‍नां लै एही झ़ुठी शिक्षे खलाफ चतैनगी दैणीं ज़ेता करै परमेशरा संघै अह साझ़ खतम हआ। अह झ़ुठी शिक्षा ती ऐहा गल्‍ला प्रैंदै कि आछी शुझदै संसारा संघै कठा रही पनपा बूराई। तैही निं ईशू मसीहा परमेशरो पूत असली दी मणछो शोहरू हई ई सकदअ। इना एही गूरूओ त इहअ दाऊअ कि उद्धार पाणा लै लागा हरेकी मणछा संसारे ज़िन्दगीए बारै कई च़िज़ा का छ़ुटणअ। तिंयां सखाऊआ तै इहअ कि नित-पत्त अर भाई संघै झ़ूरी ज़ेही गल्‍लो निं उद्धारा का कोई लणअ-दैणअ आथी।

ऐहा शिक्षे खलाफ बोला लिखणैं आल़अ साफ-साफ कि ईशू मसीहा त असली दी एक मणछ, तेखअ दैआ सह ऐहा गल्‍ला दी ज़ोर कि तिंयां लोग ज़ुंण ईशू मसीहा दी विश्वास करा अर परमेशरा संघै झ़ूरी डाहा, तिन्‍नां लागा आप्पू मांझ़ै बी झ़ूरी ज़रूरी डाहणीं। जोहन्‍ना बोला:

“हाम्हैं खोज़ा तेऊए बारै ज़ुंण सोभी का आजी थिअ अर ज़सरै बारै हाम्हैं शूणअ अर ज़ुंण हाम्हैं भाल़अ। हाम्हैं भाल़अ सह आपणीं आछी अर आपणैं हाथा करै छ़ुंअ बी। सह आसा ज़िन्दगी दैणैं आल़अ बैण।”

(1.1)

कताबे बांड

भेत 1:1-4

न्हैरअ अर प्रैश्शअ 1:5—2:29

परमेशरे लुआद अर राख्से लुआद 3:1-24

शुचअ अर झ़ुठ 4:1-6

झ़ूरी डाहणें ज़िम्मैंबारी 4:7-21

पाक्‍कअ विश्वास 5:1-21