Kulvi Outer Seraji Bible
1 जोहन्ना 1
ज़िन्दगी दैणैं आल़अ बैण
हाम्हैं खोज़ा तेऊए बारै ज़ुंण सोभी का आजी थिअ अर ज़सरै बारै हाम्हैं शूणअ अर ज़ुंण हाम्हैं भाल़अ। हाम्हैं भाल़अ सह आपणीं आछी अर आपणैं हाथा करै छ़ुंअ बी। सह आसा ज़िन्दगी दैणैं आल़अ बैण। अह बैण ज़ुंण आप्पू ई ज़िन्दगी आसा अह हुअ हाम्हां लै प्रगट अर हाम्हैं भाल़अ आपणीं आछी। ऐबै आसा हाम्हैं तेते शाजत अर हाम्हैं खोज़ा तेऊ ई सदा रहणैं आल़ी ज़िन्दगीओ समाद तम्हां का, ज़ुंण बाब परमेशरा संघै त अर हाम्हां लै हुअ प्रगट।
ज़ुंण बी हाम्हैं शूणअ अर भाल़अ द आसा, हाम्हैं खोज़ा तेतो समाद तम्हां का बी ताकि तम्हैं बी हाम्हां संघै साझ़ू हई सके। म्हारी साझ़ आसा बाब परमेशरा संघै अर तेऊए पूत मसीहा ईशू संघै। इना गल्ला लिखा हाम्हैं तम्हां लै एते तैणीं कि म्हारी खुशी लोल़ी पूरी हुई।
प्रैश्शै दी हांढणअ
अह समाद आसा हाम्हैं ईशू का शूणअ द अर ऐबै खोज़ा हाम्हैं एऊ तम्हां का: अह आसा इहअ कि परमेशर आसा प्रैश्शै ज़िहअ शुचअ, अर तेथ निं किछ़ बी न्हैरै ज़ेही किछ़ै बूरी गल्ल आथी। ज़ै हाम्हैं इहअ बोले कि प्रभू संघै आसा म्हारी साझ़ अर तेखअ बी हांढे हाम्हैं न्हैरै दी! तै आसा हाम्हैं झ़ुठै अर तै निं हाम्हैं सत्ता दी रहणैं आल़ै आथी। पर ज़िहअ परमेशर प्रैश्शअ आसा, ज़ै तिहै ई हाम्हैं बी प्रैश्शै दी हांढे, तै हआ म्हारी एकी-दुजै संघै साझ़ अर तेऊए पूत मसीहा ईशूओ लोहू करा हाम्हां सोभी पापा का शुचै।1
ज़ै हाम्हैं इहअ बोले कि हाम्हां दी निं किछ़ै पाप आथी, तै दैआ हाम्हैं आप्पू लै धोखअ अर तै निं हाम्हां दी किछ़ै सत्त आथी। ज़ै हाम्हैं परमेशरा सेटा आपणैं पाप मने, तै आसा परमेशर म्हारै पाप माफ करनै अर हाम्हां म्हारै सारै पापा का शुचै करना लै विश्वास करनै जोगी अर धर्मीं।2
पर ज़ै हाम्हैं इहअ बोले कि हाम्हैं निं किछ़ै पाप किअ, तै बणाआं हाम्हैं तेऊ परमेशरा झ़ुठअ अर तै निं अज़ी तेऊओ बैण हाम्हां दी आथी।
Source notes (2)
- Cross-reference ईशा. 2:5
- Cross-reference भज. 32:5; सैणीं. 28:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.