2 पतरास 3

प्रभूए फिरी एछणें धैल़ी

1मेरै पैरै साथीओ, ऐबै लिखा हुंह तम्हां लै ऐहा दुजी च़िठी। ईंयां दुहै च़िठी आसा मंऐं तम्हां का तिन्‍नां गल्‍ले बारै आद फरेऊंणा लै लिखी दी ज़ेतो तम्हां का पैहलै ई आसा थोघ। मंऐं किई सिधी थारै मन्‍नें शुचै बच़ारा ज़गेरने कोशिश। 2हुंह च़ाहा इहअ कि तम्हैं तिन्‍नां गल्‍ला आद डाहे ज़ुंण पैहलकै ज़मानै परमेशरे पबित्र गूरै आसा खोज़ी दी अर म्हारै उद्धार करनै आल़ै मसीहा ईशूए तिन्‍नां गल्‍ला बी डाहा आद ज़ुंण शधाणूं तम्हां सेटा पुजी आसा खोज़ी दी।

3सोभी का ज़रूरी गल्‍ल आसा अह कि तम्हां का लोल़ी थोघ लागअ कि खिरीए धैल़ी मसीहा एछणैं का आजी हणैं इहै लोग; तिन्‍नां बणाणअं थारअ ऐहा गल्‍ला पिछ़ू मखौल कि तम्हैं करा इहअ विश्वास कि मसीहा एछणअ भिई फिरी। तिन्‍नां हणअ एही बूरी गल्‍ला करनैओ भैस्स पल़अ द ज़ेता करै तिंयां खुश हआ। 4तिन्‍नां बोल़णअ इहअ कि तेऊए फिरी एछणें करार निं शुची आथी! सह निं कधि एछणैं आल़अ आथी! किल्हैकि ज़ुंण शुरू दी म्हारै दाद-बाब तै तिंयां मूंऐं सोभ, पर आझ़ तैणीं निं किछ़ै बदल़अ। सोभै गल्‍ला आसा कबल्‍ली ज़ेही कै तेही हंदी, ज़ेही तधू ती ज़धू परमेशरै संसार बणाअं।

5तिंयां सका इहअ बोली किल्हैकि तिंयां च़ाहा बिस्सर्नअ कि खास्सी साला पैहलै आसा सरग अर पृथूई परमेशरै हुकम करी बणाऐं दै। तेऊ बोलअ ज़िम्मीं लै पाणीं का उझै निखल़णां लै अर पाणीं का ज़ुदै हणां लै।1

6तेऊ ई पाणीं करै किअ परमेशरै तेऊ जुगो संसार पाणीं दी डबेऊई करै खतम।2 7पर एऊ जुगे सरग अर पृथूई आसा तेऊ ई बैणा करै एते तैणीं डाहै दै कि एकी धैल़ै पाणै ईंयां दहई। तेऊ आसा तिंयां तैहा धैल़ी तैणीं डाहै दै ज़ेभै तेऊ नसाफ करनअ अर तिंयां लोग खतम करनै ज़ुंण तेऊओ अदर निं करदै।

8मेरै पैरै साथीओ, ऐहा गल्‍ला निं कधि बिस्सरी कि परमेशरे एक धैल़ी हआ हज़ार साला ज़ेही अर हज़ार साला हआ एकी धैल़ी ज़ेही। तेऊ लै आसा एक धैल़ी अर हज़ार साला दुहै एक बराबर।3

9कई लोग सोठा इहअ कि प्रभू आसा आपणीं फिरी एछणें करारा पूरी करना लै बल़ैग पांदअ लागअ द। पर प्रभू निं एऊ साबै बल़ैग करदअ आथी लागअ द। तेऊ आसा तम्हां लै सबर डाहअ द। किल्हैकि सह निं कोही बरैबाद करनअ च़ाहंदअ। पर सह च़ाहा इहअ कि हरेक मणछ आपणैं पापो प्राश्त करे अर परमेशरा सेटा फिरी एछे।4

10पर मसीहा एछणअ पाक्‍कै दी फिरी अर सह एछणअ नभैऊशै, ज़िहअ च़ोर एछा। तैहा धैल़ी हणीं सरगै गुल़ूबिज़ल़ू करै बडी छ़ेल़ अर सरग निं शुझणअ। सरगे सोभै च़िज़ा सुरज़, ज़ोथ अर तारै दझ़णैं पठी। तैहा धैल़ी करनी परमेशरा लोगे तिंयां गल्‍ला प्रगट ज़ुंण तिन्‍नैं संसारै रहंदी किई ती अर तेतो हणअ नसाफ।

11अह गल्‍ल आसा पाक्‍की कि परमेशरा करनी सोभै गल्‍ला इहअ करै खतम, तै आसा तम्हां का थोघ कि थारअ बभार किहअ लोल़ी हुअ। थारअ बभार लोल़ी धर्मीं अर पबित्र हुअ अर थारै हर कामां करै लोल़ी परमेशर खुश हुअ। 12आपणअ बभार डाहा तिहअ ज़िहअ तम्हैं आशा डाही तैहा धैल़ी न्हैल़ै आसा लागै दै ज़ुंण परमेशरै मसीहा फिरी एछणा लै आसा छ़ांटी दी। तैहा धैल़ी छ़ेक्‍कै एछणा लै करा पूरी कोशिश। तैहा धैल़ी दहणअ परमेशरा सरग आगी करै अर सुरज़, ज़ोथ अर तारै गल़णै तैहा आगीए घमास्सा करै।5

13पर हाम्हां विश्वासी आसा परमेशरा का एही आशा कि तेऊ बणाणैं नऊंअ सरग अर पृथूई ज़िहअ तेऊ बाहिदअ आसा किअ द। तिधी रहणैं सिधै धर्मीं मणछ।6

तैर्हुई करै रहा बिऊंतै

14तैही बोला हुंह, मेरै पैरै साथीओ, ज़िहै कि तम्हैं इना गल्‍ला हंदी न्हैल़ै आसा लागै दै, थारी लोल़ी हर कोशिश एही ज़िन्दगी ज़िऊंणें हुई ज़ेता करै परमेशर खुश हआ। तम्हैं रहा शुचै, नर्दोश अर सोभी संघै शांती दी।

15म्हारै प्रभूओ सबर करनअ समझ़ा एक मोक्‍कअ, ज़ुंण तेऊ आजू हणैं आल़ै नसाफ का बच़णा लै दैनअ। म्हारै पैरै संघी विश्वासी भाई पल़सी बी आसा परमेशरा का भेटै दै ज्ञैना करै च़िठी दी तम्हां लै ईंयां ई गल्‍ला लिखी दी। 16सोभै च़िठी ज़ुंण तेऊ विश्वासी लै लिखी, तेथ आसा तेऊ इना गल्‍ले बारै इहअ ई लिखअ द। पर धख गल्‍ला आसा तेऊए च़िठी दी एही बी ज़ुंण समझ़णीं कठण आसा। ज़ुंण लोग राम्बल़ै नांईं आथी शिखल़ै दै अर ज़हा का पाक्‍कअ थोघ निं आथी कि तिंयां कै विश्वास करा, तिंयां करा इना कठण च़िज़ो गलत बखान, ज़िहअ तिंयां पबित्र शास्त्रे होरी भागा का बी तेतो मतलब गलत बखान करा। इहअ करी हआ तिन्‍नें आपणीं बरैबादी।

17पर मेरै पैरै साथीओ, तम्हां का आसा पैहलै ई थोघ कि ईंयां गल्‍ला निभणी ज़रूर। तैही डाहै तम्हैं खैल कि ज़ुंण मणछ परमेशरे बधाने साबै ज़िन्दगी नांईं ज़िऊंदै, तिन्‍नें शल़ैघा करै निं लोल़ी तम्हैं कबाता पेठै। तिन्‍नें गल्‍ला मनी सका थारै मन्‍नैं तिन्‍नां शुची गल्‍ले बारै बैहम पल़ी ज़ेथ तम्हैं पाक्‍कअ विश्वास डाहा। 18पर तम्हैं लागा एऊ साबै ज़िन्दगी ज़िऊंणीं कि तम्हां म्हारै उद्धार करनै आल़ै प्रभू ईशू मसीहे जशो होर बी खास्सअ तज़ुर्बअ होए अर तम्हां तेऊए बारै होर बी थोघ लागे।

तेऊओ ई प्रतप्प लोल़ी आझ़ अर सारी सदा हुअ। एवमस्तू।