Kulvi Outer Seraji Bible
1 जोहन्ना 2
मसीहा आसा म्हारअ मज़त करनै आल़अ
ए मेरै लान्हैंओ, मंऐं लिखी तम्हां लै तै ईंयां गल्ला एते तैणीं कि तम्हैं पाप नां करे। पर ज़ै कोई पाप करे, तेता लै आसा बाब परमेशरा का आसा हाम्हां बाखा एक गल्ला करनै आल़अ, मतलब प्रभू ईशू मसीहा ज़ुंण धर्मीं आसा। सह ई आसा म्हारै पापो प्राश्त-बल़ीदान, सिधअ म्हारै ई निं पर सारै संसारे पाप माफ करना लै बी आसा सह ई।
ज़ै हाम्हैं तेऊओ हुकम मने, तै जाणअ हाम्हां का थोघ लागी कि हाम्हैं हेरअ सह बछ़ैणीं।
ज़ुंण बी इहअ बोला कि हाम्हैं हेरअ परमेशर बछ़ैणीं, अर ज़िहअ सह च़ाहा तिहअ निं करदअ आथी, सह आसा झ़ुठअ अर तेऊ दी निं परमेशरो सत्त आथी। पर ज़ुंण बी तेऊए बैणे साबै ज़िन्दगी ज़िऊए, तेऊ दी हुई सच्च़ी परमेशरे झ़ूरी पाक्की, एता करै लागा हाम्हां का थोघ कि हाम्हैं आसा तेऊ दी। ज़ै कुंण इहअ बोला कि हुंह रहा परमेशरा दी, तेऊ लोल़ी इहअ कि सह आप्पू बी तिहअ ई करे, ज़िहअ प्रभू आप्पू त।
नऊंअ हुकम
मेरै पैरै भाईओ, हुंह निं तम्हां लै किछ़ै नऊंअ हुकम लिखदअ, पर ईंयां आसा तिंयां ई पराणैं हुकम ज़ुंण तम्हां सेटा शुरू का आसा भेटै दै, ईंयां पराणैं हुकम आसा तिंयां ई बैण ज़ुंण तम्हैं तधू आसा शूणैं दै ज़धू तम्हैं मसीहा दी विश्वास किअ। तेखअ लिखा हुंह तम्हां लै एक नऊंअ हुकम, अह आसा असली सह सत्त ज़ेथ मसीहा त अर तम्हैं बी आसा। किल्हैकि न्हैरै ज़ेही बूरी गल्ला लागी दूर हंदी अर सत्तो प्रैश्शअ लागअ च़मकदअ।
ज़ुंण इहअ बोला कि हुंह आसा प्रैश्शै दी, अर आपणैं साथी-भाई संघै करा ज़ीद, सह आसा अज़ी बी न्हैरै दी। ज़ुंण आपणैं भाई लै झ़ूरी करा, सह रहा प्रैश्शै दी अर तेऊ दी निं एही किछ़ै गल्ल आथी ज़ुंण कहा होरी का पाप कराओए। पर ज़ुंण आपणैं भाई संघै ज़ीद करा, सह आसा न्हैरै दी अर सह हांढा बी न्हैरै दी। तेऊ का निं इहअ थोघ हंदअ कि सह किधा लै च़ाल्लअ डेऊई, किल्हैकि न्हैरै आसा डाही दी तेऊए आछी कांणी करी।
ए लान्हैंओ, हुंह लिखा तम्हां लै एते तैणीं कि प्रभू ईशूए नाओंए आसा हुऐ दै थारै पाप माफ।1
ज़ुंण तम्हैं सैणैं आसा, हुंह लिखा तम्हां लै एते तैणीं कि तम्हां का आसा ईशूए बारै थोघ कि सह आसा पैहलै ई का।
ओ ज़ुआन मणछो, तम्हां लै लिखा हुंह एते तैणीं कि तम्हैं आसा तेऊ कदुष्ट राख्सा का जुध ज़िती गऐ दै।
परमेशरे लान्हैंओ, तम्हां लै लिखा हुंह एते तैणीं कि तम्हैं हेरअ बाब परमेशर बछ़ैणीं।
सैणैं मणछो, मंऐं लिखअ तम्हां लै एते तैणीं कि ज़ुंण पैहलै का आसा, तम्हां का आसा तेऊओ थोघ।
ओ कुंआरै मणछो, तम्हां लै लिखअ मंऐं तै कि तम्हैं आसा विश्वासा दी जोधै अर परमेशरो बैण लोल़ी थारै दिलै रहअ, अर तम्हैं आसा हेरअ द तेऊ कदुष्ट राख्सा का जुध ज़िती।
संसारा संघै झ़ूरी निं डाहणीं
तम्हैं नां संसारा का अर नां संसारे च़िज़ा का झ़ूरी करी। ज़ै कुंण संसारा का झ़ूरी करा, तेऊ दी निं म्हारै बाब परमेशरे झ़ूरी आथी। किल्हैकि ज़ुंण बी संसारै बूरी गल्ला आसा तिंयां निं म्हारै बाब परमेशरा बाखा आथी, पर तिंयां आसा संसारा बाखा ज़हा कामां करनैओ अर भाल़णेंओ तिन्नां च़ाअ लागा अर ज़ेऊ साबै ज़िऊंणेंओ तिन्नां घमंड आसा।2
संसार ज़ुंण परमेशरो अदर नांईं करदअ सह हणअ तेऊए दिले च़ाहा संघी बरैबाद। पर ज़ुंण ज़िहअ परमेशर च़ाहा तिहअ करे तिंयां रहणैं सदा बणी।
मसीहा-बरोधी
ए लान्हैंओ, अह आसा खिरीओ बगत। ज़िहअ तम्हैं शूणअ द आसा कि मसीहो बरोधी आसा एछणैं आल़अ, तेते साबै आसा गऐ दै कई मसीहा बरोधी उझ़ुई। इहअ करै लागा हाम्हां का थोघ कि अह आसा खिरीओ बगत। तिंयां मसीहे बरोधी निखल़ै दै, आसा हाम्हां ई मांझ़ा का, पर असली दी नांईं तै तिंयां म्हारै आथी! किल्हैकि, ज़ै तिंयां म्हारै हंदै, तै रहंदै तिंयां हाम्हां संघै। पर हाम्हां का दूर डेऊऐ तिंयां एते तैणीं कि इहअ थोघ लागे कि तिंयां निं हाम्हां सोभी संघै आथी।
थारअ आसा तेऊ मसीहे पबित्र आत्मां दैई अभिषेक किअ द तेता करै हेरा तम्हैं सारअ सत्त समझ़ी। मंऐं निं तम्हां लै एते तैणीं लिखअ कि तम्हां का निं सत्तो थोघ आथी। पर मंऐं लिखअ तम्हां लै तै कि तम्हां का आसा थोघ अर तैबी कि कोई बी झ़ुठ निं सत्ता बाखा आथी। झ़ुठअ कुंण आसा? सह आसा झ़ुठअ ज़ुंण प्रभू ईशू लै इहअ बोला कि सह निं मसीहा आथी। मसीहो बरोधी आसा सह ई ज़ुंण बाब अर पूता लै हुधिआ। ज़ुंण पूता लै हुधिआ, तेऊ सेटा निं बाब बी आथी, ज़ुंण पूता मना, तेऊ सेटा आसा बाब बी।
ज़ुंण बी तम्हैं शुरू का आसा शूणअ द, सह ई लोल़ी तम्हां दी बस्सी रहअ, तै रहणैं तम्हैं बी पूत अर बाबा दी बस्सी। ज़ुंण हाम्हां अह सदा रहणैं आल़ी ज़िन्दगी भेटी अह आसा परमेशरै हाम्हां लै करार किई दी।
मंऐं आसा लिखी दी ईंयां गल्ला तम्हां लै तिन्नें बारै चतैन रहणा लै ज़ुंण तम्हां धोखै करै मसीहे सत्ता का कबाता पाआ। थारअ आसा तेऊ पबित्र मसीहे पबित्र आत्मां दैई अभिषेक किअ द, सह बस्सा तम्हां दी। तम्हां निं एते ज़रुरत आथी कि कुंण तम्हां सेटा एछी सत्ते बारै सखाओए। पर ज़ुंण पबित्र आत्मां तम्हां लै आसा दैनअ द, सह सखाऊआ तम्हां का तिन्नां सोभी गल्ला ज़ेते तम्हां ज़रुरत हआ ज़ुंण बी तम्हां सह सखाओए तिंयां गल्ला आसा शुची तेथ निं किछ़ै झ़ुठअ आथी। ज़िहै तम्हैं तेऊ सखाऊऐ दै आसा, तिहै ई रहा तम्हैं मसीहा दी बस्सी।3
परमेशरे लुआद
इहअ करै ए लान्हैंओ, प्रभू दी रहा पाक्कै, कि ज़ेभै सह प्रगट होए, तेभै लोल़ी हाम्हां हैअ हुअ कि ज़ेभै सह फिरी एछे तेभै निं लोल़ी पल़अ शर्मिंदअ हणअ।
ज़ै तम्हैं इहअ समझ़े कि मसीहा आसा धर्मीं तै लआ ऐहा गल्ला बी समझ़ी कि हरेक मणछ ज़ुंण धर्मीं आसा सह आसा परमेशरे लुआद।
Source notes (3)
- Cross-reference भज. 25:11
- Cross-reference रोम. 13:14; सैणीं. 27:20
- Cross-reference जोह. 14:26
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.