Kulvi Outer Seraji Bible
1 जोहन्ना 3
सोठा, बाब परमेशरै हाम्हां संघै केही झ़ूरी किई, कि हाम्हैं तेऊए लुआद हई सके। हाम्हैं तेऊए लुआद आसा बी, तैही निं संसार हाम्हां बछ़ैणदअ, किल्हैकि तिन्नैं निं प्रभू, म्हारअ बाब परमेशर बी बछ़ैणअ। मेरै पैरै भाईओ, ऐबै आसा हाम्हैं परमेशरे लुआद, अर अज़ी बी निं अह प्रगट हुअ कि आजू हाम्हैं किज़ै-किज़ै हणैं, पर एतरअ आसा हाम्हां का थोघ कि ज़ेभै सह प्रगट होए, तेभै हणैं हाम्हैं बी तेऊ ज़िहै, किल्हैकि सह हेरनअ हाम्हां तिहअ ई ज़िहअ सह आसा। ज़ुंण बी मसीहा दी आशा डाहा, सह हआ आप्पू बी तिहअ शुचअ ज़िहअ प्रभू आसा पबित्र आसा।
ज़ुंण पाप करा, सह करा बधानो बरोध अर परमेशरो बधान नांईं मनणअ आसा पाप। तम्हां का आसा ऐहा गल्लो थोघ कि मसीहा आअ एते तैणीं कि म्हारै पाप दूर करे। तम्हां का इहअ बी आसा थोघ कि तेऊ निं कधि पाप किअ।1
ज़ुंण बी तेऊ प्रभू दी टेक्की रहे, सह निं पाप करदअ। ज़ुंण कबल्लअ रहा पाप करदअ लागी, तेऊ नां प्रभू भाल़अ द आथी, नां सह तेऊ बछ़ैणदअ आथी।
ए लान्हैंओ, कसरै ज़ाणैं निं लागी, ज़ुंण धर्में काम करा, सह आसा तेऊ प्रभू ई ज़िहअ धर्मीं। ज़ुंण कबल्लअ रहा पाप करदअ लागी, सह आसा राख्सा बाखा। किल्हैकि राख्स करा शुरू ई का पाप। परमेशरो पूत आअ एते तैणीं कि राख्से तिन्नां सारै कामां बरैबाद करे। ज़ुंण बी परमेशरे लुआद आसा सह निं कधि पाप करदअ। किल्हैकि परमेशरो बेज़अ रहा तेऊ दी टेक्की अर सह निं पाप करी ई सकदअ, किल्हैकि सह आसा परमेशरे लुआद। एता ई करै बछ़ैणियां परमेशरे लुआद अर राख्से लुआद। ज़ुंण बी धर्में काम नांईं करदअ, सह निं परमेशरा का आथी अर सह बी निं परमेशरो आथी ज़ुंण आपणैं भाई संघै झ़ूरी निं डाहंदअ।
एकी-दुजै संघै करनी झ़ूरी
ज़ुंण समाद तम्हैं पैहलै ई का आसा शूणअ द, सह आसा इहअ कि हाम्हैं एकी-दुजै संघै झ़ूरी डाहे। तेऊ आदी मणछ आदमीए शोहरू कैना ज़िहअ निं बणी, ज़ुंण कदुष्ट त अर ज़ुंणी आपणैं भाऊए हत्या किई? तेऊ किअ इहअ तै कि तेऊए काम तै बूरै अर तेऊए भाऊए काम तै धर्मीं।2
भाईओ, ज़ै तम्हां संघै संसार ज़ीद करा, तैहा गल्ला लै निं रहैन हई।
हाम्हैं हेरा जाणीं कि हाम्हां आसा मौता का पार तरी करै ज़िन्दगी दी पुजै दै। किल्हैकि हाम्हैं करा आपणैं भाई लै झ़ूरी। ज़ुंण आपणैं भाई लै झ़ूरी नांईं करदअ, सह हआ मूंऐं दै ज़िहअ। ज़ुंण बी आपणैं भाई लै ज़ीद करा, सह आसा हत्या करनै आल़अ अर तम्हां का आसा थोघ कि हत्या करनै आल़ै दी निं सदा रहणैं आल़ी ज़िन्दगी हंदी।
हाम्हैं समझ़ी झ़ूरी इहअ करै कि तेऊ प्रभू दैनै म्हारी तैणीं आपणैं प्राण बी। इहअ ई लागा हाम्हां बी आपणैं भाई-बंधा लै हर गल्ला लै तैर रहणअ च़ाऐ हाम्हां मरनअ बी किल्है निं पल़े। पर ज़ै कहा का संसारे ज़ैदात होए अर आपणैं भाई नांगअ भुखअ भाल़ी तेऊ लै झींण नांईं करे, तेऊ दी किहअ करै सका परमेशरे झ़ूरी बस्सी।3
ए लान्हैंओ, म्हारी झ़ूरी निं लोल़ी सिधी गल्ला करनै दी रही, पर हाम्हैं लोल़ी भलै काम अर सत्ता दी रही झ़ूरी किई।
परमेशरा सम्हनै हिम्मत
एकी-दुजै लै झ़ूरी करी बछ़ैणियां हाम्हैं कि हाम्हैं आसा सत्ता बाखा अर ज़ै तेता लै म्हारी सोर हाम्हां लै दोश दैआ, तेता लै बी सका हाम्हैं परमेशरा सम्हनै निहंचै रही। किल्हैकि परमेशर आसा म्हारी सोर-समझ़ा का खास्सअ बडअ अर तेऊ का आसा सोभी गल्लो थोघ।
मेरै पैरै भाईओ, ज़ै म्हारी सोर हाम्हां लै दोश नांईं लाए, तै हआ हाम्हां आपणैं परमेशरा सम्हनै हैअ। तेखअ ज़ुंण बी हाम्हैं परमेशरा का मांगा, सह जाआ हाम्हां तेऊ का भेटी। किल्हैकि हाम्हैं मना तेऊए हुकम अर हाम्हैं करा तिहअ ई ज़ेता करै सह खुश हआ।
तेऊओ हुकम आसा इहअ कि हाम्हैं तेऊए पूत प्रभू ईशू मसीहा दी विश्वास करे अर ज़िहअ तेऊ हाम्हां लै हुकम आसा दैनअ द, तेऊ ई साबै हाम्हैं आप्पू मांझ़ै झ़ूरी डाहे। ज़ुंण प्रभूओ हुकम मना, सह बस्सा परमेशरा दी अर परमेशर रहा तेऊ दी बस्सी अर एता ई करै मतलब तैहा पबित्र आत्मां करै ज़ुंण परमेशरै हाम्हां लै आसा दैनी दी, हाम्हां का आसा थोघ कि परमेशर बस्सा हाम्हां दी।
Source notes (3)
- Cross-reference जोह. 1:29
- Cross-reference भज. 38:20
- Cross-reference बधा. 15:7-8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.