Kulvi Outer Seraji Bible
1 जोहन्ना 5
संसारै ज़ीत पाणीं
ज़सरअ इहअ विश्वास आसा कि ईशू आसा मसीहा, सह आसा परमेशरो पूत। ज़ुंण बी बाब संघै झ़ूरी करा सह करा तेऊए सोभी शोहरू संघै बी झ़ूरी। ज़ै असली दी हाम्हैं परमेशरा संघै झ़ूरी करा अर तेऊओ हुकम मना, एता ई करै लागा हाम्हां का थोघ कि हाम्हैं करा परमेशरे सोभी लान्हैं संघै झ़ूरी। म्हारी परमेशरा संघै झ़ूरी आसा अह कि हाम्हैं मना तेऊओ ई हुकम अर तेऊओ हुकम निं हाम्हां लै कठण आथी।1
ज़ुंण बी परमेशरे लुआद आसा, तिंयां निं संसारे होरी लोगा ज़िहै काम करदै। हाम्हैं ज़िता तिन्नां सोभी गल्ला का ज़ुंण परमेशरे खलाफ काम करा। हाम्हैं निं संसारे बूरी गल्ले बशै पल़दै किल्हैकि म्हारअ विश्वास आसा मसीहा दी। संसारै ज़ुंण परमेशरे खलाफ आसा तेता का कुंण मणछ सका ज़िती? सह हरेक मणछ सका तेता का ज़िती ज़ुंण इहअ विश्वास करा कि ईशू मसीहा ई आसा परमेशरो पूत।
प्रभू ईशू मसीहे बारै शाजत
ईशू मसीहे बारै करा खैल। अह ई आसा सह ज़ुंण परमेशरै पृथूई लै छ़ाडअ। परमेशरै रहैऊई तधू ईंयां गल्ला ज़धू ईशू लै पाणीं दी डुबकी दैनी अर ज़धू ईशू आपणैं लोहू बहाऊई करै प्राण दैनै। पबित्र आत्मां करै गअ इना गल्लो सत्त प्रगट हई कि ईशू मसीहा आसा परमेशरै छ़ाडअ द। इना गल्ला खोज़णैं आल़ै आसा चअन कि मसीहा आअ परमेशरा बाखा का आअ द। पबित्र आत्मां, पाणीं दी डुबकी अर क्रूसा दी बहाऊअ द लोहू। ईंयां चिहै खोज़ा एक्कै गल्ल। हाम्हैं करा होरी मणछै खोज़ी दी गल्लो विश्वास। पर हाम्हैं सका परमेशरे गल्लो होर बी खास्सअ विश्वास करी। परमेशरै आसा आप्पै आपणैं पूते बारै शाजत दैनी दी। ज़ुंण परमेशरे पूता दी विश्वास करा, सह करा ऐहा गल्ला दी विश्वास कि ज़ुंण परमेशरै बोलअ तिंयां गल्ला आसा शुची। ज़ुंणी परमेशरो विश्वास ई नांईं किअ, सह करा परमेशरा झ़ुठै, किल्हैकि तेऊ निं तैहा शाजत दी विश्वास किअ ज़ुंण परमेशरै आपणैं पूते बारै दैनी।
होर आसा सह शाजत एही कि परमेशरै आसा हाम्हां लै सदा रहणैं आल़ी ज़िन्दगी दैनी दी अर सह ज़िन्दगी आसा हाम्हां तेऊए पूता करै भेटी दी। ज़हा दी परमेशरो पूत बस्सा तेऊ का आसा सदा रहणैं आल़ी ज़िन्दगी अर ज़हा दी परमेशरो पूत नांईं बस्सदअ, तेऊ का निं सह ज़िन्दगी बी आथी।
सदा रहणैं आल़ी ज़िन्दगी
हुंह लिखा ऐहा च़िठी तम्हां लै एते तैणीं कि ज़ुंण तम्हैं परमेशरे पूता दी विश्वास करा, तम्हां का लोल़ी इहअ थोघ लागअ कि सदा रहणैं आल़ी ज़िन्दगी तम्हां लै।
होर, हाम्हां आसा परमेशरा सम्हनै इहअ निहंचअ कि, ज़ै हाम्हैं प्रभूए मरज़ी दी मांगे तै शूणां सह म्हारी। ज़ै हाम्हां का इहअ थोघ आसा कि ज़ुंण हाम्हैं मांगा, तेता हेरा परमेशर शूणीं तै आसा हाम्हां का इहअ बी थोघ कि ज़ुंण हाम्हैं मांगअ सह हेरअ हाम्हां लै तेऊ दैई बी।
ज़ै कुंण आपणैं साथी-भाई इहअ पाप करदै भाल़े, ज़ेते सज़ा मौत नां होए, तेता लै करै प्राथणां। तेता लै दैणीं परमेशरा तिन्नां मणछा लै ज़िन्दगी ज़ेते सज़ा मौत निं आथी। एक पाप आसा इहअ बी ज़ेते सज़ा मौत हआ तेता लै प्राथणां करना लै निं हुंह आथी लागअ द बोल्दअ। सोभी रंगे बूराई आसा पाप, पर एक पाप हआ इहअ बी ज़ेते सज़ा मौत निं हंदी।
नचोल़
हाम्हां का आसा ऐहा गल्लो थोघ कि ज़ुंण मणछ परमेशरा का आसा पैईदा हुअ द सह निं पाप करदअ अर तेऊ डाहा परमेशर बच़ाऊई अर तेऊ निं सकदअ सह कदुष्ट राख्स छ़ुंहीं बी।
हाम्हां का इहअ बी आसा थोघ कि हाम्हैं आसा परमेशरा का, अर सारअ संसार आसा तेऊ कदुष्ट राख्से बशै पल़अ द।
हाम्हां का इहअ बी आसा थोघ कि परमेशरो पूत मसीहा आसा एछी गअ द अर तेऊ आसा दैनी दी हाम्हां लै समझ़ कि हाम्हैं तेऊ शुचै परमेशरा बछ़ैणीं सके अर हाम्हैं तेऊ दी बस्से ज़ुंण शुचअ आसा, मतलब प्रभू ईशू मसीहा दी, शुचअ परमेशर अर सदा रहणैं आल़ी ज़िन्दगी आसा अह ई।
ए लान्हैंओ, एही मुहुर्ती का रहै दूर ज़ुंण थारै दिलै परमेशरे ज़ैगा बेशा।
Source notes (1)
- Cross-reference मोत्त. 11:30
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.