Kulvi Outer Seraji Bible
2 जोहन्ना 1
अदर
हुंह मसीही टोलीओ सैणअ जोहन्ना लिखा ऐहा च़िठी तैहा बैहणी लै ज़ुंण परमेशरै आसा छ़ांटी दी अर तेसे लान्हैं लै। हुंह करा मसीहा दी तिन्नां लै झ़ूरी किल्हैकि हाम्हैं सोभै करा परमेशरे सत्ता दी विश्वास अर सिधअ हुंह, निं तिंयां सोभै बी करा झ़ूरी ज़हा का सत्तो थोघ आसा। हाम्हैं करा तम्हां लै झ़ूरी तै कि हाम्हैं सोभै करा शुची शिक्षा दी विश्वास अर हाम्हां डाहणीं तिंयां शुची शिक्षा सदा ढाकी।
जश, झींण अर शांती ज़ुंण बाब परमेशरा अर तेऊए पूत ईशू मसीहा का एछा, सह लोल़ी कबल्ली हाम्हां संघै रही ज़हा का सत्त अर झ़ूरी आसा।
सत्त अर झ़ूरी
हुंह हुअ खास्सअ खुशी किल्हैकि मंऐं शूणअ तेरै कई लान्हें बारै कि तिंयां आसा परमेशरे शुची बाता ज़िन्दगी ज़िऊंदै। तिंयां आसा तिहअ करदै लागै दै ज़िहअ म्हारै बाब परमेशरै बोलअ कि हाम्हैं करे। ऐबै मेरी बैहण, मंऐं निं ताल्है नऊंअ किछ़ै हुकम लाई दैई, हुंह करा ताखा अरज़ कि हाम्हां लागा एकी-दुजै लै झणैल़ू हणअ। अह निं नऊंअ हुकम आथी पर अह आसा सह ई हुकम ज़ेतो हाम्हां का तधा ओर्ही आसा थोघ ज़धू हाम्हैं मसीहा दी विश्वास किअ। असली झ़ूरी आसा एही कि हाम्हां लागा तिहअ करनअ ज़िहअ प्रभू हुकम करा। शुरू ओर्ही आसा तम्हैं अह हुकम शूणअ द अर ज़िन्दगी बी लागा तम्हां एही ई ज़िऊंणीं कि तम्हैं झ़ूरी करे।
हुंह बोला इहअ एते तैणीं कि कई ज़ुंण होरी आपणीं झ़ुठी शिक्षा करै कबाता पाआ, तिंयां आसा सारै दी पुजी गऐ दै। तिंयां बोला इहअ कि ईशू मसीहा निं एऊ संसारै मणछे देही दी आअ ई आथी। ज़ै कुंण मणछ इहअ बोला, सह ई मणछ आसा मसीहो बरोधी, ज़ुंण होरी लोगा कबल्लै कबाता डाहा पाई। तैही बोला हुंह कि तम्हैं डाहै आपणअ धैन कि तम्हां इहै मणछ कबाता नां पाए ताकि ज़ुंण मैन्थ हाम्हैं सोभी आसा किई दी, तेता निं बरैबाद दैई हणैं। पर तम्हां जाणीं तिंयां सोभै बर्गता भेटी ज़ेता दैणें परमेशरै ज़बान आसा दैनी दी। हुंह बोला तम्हां लै इहअ कि ज़ुंण मसीहा खोज़ी दी शिक्षा दी किज़ै आपणीं बाखा राल़े अर तिन्नां शिक्षा दी कबल्लअ विश्वास नांईं करदअ, तेऊओ निं परमेशरा संघै किछ़ै रिश्तअ आथी। ज़ै कुंण कबल्लअ मसीहा खोज़ी दी शिक्षा दी विश्वास करा, तेऊ का आसा म्हारअ बाब परमेशर अर तेऊए पूत मसीहा ईशू दुहै।
ज़ै कुंण तम्हां सेटा एछे, अर मसीहा खोज़ी दी इना ई शिक्षा नांईं दैए, तेऊ नां घअरै दैई एछणैं अर नां तेऊ लै राज्ज़ी-खुशी पुछ़ी। किल्हैकि ज़ुंण इहै मणछो सुआगत बी करा, सह हआ तेऊए कदुष्ट कामां दी बी साझ़ू।
खिरी अदर करनअ
होर बी आसा कई गल्ला ज़ुंण हुंह तम्हां लै बोल़णअ च़ाहा, पर हुंह निं तिन्नां च़िठी दी लिखणअ च़ाहंदअ। पर मुंह आसा आशा कि हुंह एछणअ तम्हां सेटा लै छ़ेक्कै अर तेभै करनी मुंह तम्हां सम्हनै गल्ला ताकि तम्हां बी खुशी होए।1
इधी तेरी बैहण ज़ुंण परमेशरै आसा छ़ांटी दी तेसे शोहरू बी दैआ ताल्है राज्ज़ी-खुशी।
Source notes (1)
- Cross-reference 1 जोह. 1:4; जोह. 1:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.