Nahali Bible
व्यवस्था 16
फसह ने तिवार
(निर्गमन 12:1-20)
अबीब मोयनाह इर केरीन तारा बोगवान यहोवान केरता फसहान तिवार माणावज्ये; काहाकाय अबीब मोयना माय तारो बोगवान यहोवा राती तुवाह मिस्र देसाम रेन काढ़ीन लावो। केरीन जो जागो बोगवान तान नावान रेणेन जागो ठेराव लेय, तोच तार बोगवान यहोवा केरता मेंड्रा बोकड्या, डोरे फसह तिवार केरीन बोली चेड़ावज्ये। ता हिऱ्यो काल्ली अखमीरी वोस्तु मा खाहे; सात दिह वोर अखमीरी रूटो जो दुखान रूटो हे खाया किरज्ये; काहाकाय तु मिस्र देसाम तावणी केरीन निकलेल इतो; इह केरीन तुवाह मिस्र देसाम रेन निकेलनेन दिह जीवणो बोर इर रेय। सात दिह वोर तारा आखा देसाम तार फाय काहरी बी खमीर देखाणे नाय जुवे; एने जो जेनवार तु पेल्ली दिह हांज पोर बोली केरी, तान माह माय रेन काय बी वेगोच वोर वोचणे नाय जुवे।
फसहाह तारा एगदा हेयरा माय, जाह तारा बोगवान यहोवा तुवाह आपेल हे, बोली मा चेड़ावेह। जो जागो तारो बोगवान यहोवा, तान नावान रेणेन केरता निवाड़ लेय, निस्तो ताच वोरह्यान तिच टेमी जा माय तु मिस्र देसाम निकलेल इतो, मतलब दिह बुड़ी तेवी हांज पोर फसहान जेनवेराह बोली किरज्ये। तेवी तान माह ताच जागा पोर जाह, तारो बोगवान यहोवा निवाड़ लेय बुंजीन खाज्ये; उवतो विगोच उठीन तुमू तुमरा पाड़ावा पोर जात रिज्यो। सोव दिह वोर अखमीरी रूटो खाया किरज्ये; एने सातवे दिह तारा बोगवान यहोवान केरता मोटलो पुंचो एय; तेदिह काल्ली बी बातीन काम नाय केराय जाय।
एप्तान तिवार
(निर्गमन 34:22; लेव्यवस्था 23:15-21)
उवतो जेवी तु खेताम रेन पाक काटणेन केरता दातलो चालाड़हे, तेवी रेन सुरवात केरीन सात एप्ता गिणज्यो। तेवी तारो बोगवान यहोवान बोरकेत ने गेत तान केरता सोतान मोरजीन बोली चेड़ावीन एप्तान तिवार मानज्ये। एने ता जागा पोर जो तारो बोगवान यहोवा तान नावान रेणेन केरता निवाड़ लेय तारा बेटा बेटी, पावोर पावेरन्यु हिऱ्यो, तु एने तारा हेयरा माय जा लेवीय एती, एने जा पाराया देसावाला एने विखावाला, एने रांडायेल तार विचीम एती, ता आखान आखा तारा बोगवान यहोवान सोमोर मोंज केरी। एने तु इर मिलज्ये काय तु मिस्र देसाम बी गुलाम इतो; केरीन ज्यु विद्यु पालनेन चोकसी किरज्ये।
खोपड्युन तिवार
(लेव्यवस्था 23:33-43)
जेवी तु तारा खोलो एने अंगुरान कुंडा माय रेन आखी कामाय टुलो केर लिहे, खोपड्युन तिवार सात दिह वोर माणावती रिज्ये; तारा ज्या तिवाराम तारा बेटा बेटी, पावोर पावेरन्यु हिऱ्यो तु एने जा लेवी, एने पाराया देसावाला, एने विखावाला, एने रांडायेल तारा हेयरा माय एती, ता बी मोंज केरी। जो जागो यहोवा निवाड़ लेय, ताम रेन तु तारा बोगवान यहोवान केरता सात दिह वोर तिवार किरती रिज्ये; काहाकाय तारो बोगवान यहोवा तारी आखी वोड़ती माय एने तारा सोब कामाम तुवाह बोरकेत आपी; तु मोंजुस किरज्ये।
वोरह्याम तीन वार एकठा टोलवाणे जुवे, अखमीरी रोटान तिवार, एप्तान तिवार, खोपड़ीन तिवार, ज्या तीन तिवारा माय तुमरा आखा एदमी तुमरा बोगवान यहोवान सोमोर ता जागाम जो तो निवाड़ लेय, ता जावो। पुण दिखो, ठाल्ले आथ यहोवान सोमोर कुण नाय जाय; आखा एदमी जान तान ताकेत ने गेत, एने ती बोरकेत ने गेत जो तारो बोगवान यहोवा तुवाह आप्यो एय, आप्या केरी।
माणहान केरता न्यायी एने आदिकारी
तु तारा एकेक गेराणाम रेन, तारा आखा हेयरा माय जाह तारो बोगवान यहोवा तुवाह आपेह, न्यायनिवाड़ो केरनार, एने आदिकारी निवाड़ लिवो, जा माणहान नियाव खेराय माय केऱ्या केरी। तुमू नियाव मा बिगाड़हो; तु मुय देखीन नियाव मा किरहे; एने गुस लेन न्यायनिवाड़ो मा किरहे, काहाकाय गुस इकेलवालान डोला आंदला केर दिथे, एने खेरला माणहान वातु पोलटाव दिथे। जो काय हाजो हे ताह तु देर रिज्ये, ता माय तु जिवतालो रिहे, एने जो देस तारो बोगवान यहोवा तुवाह आपेह, तान होकदार बोणीन रिहे।
तु तारा बोगवान यहोवान जी वेदी बाणावहे, तान आहने अशेरा देवीन मुरती लाकड़ान मा बाणावहे, एने नाह ते एगदो पुजान खाम उबो किरहे, काहाकाय ताह तारो बोगवान यहोवा नफरत किरेह।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.