Nahali Bible
व्यवस्था 17
तु तार बोगवान यहोवान केरता एगदा गाय बुयोल नाहते मेंड्रा बोकड्या बोली मा किरहे, जा माय खोट नाहते काल्ली बी बातीन खाराबी एय, काहाकाय ओहलो केरनो बोगवानान ओंगाण खाराब हे।
जा गाव तारो बोगवान यहोवा तुवाह आपेह, केदी ता माय रेन काल्ला माय एगदो एदमी निहते बायकु ओहली सापड़ी, जो तार बोगवान यहोवान वाचा तोड़ीन ओहलो काम केऱ्यो एय, जो तान नेजरीम खाराब हे, मतलब मारा उकुमाह तोड़ीन पाराया देवतान, निहते सुर्य, चांद नाहते जुगावाला तारान बोक्ती केऱ्यो एय, नाहते ताह वोंद्यो एय, एने ज्यी वात तुवाह होमलानी एय, तेवी तान बाराम तु पुसतास किरज्ये, एने ज्यी वात खेरीस एय काय इस्राएल माय ओहलो खाराब काम केराय जायेल हे, ते जो एदमी निहते बायकु ओहलो खाराब काम केऱ्यो एय, ता एदम्या नाहते बायकुह हेयरान बाहेर ले जायीन ओहलो देगड़ाठ काय ता मोर जाय। जो मोतीन देन्डान लायकीन रेय तो एकुच पुरावा पोर माराय नाय जाय, पुण दुय नाहते तीन माणहान पुरावा पोर माराय जाए। ताह मार टाकणेन केरता आखान पेल्ला पुरावान आथ, एने तान पासाण दिहरा सोब माणहान आथ ता पोर उठे, इह केरीन ओहली खाराबीह तार माय रेन सिटो किरज्ये।
केदी तार पाड़ावा माय एगदी राड़ीन वात एय, मतलब तुमरा माय ताच खुनान, नाहते बोलाचाल, मारकुटीन एगदी वात उठी, एने तान न्यायनिवाड़ो केरनेन केरता तुवाह काठो मालुम पुड़े, ते ता जागा पोर जायीन जो तारो बोगवान यहोवा निवाड़ लेय; लेवी चाकऱ्या फाय एने ता दिह्यान न्यायनिवाड़ो केरनारा फाय जायीन पुसतास किरज्ये, काय ता तुमूह न्यायनिवाड़ो किहीक काय केरनु हे तो केती। बोगवानान निवाड़ेल चोखाला जागा पोर ता तान निर्णय तुमूह केती, तान वात होमलीन तिहेच केरीन किरज्यो, जो नेम तुमूह आपती तान गेत चालनेन चोकसी किरज्यो। नेमान जी वातु ता तुमूह केती, एने नियाव ने जी वात तुमूह केती, तिहेच केरीन किरज्यो; जी वात ता तुमूह केती ता से जिवड़े नाहते डाखरी उगे मा वुलहो। एने जो माणुह जिद केरीन ता चाकऱ्यान, जो ता तारा बोगवान यहोवान सेवा केरने केरता उपस्तीत रेय, तान वात नाय होमली, एने ता न्यायनिवाड़ो केरनारान बी नाय होमली, ते तो माणुह माराय जाय, इह केरीन तु इस्राएल माय रेन ओहली खाराबी सिटो केर दिज्ये। ज्यी वात होमलीन आखा माणहे बिय जाती, एने ता पोशा जिद नाय केरती।
राजान बाराम
जेवी तु ता देसाम पुचे जाह तारो बोगवान यहोवा तुवाह आपेह, जान तु होकदार बुण जाहे, एने ता माय रिते लेन किहे, “काय चारो उगेन आखा देसान गेत मी बी मार उपेर राजा बाणावुह।” तेवी जाह तारो बोगवान यहोवा निवाड़ लेय ताहच राजा बाणावज्ये; तारा बायाख मायच एगदाह तार उपेर राजा बाणावज्ये; एगदो पाराया देसावालो जो तारा बाहख नाय मिले, ताह तु तार पोर राजा नाह बाणाव सिकेत। एने तो होवटा गोड़ा नाय मेली, एने नाह ज्यो विचार केरीन तारा पोरजान माणहाह मिस्र माय मुकले काय ता फाय जुलूम गोड़ा एय जाय, काहाकाय बोगवान तुमूह कियेल हे, “काय तुमू ती वाटे पोशा केदी मा जाहो।” एने तो होवटाल्यु बायकु बी नाय राखणे जुवी, ओहलो नाय एय काय तान मोन बोगवाना उगे रेन पोलटी जाय; एने तो तान होनो चांदी जुलूम हेंगालीन वोड़ावी। जेवी तो राजगादी पोर बोही, तेवी ज्या नेमान पुस्तेक, जा लेवी चाकऱ्या फाय रेय, तान एक नकल तान केरता केर लेय। एने राजा ताह ता फाय मेली, एने तान जीवणो बोर ताह वाशा केरी, जान वोजेसे तो तान बोगवान यहोवान बिय माने, एने ज्या नेम एने ज्यु विदीन आख्यु वातुन पालेन केरने माय चोकसी केरने हिके; जा से तो तान मोनाम मोठाय केरीन, तान बायह्याख निचो नाय जाणी, एने ज्या उकुमा से नाय ते जिवड़ी एने नाह जेवड़ी उगे वुले, जा माय काय तो एने तान वोसीन माणहे इस्राएलान विचीम जुलूम दिह वोर राज किरती रेय।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.